【校園】【微甜】三日兩夜生前死後的宿營: 宿營外(2)-4: 重拾自信
時間回溯到我地係山上碰頭果日⋯⋯
「小雪，不如甘，我同你一齊上台表演！」我向她甘樣提議，當然她嚇左一跳。
「點得加？報左名既人只有我一個，而且就算係加多個人都已經截左止！」
「所以我咪討厭班會，總係臨到最後一刻先黎做野，想改都無得變！不過唔緊要啦，反正你都無打算攞獎！」
「咦？你點知？」她好似被踢爆好事，雙手掩口雙眼放大，我估她被手遮住既口都張開好大，總之她既反應太搞野，我忍不住捧腹大笑。
「哈哈哈哈！會認真表演既大概只有一年級，到我地呢D『前輩』基本上都係隨便做加啦，睇班死八婆就知，明知你已經無再練琴卻強行推你上場就明白啊！」
「原來係甘.......？」她好似唔太接受我既講法，其實我都係扯淡，是但啦！
「一開始你先表演小提琴，揀首慢曲又易拉，不過首歌淨係拉一半，就算拉得幾難聽幾奇怪都唔緊要，跟住你係最高潮一段小節停低，我就躲係後台播首hip hop歌，然後我就走出黎跳舞，而你就跟著節奏配合下。」
「跳舞？講起上黎你好似識得跳舞，d同學都讚你跳舞好勁，不過你唔係因為比寶輸左而放棄，定係話比人搶左個位發脾氣而被人炒魷？」
「咩鬼傳言黎加？我係自動退出加！仲有我無放棄一直有練啊！！」簡直氣到我噴火，亂七八糟，我有好好繼續練習啊！
「但係你無啦啦係後台走出黎，唔會好奇怪？」
「有咩關係喎？今次我同你都豁出去，我敢保證以後無人再為難我地！」
「真係？」她半信半疑，會甘諗都好正常，畢竟我就甘講，的確有好多漏洞，因為最關鍵既我一字不提，但係先做好上台表演呢單野先。
「之後既事就交比我，你只要上台做個開場就可以！」
她猶豫左一陣，下定決心點頭：「好！一不做兩不休，而且好似好好玩，小雅，多謝你！」
我最初都唔知自己點解甘大膽，而她竟然又接受我既提議，一切都跟住劇本走簡直係前所未聞，總之我地開始安排表演既歌曲同練習直到那天，表演開始！
然後去到重頭戲⋯⋯
我一按播放掣，攞住咪高蜂對住喇叭，熱情激烈既流行歌毫不留情直衝台下觀眾耳膜，訓著左既都被嘈聲嚇到清醒哂，我故意係布幕留多陣，深呼吸，向小雪打個眼色。
她大聲喚︰「大家拍手一齊歡迎特別演出！」
台下大部分人都係鍾意睇熱鬧，連忙高聲歡呼拍手，當氣氛去到最高點時，我打側手翻再原地三百六十度轉三圈，登場！
歡呼鼓掌聲令我想起當初係演唱會伴舞既感覺，我跟住音樂旋律跳出最熱情蹦放既舞步，而小雪也跟住歌曲伴奏，下面既同學跟住拍子拍手，我突然覺得，好開心好輕鬆！好似上台表演，儘管當時我只係旁邊，不過紅花仍需綠葉襯托，無論主角演唱既再厲害再出眾，無我地伴舞幫手依然唔會high足全場，最重點係，我居然忘記左當初沈醉音樂，動用全身體表達果種激情和感動！
短短四分鐘，忘我地跳舞，直至音樂停止，我企係台中心大口大口喘氣，全場既歡呼掌聲都係屬於我地！小雪也不管儀態衝過黎抱住我︰「成功左啊！」仲要係我耳邊尖叫，差D耳鳴，但係一事歸一事︰「太好啦！」我緊緊回抱她，隔左一陣後我地握住對方既手舉起鞠躬謝幕，完場！
表演完美順利落幕，先講下表演結果。
因為我亂入既關係，小雪取消左表演資格，不過同學們非常不滿，最後校方臨時頒左一個最受歡迎獎比我地，可喜可賀！
表演完左之後我隨便支開左小雪，走到班會八婆面前，我剛剛見到她時一面悔恨，如意全盤打亂的樣子，我就知她本來對小雪無期望，隨便送她去火坑，等她失敗後再難為她，但係她呢個表情我倒係睇得津津有味：「活動有好好表演真好，今次真係多得小雪，你話係咪啊？班會主席。」
她變面技術接近到國家級，可是有待改善，皮笑肉不笑，而且話語反改濫好人的聲線：「最衰都係你！明明最有望冠軍都變左豬肉獎！」
「原來你有指望過我班會攞獎，簡直係神算少女！不過好彩上台果個唔係你，唔係既話豬肉獎都無份，因為今次表演有位好特別既嘉賓！」
連演戲都省去，她神情慌張望著我，變面技術一下子提升到國寶級，究竟咩事令她甘驚青？
「今年台下有個特別評審，係我地舊師兄嘛，他啊，係我朋友堂哥既朋友，所以我知道你地既關係，無諗過你居然為左搶走佢而使出各種暗盤手段，搞到人地差點就分手！」
「你⋯⋯亂講咩？！」
「證據我有啊，就係我手機裏面，你瞪大眼睇清楚！仲有我已經back up左去雲端，就算打爛我手機都無用。」我攞出手機，有偷拍既相片同短訊內容，她即刻面色蒼白睇住手機。
我朋友，其實姐係小雪既堂哥既好友，半年前幫呢個班會主席補習，而女方對男方一見鍾情，經常有意親近男方，幾乎去到騷擾既地步，當時男方因女方太過纏繞，甚至影響他生活和身邊既親友而差d鬧上警局，最後係她口頭承諾唔再騷擾他，男方亦同情女方年輕唔懂事而網開一面原諒她，並且完全同她斷絕關係，事件先不了了之。
雖然事情已屬過去式，但係我有意傳出去，以我地學校既八卦口風，唔使半日應該已經全級通曉，三日內必會驚動校方，到時她一定在班裏失去容身之地。
「其實我對你既事一丁點兒興趣都無，不過麻煩你保證以後唔好再搞暗盤，或者搞分化！」
班上既情況，姐係小圈子既環境，我知道係關呢個女人既事，所以我一直都好討厭她，本來我係一副事不關己hea下既態度，不過今次事關好友我決定唔再袖手旁觀，一併解決晒所有事情！
而且多得小雪，我搵番最初跳舞既喜悅和熱誠，我決心唔再逃避！
不過到我再次真正踏上屬於自己舞台果陣，已係中五既時候，到時我既好姊妹小雪仲搵到男朋友，替她高興到嚟唔切！
她仲成日擔心我會單身終老，我就話她操心過多，嘻嘻嘻嘻！