【校園】【微甜】三日兩夜生前死後的宿營: 宿營外(2)-1: 山上巧遇

最初我唔想入女校，我想入男女校。
並唔係因為我討論女仔，或者特別鍾意男仔，儘管我係異性戀，我只係覺得同班女既一齊好累，又多心計又小圈子，但係我既成績唔係好到可以轉校，而且近屋企都係一個考慮因素，所以我決定係呢間學校是但攞個中上成績，玩夠六年之後開始我既舞蹈生涯，最初幻想係甘，只可惜每次大型表演如演唱會之類都有份伴舞既我某一次被人換走左之後就無再被人搵過。

如果話係比我更厲害既傢伙我自然無甘暴躁，頂我位既居然係一個連基本hip hop都跳唔到既人，其他伴舞都唔係傻，見到個無料既人紛紛走去問負責人先知她係唔知邊個三哥堂表妹姨媽個女甘上下既人靠關係同錢入黎上位，關係疏到無雷公甘遠，但阻於人地有地位同你撐腰，佢地都只好無奈歎氣，之後我就發現好多人為左上位咩都做得出，錢同關係都係小事，心計擦鞋愈見愈多，甚至出賣肉體，我有d頂唔順，過多一年我就辭職遠離娛樂圈，雖然一開始都有朋友替我可憐同情，可是我知道呢d都係門面話，我既去留對佢地黎講無關痛養，呃，都有既，演唱會飛無得擺之後我身邊圍小左好多人，差不多有半數人左右，都好，耳根清靜。

人情世故就係呢回事，雖然我對跳舞熱情有增無減，但係進軍娛樂圈既淡左唔少開始自暴自棄。

同年我班黎一個轉校生，無論外表定成績都唔係特別出眾，當然我地學校並非名校，我都唔清楚她有咩才華會係呢個過黎，後來我聽D三姑八婆講她又一個靠關係既人，唉，好灰啊，難道呢個世界就係甘黑暗？

後來我知道我既想法係幾甘單一膚淺幼稚。





有日上完堂無所事事又唔想甘早返屋企，我刻意繞遠路去個人跡罕的小山坐低睇風景， 夜晚可能有d滋事分子，地下有唔少香煙酒罐不過依加日光日白小貓都唔會爬上黎曬太陽，其實這座所謂的小山只不過用鐵絲網欄住加上警告字牌阻絕閒人搞事，同埋唔算好高好難行，硬要講係無一條正式既路比人行，只有又窄又多沙石既路，有時雙手雙腳並用爬上去，不過景就唔錯望到海景又睇到碼頭又見到高樓大廈，一望無際，呢個地方係我半年前無意中發現好奇下走上去行，事實證明我無白行一趟，自此之後呢度就成為左我既秘密地方，無聊無野做唔開心屈悶興奮都會跑上黎打發時間。

不過今日意外地一件垃圾都無，而且不遠處有電子音樂既聲音，之後零零數數聽到效果音「鏘嚓隆鏘」，又隱約聽到「差少少，過d過d」既人聲，睇黎不遠處有人，不過佢究竟搞緊咩？玩緊手機？

人不犯我我不犯人，各自各便好吧，我揀左個有樹陰既位置打算就地休息。
就係我準備瞓低休息就算天跌落黎我都唔會起身既時候，「啊啊！！！」嚇到我即刻彈起身，搞咩鬼啊？不過聽到尖叫聲果個人我就知係女仔，我估無邊個男仔可以叫到甘高音，「呼，舒服哂。」她講完呢句之後就撿起自己的袋準備離開，我偷偷望過去……
咦？她著緊既衫甘似我著緊果件……咪姐係同一件制服，同一間學校？！無見過會有其他人上黎呢個地方，好死唔死居然係同一間學校，對方好似無發現我攞起背包就走左去慢慢爬返落去，雖然對方睇唔到我但係我就睇到一清二楚。

呢個咪就係啱啱轉過我校入左我班既轉校生小雪？！





無認錯她，她比同班既矮又小又瘦一副發育不良既樣子但係好食得，每次休息時間午膳都見到她左右手唔係攞住食物就係飲品，她唔知係咪怕生除左上堂答問題之外我好少聽到她靚聲，每次分組都係要老師主動邀請或者強塞入組，再加上我班既小圈子情況特別嚴重，唔難怪她過左成個月都係自己一個。

只不過轉左校一個月，甘快比她發現呢個地方？連我都係無意中發現呢個地方......唔係，她究竟上黎做咩？我仲見到她除左背著包，手上仲攞著個透明膠袋，裏面放左一d廢棄既膠瓶煙頭酒罐……唔通今日小山甘乾淨都係因為她幫手撿？我上左黎甘多次從來無諗過要幫手清理因為呢個地方我都只係有時上一上散心，而且呢d野都唔係我留低我覺得無必要撿起，但係她既諗法唔一樣，既然我係地方逗留就要保持乾淨，不過話唔定她只不過係有潔癖所以睇唔過眼。

講起又講，成個月黎我真係一次都未她講過話，如果我問起呢個地方她會不會老實說？本來我係諗住當秘密基地但係有同伴既話，都不失係件壞事，順便我都想知她轉校過黎既原因，但係突然同她甘親近又好似怪怪地，算啦！聽日先再算反正同班大把機會，點知山下有人大叫：「啊！！」
我即刻反身望向下面，見到她成個人坐左係地下雙手都係沙泥就甘睇好似無擦傷，應該係唔小心鬆手或者舊頭鬆左握唔實跌左落地下，應該係就快到地既距離掉落，照道理就無表面傷痕，但係她突然一滴滴眼淚湧出黎，我大吃一驚以為她邊度撞痛想衝落幫她，但係她擦乾淚水：「唔係講過唔可以甘易喊，要比信心自己啊！」儘管臉上掛著笑容，無論點睇都係強顏歡笑，她拍掉身上既灰塵一蹦一跳跑開去。

最終我打住爬落去既衝動係山上目睹一切，暗自決定聽日一定要會會呢個女仔，不過，「真係一個怪人。」
我忍不住自言自語。