【真人真事改編】《去年暑假，我在街上賣寬頻。》: 《去年暑假，我在街上賣寬頻。》（十三）

　　明明我已照浩哥所言，按部就班地推銷，為什麼下午三個問價的客人，依然不願即場登記呢？我真的摸不著頭腦，一時沮喪起來，坐在摺椅上發呆，思維空白一片，直至入夜。
 
　　「師弟，Ｈｅｌｌｏ，咁夜仲未放工嘅？」一把開朗動人的女聲喚醒了我，面前這位嬌小玲瓏的女生，原來是我中文系的雪兒師姐，我立馬起身道：「咦，師姐，乜你又係住附近咩？我呢份工返下午兩點至夜晚十點㗎，仲有三個鐘先放得啊！」「嘻嘻！我中學同你一樣喺禾輋邨㗎喎，中學嗰陣成日同你搭同一架４０Ｘ巴士返學，乜你未見過我咩？」雪兒師姐大我一年級，像她這般可愛標緻的女生，天天同車上學，我竟然沒有丁點兒印象？「吓，此話當真？我喺Ｏ Ｃａｍｐ嗰陣知你係讀『曾記』囉，事關我組媽肥珊咁啱講開中文系有咩沙田區嘅朋友，佢又係你中學師姐。」
 
　　「哦，係啊，肥珊係我好佩服嘅一個師姐，佢攞Ｆｉｒｓｔ Ｈｏｎ畢業囉，真係好叻！你嗰陣就梗係冇留意任何人啦，次次搭巴士見到你都拎住本厚厚嘅中文書嚟睇，我心諗你一定係讀文學科嘅同學仔，點知你後來真係做咗我大學師弟喎，嘿嘿！」說來也是，中學時候，我也算是個手不釋卷的人，平時最愛看些古典長篇小說，《三國演義》、《水滸傳》各看了三遍，文言文的功力就是這樣累積下來了。上學放學車程頗為長遠，我愛開著當年的「潮物」──ＭＰ３機，一邊聽著日文歌，一邊看著中文書，亳不浪費時間，雖然不懂日語，但日文歌的旋律頗合我口味，還記得那時候最愛聽中島美嘉和ＹＵＩ呢！
 
　　「嘩，乜我哋原來咁有緣？哈哈！係呢，話咁快你又Ｇｒａｄ咗啦喎，而家搞緊咩啊？啱啱放工啊？」「係啊，喺政府到做文職，做咗一個月有多啦，穩穩陣陣咁囉，你知我哋讀中文出身嘅，唔係做老師就係做出版，唔係做出版就係做公務員多㗎啦，點似阿偉你咁多張刀，連Ｓｅｌｌ寬頻都做到吖？」其實，我從來沒想過當老師與公務員，雖工作薪酬穩定，但其性質於我來說始終較為單調，所以還是想接受其他挑戰。
 
　　「我鍾意體驗唔同工作姐，中文系嘅人都知我一向『騎騎呢呢』，哈！不過呢幾日企街都企到灰灰哋，一張單都開唔到，搞到我都冇心機食晚飯，唉！」「唔唔，我明白，不過萬事起頭難，邊有人一開始就識飛吖？我知你對自己要求好高，但係慢慢嚟啦，我知你得嘅！唔好唔食嘢捱壞身體啊！知道冇？」雪兒師姐真是一個貼心的可人兒，中文系的女生就是這麼溫柔友善。
 




　　「多謝你啊，雪兒師姐，我會加把勁，你都快啲返屋企食飯啦！」「記住買少少嘢食頂肚啊，拜拜！」本想聽從其言，到頌安邨商場吃個「頹飯」，但正當我收拾好背包準備起行時，雪兒師姐又出現在我面前，並送上了「麥記」的外賣套餐，說道：「放工時間多人經過啊！你坐喺度食漢堡包同薯條，咪唔洗驚啲客人搵你唔到囉！我係唔係好聰明呢？呵呵！」我一時感動得說不出話來……
 
　　待她背影漸遠，便於天橋底下吃著漢堡包，每一口都讓味蕾嘗出點點正能量來，而每根薯條也是一個熱情的祝福……
 
　　最終，我開了一張單，２０１２年６月１４日，晚上九時半，我成功開了人生中第一張單！
 
【　事過境轉
　　人物錯亂
　　彼此生活圈
　　一天天旋轉

　　年華還要轉圈
 
　　〈天橋交匯處〉 吳雨霏　】