一次無心嘅表白，竟然令到佢同咗我一齊: 第四章

第二日，我約咗同為我同chloe嘅好姐妹嘅hailey陪我揀禮物。

係西九龍中心行咗2個幾鐘嘅我哋，仍然得個行字……仲要似係hailey睇嘢多過我揀禮物……

「點架，你諗到送咩未架？」hailey開始有啲唔耐煩咁問。

「其實我想將自己綁個大蝴蝶結送俾佢架！」

睇嚟hailey連應我都嫌哂氣，直接白咗我一下眼當回應咗我。





「啊，你估送史迪仔嘅毛公仔得唔得丫嗱？」

「細隻嘅佢已經成張床都係，大隻嘅佢又唔收得，你話呢？」

「咁你送咩呀，不如我俾一半，當我哋夾份送算啦！」

「嘩！唔似你喎！chloe生日喎，你唔自己一份咁送？死咗心定有絕症？」

俾hailey咁講一講，我醒起每年chloe生日，我都會為咗想佢保留住我自己嘅一份心意而堅持唔同人夾份買禮物，點解今年我會講啲咁嘅嘢架……





「傻啦，點會有呢啲事發生。只係覺得都咁多年，我要做嘅都做哂，佢唔鍾意我，就算再送100樣我嘅心意都係徒然。」我發誓，絕對唔關個心有第二個事！

「其實我哋都講咗好多年架啦，係你唔聽咋麻，而家咪好囉，自己咁叻諗通咗啦。」

希望我真係諗通咗而唔係其他原因……

係兜咗幾十轉西九仍然冇頭緒嘅時候，hailey話：「算啦，我同你夾份送算啦。」

「行多陣先啦！」其實口裡說不嘅我只係諗緊如果真係同hailey夾份，咁我對chloe嘅感情係咪已經變咗……





係兜咗第唔知幾多次嘅公仔鋪入面，我俾隻同bb仔差唔多size嘅史迪仔吸引住視線。唔好問點解而家先見到。正常男性隔離有個女性，只要唔係太樣衰或者著衫太老土，都唔會專注到係其他事上！

「不如送隻毛公仔丫。」我腦海突然浮現起阿靜嘅說話。

「就送隻史迪仔俾佢啦！」

「唓，啱啱行咗咁多次你又唔買。」

啱啱嘅視點只係出現一個又一個異性嘅身影，我都唔想架……

「見唔到啫，而買都未遲丫。」

解決完我份禮物之後，我哋就各自返咗屋企。之後再同chloe三線咁傾佢聽日生日嘅行程，得出嘅結論係……去海洋公園……

咁即係叫我俾錢入去行啦……





第二日，我哋一早約咗係金鐘等再搭車過去。或者我修正下我嘅用字，係我一早係金鐘到等兩位大小姐，而佢哋一個係啱啱起身，一個啱啱出門。唔錯唔錯……至少個電話係打得通先。

由原本約咗10點，到最後攪到12點先入到場，我都已經俾佢哋嘅慣性遲到訓練到可以好從容咁對待……

如果你問我全日發生過咩事，我只可以答你，海洋公園嘅景色唔錯丫，啲路夠哂平坦，冇凹凸不平啊。鬼咩，我連兒童摩天輪都冇玩過，我除咗可以咁形容仲可以形容啲咩！

企到6點幾，佢哋終於好似小學生遊記嘅一貫結局一樣，依依不捨咁離開……

講咗咁耐，係咪發現我冇提及到份禮物呢，其實係因為我想另外搵日單獨約佢出嚟俾佢所以先冇帶出嚟，絕對唔係大家所諗咁唔記得帶！

跟住食飯糖水直落都同平時一樣，你食下我嗰啲，我又搶下你嗰舊，嬉笑打罵如旁若無人。基本上啲餐具都不分你我咁，如果我作為嗰件餐具，我會覺得如果平時係俾人強姦，今日係俾人輪姦。

就係我哋好癲咁玩緊嘅時候，我用咗一刻好認真咁望住chloe，佢嘅笑容，佢嘅聲線，佢嘅一切，我仍然咁在乎，我知道我仍然咁鍾意佢。同時亦都同自己講：「阿靜？幻覺嚟架啫！嚇我唔到嘅……」





玩咗成日，送完佢哋返屋企嘅時候……我竟然第一時間諗起阿靜……

返到屋企，第一時間上msn。

「今日同女神去咗海洋公園呀，真係玩得好開心呀（佢哋）……………………跟住頭先食飯，望住佢傻笑個樣真係好可愛呀，佢一笑真係將我個心都融化啦！！！！」

一打開msn，我就急不及待咁同阿靜分享。

「其實……呢啲嘢好普通啫，你都開心成咁，睇嚟你都好鍾意你女神喎！」

係，我係好鍾意chloe！至少而家都仲係………………！

《或者，可以同異性成為閨蜜，真的總帶著愛……》