【校園】【微甜】三日兩夜生前死後的宿營: 宿營外(2)-3: 文化週活動

每年有一星期叫文化週，大概就係學校活動不過重點係其中一個活動係要全校參加，正確而言係全校每班其中一個同學要上台表演才藝，總之就係無咩自願參加，然後被推上台參加做祭品既，就係小雪。

我無記得被揀中既她果刻面青口唇白成個人受到好大打擊，我於是反駁班會：「等等先，她今年轉校入黎咩都唔知，無理由比她表演？」其實我早就睇唔順條八婆，她一定係故意比小雪參加，點知條八婆話：「甘你上台都得加，反正你跳舞甘勁。」
她明知我退出左跳舞隊仲刻意講呢d，你話她無心我一丁兒都唔會相信，可能小雪見我猶豫不決，她主動圓場：「小雅，唔緊要，我上台啦。」
但是你隻手係震緊啊！
「唔怕啊，我知小雪你有學過小提琴，一定無問題，交比你啦！」班會仲故意拍手裝作係歡迎鼓勵，超做作好無？
但是我都無聽過她識拉小提琴，依加只見她坐返位低頭無理任何人做自己野。

放學之後她要繞遠路買野唔跟我一齊走，雖然無話每日都約好左一齊走，有時甘岩放學大家都無野做又順路去等車就會一齊走，我本來都無野做她走左之後我打算返屋企，突然間我靈機一動，諗到她話繞遠路，唔通係上後山？





我無估錯，上到山之後係一棵樹下見到她，我本來想向她打招呼，我覺得自己應該係班裏比較熟她既人，但係今次無打機而係聽歌閉目，完全沉醉於自己世界，我估要拍她先有反應，於是我便等她靜靜地休息下，過左大約一個鐘她終於放低耳機但係發現她喊緊。
「啊！！！！」完全係爆喊大叫，搞到我既存在變得好尷尬，上前定留守？

呢個時候我既手機不合時宜響起，大聲到耳聾都聽到，更何況面前那個人唔係耳聾，她嚇到即刻收聲，但是無即時回頭望而係擦一擦淚痕先轉頭，本來我想藏起自己又不自覺地定格無動，四目交投之際，講d咩好？
...................
好啦！花左一秒考慮後，我走近她身邊坐低她旁邊拍拍她膊頭，她好似受到安慰，低頭靠在我膊頭細聲泣哭，我唯有讓她先發洩出來吧！

過左大約另一個十五分鐘後......
「我堂哥以前住呢頭......依加？搬走左啦！而且新年先會再見，細個會跟住佢周圍玩，呢度都係佢帶我黎，不過無甘多圍籬鐵絲網就係，而且風景都唔同左好多啊！但依然都係甘涼爽同無咩人上黎打擾......原來你都認識呢個地方，早知我唔收收埋埋！話哂有網包住就無咩人願意上去玩，怕有人多事累到我以後無得黎......你問我做咩喊？......小雅你唔好周圍同人講啊，你知道我點解轉學？」





我靜靜等她喊完然後她開始解釋比我聽我想知既野，本來我凈係想知她點會知呢個地方，不過她突然反問番我，講起她轉學既原因，我係一無所知，只係大概聽過她係靠關係入黎，係呢種唔清唔楚既情況下於是我搖頭。

小雪欲言又止：「......睇黎學校都幾守得私隱，係甘既......」
她以前間學校都有小圈子，然後，好典型又無奈既，因為矮細關係而遭人欺負，後來變本加厲，直至係她既食物落藥，結果要洗胃請假一個月而揭發事件，她話最初試過同老師商量，可是都是大事化小既態度，後來就轉校過黎。
她就講到長篇大論，我就抽出重點作過程結尾，講講下她又眼淚汪汪，我拍拍她膊頭靜靜安慰著。

「......小提琴我的確有學過，不過小學之後就無再學，覺得呢樣唔係好岩我，我都唔知班會係邊度發現......我無信心可以好好表演，畢竟唔係我專長，更重要係我討厭上台，有好多人望住我，我會超緊張，當初樂器表演我都驚到拉唔到小提琴，手腳係甘震，連第一段小節都拉唔到，結果一開場就靜左接近成分鐘，好彩有人係我旁邊伴奏我先無甘驚，雖然伴奏果個人係我老師，不過我都只係夾左兩次就上左台表演，簡直係有驚無險！」

「果時我仲記得心臟係甘跳動好嘈好響，我覺得好辛苦，個個人既視線都集中係我身上，超級恐怖！！今次文化週我好怕，無咩信心。」





「你去同班會講啊！我早就睇唔順班八婆！佢地一定係故意！」

「唔好甘樣話同學啦！畢竟有緣同班，而且本性應該唔壞⋯⋯」

你係濫好人嗎？佢地好明顯就係推你落火坑！不過我甘講她可能都唔信，要過左一段時間先摸清楚班人既性格。

「你會上台？」

「會，只係好怕大家只係望住我一個，不過我都想改變自己呢個缺點，我想試下！」她講完又低頭沈思冥想，我望住她有點失落無助的樣子，心裹突然想到一個法子。

雖然唔係最好既辦法，不過我對自己有信心，呢個方法可以還以顏色！
老實講，依加諗番起，當初我會有呢個想法簡直係怪異，本來我同她只有認識左一星期，點解要幫到她甘盡？而且呢個方法也太奇怪吧！

可能當初我只係想搞大件事，仲有，我想比班八婆知道，我無佢想像中甘好蝦！





「小雪，不如甘⋯⋯」我向她提出我臨時想到既計劃。

於是過左兩星期，食完晏就飯之後，表演時間開始！

小雪她係後台攞住小提琴等著，好難得一見她著住一條素粉紅色長裙，白色尖頭高跟鞋，而且化左淡妝，望落比以前成熟知性，有種仙女下凡既感覺，企到台上打亮燈更加係令全場眼前一亮！

如果MC無介紹她咩班咩名，大概同班既都唔知呢個人係小雪，甘當然啦！個妝係我化加！證明我水準幾高XD！

依加重頭戲黎啦！我靜靜地溜去後台，攞住一台光碟播放老爺機，躲係布幕後面，等小雪開始她既演奏。

只係她緊張到咩都唔記得，淨係握緊手上既小提琴唔動，我話小姐，你起碼都夾住部琴先啊！好似心靈感應她終於提起手，小提琴放係膊頭上，深吸一口氣，然後慢慢拉奏，台下突然鴉雀無聲，雖然比之前聽她練琴慢左差唔多一倍，但是音色比果時好聽左三倍，唔通係因為古典歌都應該係慢曲？總之表演出乎我意料之外！

睇到台下既反應我心滿意足⋯⋯其實無甘誇張，畢竟接下來先係戲肉啊！

就當全場都沈浸係小雪的音色（有d因為太過陶醉或者唔識欣賞而唔小心訓著左）之際，她突然停左！靜左十秒，台下一頭霧水交頭接耳，我知道呢個停頓就係信號，於是我按下老爺機既播放掣！