一次無心嘅表白，竟然令到佢同咗我一齊: 第五章

「做咩成日都唔上msn嘅，出咗街呀？」上咗冇耐就彈出momo嘅對話框。

望住佢張icon再襯返句嘢都幾心甜嘅，但都係個句，自拍信唔過，信佢有眼耳口鼻已經俾多咗佢啦！

「係呀，出咗去俾女溝。」

「咁溝唔溝到？」

「我唔受。」





「懶係嘢咁！玩唔玩勁舞？」

如果我唔洗同阿靜交流溝通，又唔洗同chloe傾電話嘅，我或者會考慮下玩返陣。

「唔啦，好攰。」其實一次過眼耳口手同時兼長時間使用都真係幾攰下架……

同chloe傾電話嘅時候有個好處，就係佢一定會有無數嘅嘢講，所以我幾乎只係用「咁之後點」、「跟住呢」同「吓」再配合埋適當語氣，就可以同佢傾…唔係，係聽足幾個鐘電話。前設係佢唔好突然間問：「我頭先講咩？」

或者可以一邊同chloe傾電話，一邊同阿靜係msn到少少嘅互flirt，對一條毒撚嚟講已經夫復何求呢……





Chloe講講吓自己嘢嘅時候，提起我份禮物……

「喂，我份禮物呢！」

「聽日出嚟俾你啦。」

「去邊呀？」

「是但啦，來來去去都唔會走得出香港，去邊有咩所謂。」





「點知你會唔會帶咗我去賣。」

「如果我有咁嘅能力，我諗我會選擇帶你去禁錮兼私有化先。」

「……」電話嘅另一端靜咗……

每次無論我有心或者無意表白嘅時候，chloe都會選擇逃避唔出聲……

係靜咗唔知幾耐之後，chloe話：「我明架阿恆，不過……」

「唔洗不過，我都明，但唔洗叫我死心啦，你知我唔會！」

「咁又冇諗住再哂口水叫你死心喎，識你咁耐唔知你諗乜咩，有你隨傳隨到幾好呀！」

「屌你咩……哈哈哈哈哈……………………」





強顏歡笑可以化解到尷尬嘅場面，但化解唔到因愛而生嘅心痛……

其實我有自知之明，毒矮柒肥樣樣齊嘅我，跟本冇資格奢望有人鍾意我。做到今時今日可以同佢飲同一杯水嘅知己（兵）已經係bouns……或者應該要咁諗先可以避免將來再一次尷尬嘅場面……

由鍾意咗佢一年之後開始，我已經深明佢唔會鍾意我呢個事實，但午夜夢迴嘅時候，我都忍唔住幻想將來如果有一日可以拖住佢步入教堂，可以同佢兒孫滿堂（即使我好憎小朋友）。但幻想完自己，又開始諗到，終有一日，佢都會拍拖，佢都會成為人哋嘅新娘……要我親眼望住自己付出咗咁多年都係白廢，而另一個人只係可能因為有錢或者靚仔就可以得到我用盡一生都得唔到嘅chloe結婚，我個心就痛到無辦法呼吸……

可能毒撚嘅幻想能力比較高，呢啲咁恐怖嘅情境真係三日唔埋兩日就會係我嘅幻想入面出現……

不過係呢一日嚟到之前，我覺得我仍然可以繼續為chloe做任何事，用我嘅心意去打動佢……所以第二日，我繼續為咗打動佢而出現係chloe樓下……

「仆你個街，落嚟未呀？」我以為約得遠遲到就話啫，連落樓下都要我等10幾分鐘……（不過我人生等人嘅記錄將會俾阿靜所破。）

「得啦，而家落啦。」





如果大家話因為佢要化妝所以先攪咁耐，咁你就錯啦。識佢咁耐，佢係從來唔化妝，素顏已經迷死唔好人嘅生物，所以……都唔知好事定壞事……

佢一落到嚟，我就將隻史迪仔「隊」去佢塊面到，真係好彩佢冇化妝啫。

「頂你咩，我副眼鏡呀！」佢定一定神，望到隻公仔就話：「吖，好得意呀！！」仲係咁鍚隻史迪仔。頂，我又要，鍚埋我得唔得呀……

「不如你拎返上屋企先啦。」

「唔制，我要拎住佢行街！」之但係你似同佢行街多過同我喎……

Chloe全程攬實隻史迪仔，無論我講乜都好，佢都要幫隻嘢配音咁嚟答我，嗰刻我以為自己買咗隻真正嘅狗俾佢玩……

《我唔可以強迫你鍾意我，但你都唔可以迫我放棄你……》