【真人真事改編】《去年暑假，我在街上賣寬頻。》: 《去年暑假，我在街上賣寬頻。》（二十一）

　　「阿浩，我對你唔住……但係……但係今日我真係陪咗阿媽去醫院，佢突然間喺屋企暈低咗，我送完佢去急症室之後已經盡快去開工……」Ｌｅｏｎ嗚嗚咽咽。「我知啊，其實你女朋友打咗嚟同我講，伯母佢低血壓暈咗啊嘛，好彩醫生話佢冇咩大礙。唔緊要喎，今次我明白你，家人梗係比開工重要啦……」浩哥拍了拍他肩膀道。
 
　　「唉，我前幾日真係好畀心機㗎啦，兩點開工，我一點就到咗開檔，但係我真係開唔到單，企嗰啲位一個人問價都冇，想Ｓｅｌｌ都冇得Ｓｅｌｌ……」Ｌｅｏｎ唏噓地說。「冇計啦，其實我都有少少責任，爭取唔到啲好位畀大家……」浩哥感嘆。
 
　　「浩哥，關你咩事吖，講真我哋新Ｔｅａｍ成立冇耐，點樣同其他Ｔｅａｍ爭位啊？你肯帶我哋入嚟做已經算好㗎啦！」嘉寶安慰著浩哥，而我不知可以說些什麼。記得上年「２０１１人口普查」完結後，與十幾個戶外統計員隊友分別，是多麼依依不捨，然而，這是我第一次經歷工友中途撤職離去，除了不捨，也感到幾分悲哀，原來社會是多麼的現實，多麼的殘酷……
 
　　「之前賭波輸錢，借咗你嗰兩萬蚊，我會盡快還畀你，放心，有拖冇欠，我唔係嗰種人……」Ｌｅｏｎ也抓緊浩哥的雙肩說。「唉，都識咗十幾廿年，講呢啲做咩吖？伯母睇病可能要洗錢，慢慢還啦！」浩哥此言真的有情有義，我完全從他身上感受到一份義無反顧的兄弟之情。
 
　　十一時十五分，我們各自離開大圍集隊的傷心地，帶著疲憊的身軀回家，馬鐵途中，浩哥短訊說我明天可以放假，但想了一想，放假待在家中也沒事做，不如趁著今天開單的勢頭，於這兩三天再下一城，便回覆自願不放假，他當然無任歡迎。
 




　　於是，６月２２日，星期五，我重踏沙田區，在廣源邨擺檔，位置就在那巴士總站旁，通往邨內的石梯出入口。以前外婆跟舅父一家住在此邨，小學時候常常來探望他們，跟表哥到那石地足球場玩，故邨內面貌，今日還有記憶。
 
　　一開始我把攤檔安置在石梯下有瓦遮頭處，怎料立即有身穿制服的人來驅趕：「阿哥哥仔，你見唔見到個告示牌話呢度『嚴禁小販販賣』？唔該你移返啲嘢上去路邊。」一看名牌原來是「領先」商場管理公司的職員，我有禮貌地回應：「阿叔叔啊，我唔係小販喎，我係嚟帶「特選公屋住戶」上網優惠畀廣源邨居民㗎，條路咁闊，我泊埋係牆邊咋喎，上面咁猛太陽，畀我係度擺遮吓陰都唔得？」他沒聽我講完，已搖頭揮手，不屑一顧的示意我過主。
 
　　哼！這兒也算屋邨公共空間，我也沒有阻礙行人出入，也不用這麼不近人情吧！不過也難怪，不少屋邨小商戶已被他們扼殺了，如今我一個推銷寬頻的後生仔，又怎麼可以與之對抗呢？縱然不情願，但我唯有把壇移至石梯上近巴士站的路旁，然而頭頂被太陽曬得正中。
 
　　烈日當空，汗流浹背的我快要中暑，不得不到商場Ｍ記買杯夏日特飲，然後到文具店買膠紙，做這行幾乎一星期消耗一卷，用來固定易拉架與攤位，所以要定時入貨。
 
　　廣源邨商場的設計於可謂別具一格，仿「英國組磚小鎮」建造，有一種古典美，當中還有一個「鐘樓」地標，好像還拿過什麼建築獎的。我買膠紙後欲往中層廁所洗面抹身，奈何男廁正在維修，只好等待「傷殘人士廁所」內的用家快快出來。等了十五分鐘，門終於開了，但走出來的竟然是兩個金髮的「ＭＫ仔」？心想：「唔係咁『基味濃』啊？」
 




　　但細看他們手中拿著Ｍ記紙袋，神情恍惚，唇色蒼白，嘴角還好像有些粉末，大概就估到他們在殘廁內「進餐」了，看來他們真的很喜歡「吸鹽」呢！但可不可以回家才吃啊？日光日白竟敢在公共設施開餐，難道在廁所裡吃會更香更爽嗎？他們用凌厲的眼神怒視我幾秒，像要暗示我不要多管閒事，然後大搖大擺離開，旁若無人，說真的我有點兒「淆底」，不敢與之正視。
 
　　回到壇上，仍覺心有餘悸，如果我一早發現他們的活動，應該是要告訴警察叔叔的。經過這兩天，我覺得自己真的入世未深，見識太少，而對公共空間的「定義」與「運用」，也有著特別的領悟。
 【　舒適的溫室
　　那是誰的家 
　　如幻覺的浮華
　　延續的都市神話 
　　真與假
　　住進山頂寫意喝啖茶 
　　把憶記拆下了

　　換來煙花
　　
　　〈圍城〉　Ｋｏｌｏｒ　】
Facebook專頁: 大雞小事 ( https://www.facebook.com/bigchickenlittlethings )