一次無心嘅表白，竟然令到佢同咗我一齊: 第三章

係繼續劇情發展之前，先同大家交代下我同身邊啲朋友嘅關係先。毒矮Seven肥樣樣齊嘅我同其他毒向左走向右走最大嘅分別係，我身邊嘅朋友大多數係女性。唔知係我天生異性緣好定係跟本冇俾人當過係男仔。至於男性朋友，我極其量將佢哋稱之為玩嘅朋友。

其實我自問同阿偉只係識得耐，而且又係打機識，所以我真係冇乜必要理佢係咪對阿靜認真與否。但自從我日日同阿靜，momo傾計之後，每次阿偉搵我都不自覺有啲心虛……

今日，阿偉又打嚟啦……

「喂，你咁多女仔fd，平時點同佢哋打開話題架？」

乜同女仔傾計要諗話題㗎咩……





「做咩？」

「次次同阿靜傾計，佢都好似唔係點理我咁嘅……」

如果話你知佢成日同我傾計，仲好talkative呢……

「咁不如試下唔同佢傾計，等佢主動搵你啦！」

「咁得咩？」





得！一定得！係放棄佢嗰方面……

「試下先啦！」

「其實成日見你哋都企多過玩，你哋傾乜㗎啫？」

俾阿偉咁問兩問，突然嚇疾咗嘅我，唔知痴邊條線講咁句咁嘅嘢……

「傾電話。」





「講笑啫，我講女神生日應該點做好咋麻。」

「點解佢應你唔應我架……」

荒你唔係流口水流到出嚟面咩……

「放心啦，佢點會對我有嘢。」至少而家呢一刻唔會，遲啲難講！

「喂，呢幾日咪有個momo同我哋一齊玩嘅，嗱，一於我溝阿靜你溝momo啦！」

你條死咸濕仔，如果俾你見到佢msn張icon仲會唔會咁講丫嗱……仲要好似你皇恩浩蕩咁款喎！

「嘟嘟…嘟嘟…」

咦，有電話入喎。女神！？





「電話入，拜」尾音未落我已經cut咗阿偉線。

電話另一頭傳嚟我多年嘅好姐妹兼女神，chloe把聲：「喂喂，你諗住送咩生日禮物俾我呀？」

Hi Hi啦！我完全冇咗回事……但我保證，絕對唔關阿靜事，完全係因為我嘅記性問題啫！

「過兩日你咪知囉！」

「唓，諗唔到不如折現算啦！」

「好呀，你想要幾多斤？」

「咩幾多斤？」





「人哋燒陰司紙通常以重量計架麻。」

「食屎啦你！」

「唔好將你啲日常癖好拎出嚟同我分享，我冇乜興趣。」

「……」就係一輪互串嘅情況低下，又傾咗幾粒鐘電話。其實我同chloe識咗都有差唔多5年，我鍾意佢，佢都好清楚。佢唔會鍾意我，我亦都好清楚……所以我同佢一直處於佢形容為知己，我形容為觀音同兵嘅關係入面……

《我擁有其他人夢寐以求同鍾意嘅人親近嘅機會，但偏偏失去咗同鍾意嘅人親密嘅可能……》