【校園】【微甜】三日兩夜生前死後的宿營: 宿營外(2)-2: 大胃夜貓打機

第二日返到學校就見到大一群自成一群既小組，同埋自成一角既小雪，她靜靜地睇緊書做筆記，我放低背包走近她，點知行唔夠兩步無啦啦有個同學貼過黎我：「小雅，你睇左娛樂新聞未，超級新星『丁丁』首次舉辦演唱會，你會不會有可能有飛攞？唔該你啊，用以前既關係幫幫手，我真係好想好想睇啊！」
「我依加好少入舞台，未必有機會攞到，抱歉啦。」
「真係一d辦法都無？」
我暫時唔想係舞蹈團露面，同學見我無辦法就灰溜溜走開然後同她既朋友七嘴八舌，周不時瞪著我細聲講大聲笑。

嘛！睇佢地眉神眼色大概內容我都估到，就係講我唔願幫下手又無同情心只係管自己云云，總之就係踩低別人抬高自己錯不在我之類廢話一堆，再望向小雪果位發現她不在，我唯有坐低等另一個休息時間再搵她。

結果唔使等休息時間，我係轉堂轉課室既空蕩時間見到她，好似因為她去左洗手間而錯開我地集合轉課室既兩分鐘，而我碰巧倒轉個袋都搵唔到我教科書果陣發現原來塞在係我抽屜，我抽番本書出黎準備離開同她撞到正一正，她望住空空如也既課室好似嚇親，但係見到我手上書又鬆口氣，睇黎她想唔起今堂要走課室，於是我同她講：「我地依加物理堂，你快d去攞書轉堂。」

對於我既說話她明顯係嚇一跳表情好似話我知點解會甘好人提我，我有其他事想問她裝作無注意*速她快d，之後雙雙走向物理室，唔係，她總係走在我後面並距離一個身位既距離，甘難怪她會人疏離，我暗暗嘆氣故意走慢點與她並排順便試探下她：「我琴日經過一條小巷見到一個好似你既人，你係果度做咩？」




小巷係要入山路既唯一一條小路，但係她微笑道：「會不會係認錯人？」

居然裝唔知，不過我甘樣試探人都無話反駁，雖然我只係想知她點解會知道個小山，但係她唔想比我知都無計，正如果度就等於我既秘密，話唔定果度都有對她唯一既意義，於是我就扯開話題：「物理堂好悶，我諗過兩次都知，個老師講書好單一，我覺得返屋企複習仲快。」
「係啊？難怪我上次上堂差點瞓著，仲以為係前一日瞓唔夠。」

原來係隻夜貓，黑眼圈唔係作假既，不過企係她隔離發現她比遠睇既瘦，可能係因為她仲著住件冷衫，把所有睇到既都遮到睇唔到，平時究竟有無食野同做運動加，比我仲要矮半個頭，「有時我會直接瞓係枱面，反正個老師唔太理會呢d野，總之唔好唔合格就得。」
「甘唔係幾好，畢竟我物理超差一定會唔合格。」
「甘大件事……其實無你想像中複雜，最近教都係較易既野，我仲記得第一章……」
我都真係無咩話題講，點解好講唔講，講我最差果科！
我其實都無咩偉論同她解釋都係扯談，反倒係她津津有味聽住我話，最後只好收尾話都係隨便講下就入課室上堂。





依然都係觸摸不透既人，不如試下午飯一齊食？

晏就我見她攞住銀包走就知她唔係帶便當食既人於是我都攞走銀包跟住她：「小雪，去邊度食，一齊可以？」
「……可以啊，但係你既朋友……」

我係我班朋友搵到我之前強推她離開班房出街搵食，都係一D損友食少一兩次唔使死，我地學校既學生唔帶便當食就要出街自己搵食，「你通常去邊度食？」
她指指最近學校係正對面既三間餐廳，一間食面一間茶記一間快餐，勝在夠平夠近但係好易無位，不過自己一個食既話隨便搭張枱食完就走又係幾方便。

今次我帶她繞遠路，去一間西餐廳食飯，有學生優惠又大份有湯有沙律有野飲，我估她一定夠食，果然她見到超多野食好激動，左手飲湯右手食意粉，好似成個星期無食飯甘：「小雪你係屋企都係食甘多？」

無諗過她搖頭，口裏面仲食住餐包邊答我：「我媽平時好細食，我爸又成日開夜班唔返黎屋企食晚飯，她就會淨係買一個外賣然後兩人分食，我成日夜晚都好餓，屋企又無零食宵夜用，所以晏就要食番夠本。」

唔怪她甘瘦，宵夜最容易令人發肥，而且食到好似一餐有一餐無甘，我於是推左盤沙律係她面前話我食唔哂比她食，她多謝左我十次之後毫不留情秒殺，然後其他食物都剛好廿分鐘食唒之後飲住杯餐飲再食飯後甜品，而我叫左少意粉走湯都剩下一半，甜品都食唔落送左比她食，她食住甜品話：「唔好意思食得甘慢，你等我一陣。」

的確唔係特別驚人大胃王既速度，但係以甘樣既份量而言都算係快仲要話自己慢我都無言，唔好意思話係我硬推d食物比她，否則分分鐘我仲慢過她，不過見她一臉滿足既樣就等下無妨 ，埋單之後我地並排而行，她話:「你介紹既餐廳真好，我又多個選擇，多謝你!」
滿面笑容好開朗，完全想像唔到係琴日見到同一個人，她突然拿出手機低頭望，望到手機既通知欄怔著，好似見我係旁邊於是她收起手機又若無其事對著我，但是見她坐立不安，我估可能係d重要事所以我話:「你覆左手機先啦。」
「啊，唔係有人搵我，係遊戲通知。」

遊戲通知?咩東東? 啊!係琴日我聽到電子音既遊戲?

可能見我一面興趣她取出手機打開遊戲程式，我見到係一個戰鬥攻略遊戲，背景音樂正正係我琴 日聽到既，「點玩加?」
她試玩一次比我睇順便完成她既每日附加任務，大概係同其他玩家組隊 然後用槍同劍攻擊迎面而來既敵人然後攞禮物升級，亦都有個人賽，她比我睇既就係個人賽，因 為個人賽既得失唔會太影響大隊成績，她甚至借我玩左一次，竟然甘都比我過關。

我忽然覺得， 好似都幾好玩!




「你都覺好玩呢，其實打機好正，早兩日我通關......」

她突然興沖沖滔滔不絕講到昨晚打機打到唔夠訓就係為左升上排名攞左咩咩超級武器，我當然係聽到一頭霧水，雖然我唔係性別歧視只係無諗過女仔都可以打機打到呢個地步。
「......為左個水聖劍我打到就死，好彩最後都換左一把，然後我甘就賺左五千蚊，真係超爽！」
果然我都係聽唔明......嗯？有錢銀袋？無聽錯啊！
「你話有錢賺？」
「嗯！把武器升級完賣出去賺更多，可惜我唔夠能力升級，不過係活動期間多人要搶手，打鐵要趁熱熟！」然後仲話想用筆錢買電腦配件，搞到我有點興趣想玩埋一份，等等問下她遊戲名稱。

唔經唔覺同她相處左一星期，本來係想打聽後山既資料，無諗過同她東拉西扯甘就傾左七日，都傾都幾投契但係你問我地傾左咩事我回想起又記唔起，有時就係甘奇怪，然後事件發生係呢日晏就。