【真人真事改編】《去年暑假，我在街上賣寬頻。》: 《去年暑假，我在街上賣寬頻。》（二十二）
６月２３日，星期六，端午節。每逢節日，沙田「城門河」都會舉行一年一度的龍舟賽事，觀眾人山人海，使兩岸平靜的行人單車徑頓成鬧市。浩哥認為海量的人群中有許多潛在顧客，莫失良機，派「我們」去附近工作。
「我們」的意思是，同一地點不只我一人擺街，會有一名新同事跟我行「孖咇」，地點就是「河畔花園」。而我不知道新同事是何方神聖，只知道他叫「趙志龍」，是浩哥以前的組員。
我乘搭８６Ｋ巴士前往目的地，本應在「河畔花園」站下車，預計在早上十一點到達，但司機竟然飛站直達總站新城市廣場，我問其原因，怎料他回答：「今日爬龍舟嘛，唔停呢個站啊，你唔見車站貼哂告示咩？」心想：「大檸樂！今次真係出師不利！」
下車後，立即穿過商場，走下地面，經沙田鄉事會路往對面河走，沿途已見兩旁人氣熱鬧，我不禁加快腳步。然而，背著背囊，左手拿著兩支旗，右肩掛了裝著紙壇與摺櫈的大環保袋，負重起碼十五六公斤，總不能健步如飛，加上天氣炎熱，實在有點吃力。
幾經辛苦，終於來到了據點「河畔花園」，老老實實，我覺得這地點名改得不太貼切，因其位於「河畔花園」與「沙角邨」交界，那地下行人隧道的交匯處。此處是十字路口，四通八達，如果附近居民想步行到新城市廣場，這可謂必經之地。
到了十二點半，還未見新同事蹤影，看來我組有人繼承Ｌｅｏｎ「遲到王」之美名了。
「Ｙｏ！小ＤｅｅＤｅｅ，我嚟幫你開單啦！」面前與我同樣裝束的年輕男子，就是趙志龍吧，看他金啡色的頭髮，必定未有熟讀員工守則了。雖然其五官端正，皮膚白晢，有點兒像香港唱作歌手「王梓軒」，但是個子不高，頂多只有１６８ＣＭ，心想：「你矮我一個頭，有資格叫我契弟咩？」
「Ｙｏ！你一定係龍兄嘞！浩哥話你今日第一日返工，多多指教！」對著未來一起共事之人，總要顯得客客氣氣，尤其是經驗比你多的，因為許多時都要徵求他們的意見，即使對方實際上大我三年，但看起來比自己還要年輕一些……
「偉仔ＤｅｅＤｅｅ，頭先你講嘢太慢啦，仲有你語氣太單調，夾唔實啲客啊！」「哦！真喺？我真係冇咩留意。」「哈！你啲新人係咁㗎啦，一陣等哥哥示範一次過你睇啦！你負責拉個客過嚟先！」志龍對我指指點點一輪，然後繼續坐在我的摺櫈上玩手機，吹著小風扇，沒法子啦，前輩在擺架子，自己唯有扮扮傻子。
好不容易拉到一個客過來，志龍不待我介紹一句，便立即放下手機，面帶笑容對那阿叔滔滔不絕：「老闆你好！等小弟幫吓你！請問你而家用緊咩公司上網？」「『友善』寬頻囉！」「嘩，阿叔你係咪講笑啊？今時今日仲用『友善』寬頻，全香港人都知佢最唔『友善』㗎啦！用咗之後你Ｃｕｔ唔到都似！」「係囉，想轉好耐，我個仔話成日斷線！」
「嗱，睇你成個好爸爸咁款，介紹返個１０００Ｍ速度上網連電視嘅Ｐｌａｎ畀你同令公子吖，你個仔就可以打機同做功課，你就有７０個電視台睇，一舉兩得！簽兩年約，只係每個月＄２７８」「我個仔好乖，剩係讀書唔打機，同埋我又唔睇電視。」「哦！咁唔緊要吖！５００Ｍ速度Ｆｉｔ哂，你唔睇電視，可以做到送條電話線畀你！簽兩年約，每個月＄２２８！」「係唔係最平呢個價先？肯定每個月交＄２２８唔收多？」
「唔係最平啊，我仲平啲都得啊！我哋公司有優惠畀你地屋苑，減你月費，本來私人樓我哋只係最多免兩個月，你而家即刻登記，我做到免四個月畀你，仲送埋＄３００『萬靈』現金劵過你太太買護膚品，即係平均＄１７８一個月咋！」「嘩！咁抵？咁我就要呢個Ｐｌａｎ啦！」
報單完畢，志龍奸笑道：「嘿嘿，學到嘢未啊ＤｅｅＤｅｅ？」我便分析道：「你一開始唔講最平最慢嘅Ｐｌａｎ出嚟比個客知，又唔講有咩優惠，反而Ｓｅｌｌ最貴個啲Ｐｌａｎ先，之後一路套個客啲家庭背景，慢慢同佢討價還價，幫佢選好服務，最後先講有咩優惠ＫＯ個客，勁！」志龍真的有兩下子，想必身經百戰，嚴謹的策略配上流利的口才，加上對客人察言觀色，又懂故作親切，遇上一般人問價，可謂「實食冇痴牙」！
「不愧係大學生，你分析得好啱！之不過我頭先見你Ｓｅｌｌ客，一開始就講哂啲最平嘅計劃出嚟，又爆哂有咩優惠，有咩贈品，萬一個客覺得你唔夠抵，咁你點走位啊？……仲有啊，好似你咁Ｓｅｌｌ平嘢法，就算畀你開到兩張１００Ｍ，都唔夠我頭先一張５００Ｍ高佣金啦，ＤｅｅＤｅｅ！」我唯唯諾諾地點頭稱是：「又係喎，多謝龍兄教路！」怎料他又奸笑：「嘿嘿，唔洗多謝，頭先張單係入落我個名嘅，不過教識你Ｓｅｌｌ嘢你都有賺啦！」我「Ｏ」了咀……
雖然，剛才那張單不入我袋，但志龍的銷售真令我大開眼界，學到了不少鬼鬼馬馬的技巧，給他作端午節禮品實在值得！
【 這一刻
這一刻
哪可轉彎
我加單
再加單
已將所有抵押
跳這火坑
〈跳火坑〉 王梓軒 】
Facebook專頁: 大雞小事 ( https://www.facebook.com/bigchickenlittlethings )