<第叄期實體書,經已有售>今年我三十三歲,回到了1998年 (校園、穿越、奇幻): 第二部曲 Chapter ５8-2　收買人心（下）

Chapter ５8-2 收買人心（下）

飯還未吃完，布正麗父女便離開了，我把夾開的飯餸放進菜藍，然後拿過去隔壁。
 
我敞開了門，布世伯和布正麗坐在沙發上看電視，蹺著手的布世伯瞥了我一眼，我揚了揚手中的菜籃道：「你地應該都未食飽？」
 
布世伯賭氣地應道：「唔食啊！食咗都背脊骨落啦！」
 
飯還未吃完，布正麗父女便離開了，我把夾開的飯餸放進菜藍，然後拿過去隔壁。
 




我敞開了門，布世伯和布正麗坐在沙發上看電視，蹺著手的布世伯瞥了我一眼，我揚了揚手中的菜籃道：「你地應該都未食飽？」
 
布世伯賭氣地應道：「唔食啊！食咗都背脊骨落啦！」
 
「吓！但係啲野係布正麗煮嗰喎！」
 
布世伯聞言點了點頭，道：「嗯！咁又係，啲野又唔係你阿婆煮！無理由唔食。」
 
於是布正麗把飯菜翻熱，布世伯邊吃邊口沫橫飛道：「阿麗，自從妳去咗一轉台灣，煮餸越嚟越掂啊！名乎其實入得廚房，上得大床，嗰個汶萊王子實飛唔出妳五指山。」
 




布正麗聞言臉色一紅，在布世伯的額上打了一個爆栗，道：「喺其他人面前，前，咁講自己個女？」
 
「哈哈，咁老豆讀得書少，講野係咁粗鄙架啦！你問下菠蘿雞想唔想擒妳？」
 
我聞言亦臉孔一紅正想申辯，布世伯斷言道：「你唔駛唔認喇！如果上次唔係我喺到，你得咗米啦！」
 
「世伯，上次係意外！」
 
布正麗塞了兩隻蝦給布世伯，道：「食不言、寢不語。」
 




我歉然道：「布甸，唔好意思啊！我阿婆平時唔係咁，佢一向對其他人都好好，但係唔知點解佢突然間講啲咁嘅說話？」
 
布正麗盯了我一眼，搖了搖頭道：「成皇志，我以為你做咗老闆會有所長進，估唔到你同以前一樣，都係咁唔明女人。」
 
「我唔明女人？我唔同意，我同Galaxy girl個個成員都相處得好融洽喎！」
 
布正麗拍了額頭一下，道：「點同呢！嗰啲係你下屬。你阿婆平時煮野食好叻！但佢有病，行動唔方便，煮唔到野食，而你地又讚我煮啲野好食，咁佢咪唔鍾意囉！你地嘅說話打擊到佢自信，佢咪妒忌囉！」
 
布世伯道：「阿麗，妳出過去見過世面，真係唔同啲，俾著妳以前已經講晒粗口。」
 
我聞言亦覺得布正麗的推論有道理，阿婆一向對自己的廚藝十分自負，現在她的行動不太方便，沒有精力下廚，布正麗好像威脅了她在廚房的地位。
 
布正麗道：「你地讚我煮野好食，又有無讚你婆婆吖？」
 
可能我和阿興從小都是吃阿婆的飯大，習慣了便覺得是必然，所以阿婆煮得再好，我們亦很少誇讚她，有時如果阿婆的廚藝失準，我們便會出言表達我們的不滿。




 
布正麗見我默言，搖了搖頭，道：「睇你地兩兄弟平時都無咩好聽嘅說話同你阿婆講過，女人無論三歲定八十都想人地讚佢架！」
 
凌晨兩點，家中的人都熟睡了，阿婆輕輕推開房門，攝手攝腳走到廳中，再打量四周一下，確保沒有人起床上厠所，她才緩緩向廚房走去，因為剛才沒有吃晚飯，現在飢腸轆轆，睡不安寢，只好找東西去祭祭五臟廟。
 
為了不讓其他人發現，讓自己顏面受損，阿婆的一切動作都靜悄悄的，打開了雪櫃，看到內裡有飯有菜，雖然這些是布正麗那小丫頭的手藝，但現在肚子餓得很，也顧不得那麼多了。
 
阿婆心想：「佢煮咗都係預我食，唔食倒咗去就好無衣食，而且都係阿志出買餸錢，我食係天經地義。」
 
一念及此，阿婆便把飯餸翻熱，阿婆品嚐了布正麗的廚藝，覺得挺好吃，可是她口不對心喃喃道：「肚餓起嚟，食咩都特別好食，嗰個小丫頭啲手藝勉勉強強啦！」
 
起床去夜尿的媽媽看到廚房亮了燈，便悄悄走去，輕輕探頭一看，看到阿婆在廚房吃宵夜，而且還吃得很香的樣子，不禁搖了搖頭，她知道對方的性格，只好裝作看不見，回到房間睡覺。
 
那天晚飯不歡而散後，布正麗便沒有再下廚，她說有事要忙，沒有空為我們煮飯，媽媽只好親自下廚，可是阿婆經常批評媽媽的廚藝：
 




「碟栗子炆雞煮到乾晒水，栗子一啲煮到爛晒、一啲又硬過石頭，有無搞錯啊！」
 
「冬菇炆豬肉，豬肉應該揀半肥瘦，妳用啲瘦肉嚟整，油香唔夠，仲有碟餸太鹹喇！妳無加冰糖咩？我提咗妳加架！」
 
「瑤柱蒸蛋，妳無隔渣咩？成個豆皮婆咁，睇見都唔開胃啦！」
 
「唉！妳地幾姊妹煮野都係無乜天份，教極都學唔到我兩三成功力，睇嚟我嘅衣缽都係後繼無人㗎喇！」
 
曾當過港督大廚的阿婆對餸菜要求極高，完全不留半分情面去數說媽媽，讓煮飯弄得滿頭大汗的媽媽感到極大壓力，媽媽把鑊鏟怒摔在地上，道：「唔煮喇！叫外賣啦！」
 
看到這個情況，我覺得布正麗沒有下廚亦未嘗不是一件好事，至少不會因為做飯這件事引起磨擦，讓雙方關係進一步惡化。
 
正當我以為阿婆和布正麗父女的關係難以在短時間緩和，可是世事往往出人意表，這天回家，我敞開門一陣香氣瀰漫屋中，廚房傳來了阿婆和布正麗的聲音。正當我以為快要上演六國大封相的時候，仔細一聽兩人的對話和平得讓我吃驚.
 
「婆婆，我依碟客家釀豆腐啲味道得唔得？我照妳講，將半肥瘦豬肉剁碎，再加入冬菇、鹹魚、蔥粒，不過個賣相唔係咁好，將啲料釀入豆腐嗰陣，好易整爛件豆腐。」




 
「唔，唔係啊！味道有我七成，第一次做好好架喇！我俾八十分，依啲功夫菜，要時候浸淫，妳同我一樣有對巧手，煮咩餸都好快會上手。」
 
我一臉茫然向媽媽和阿興問道：「究竟發生咩事？」
 
兩人也現出一副看傻了眼的表情，阿興道：「我都唔知道啊？我一返嚟就見到佢地一齊煮飯。」
 
媽媽搖著頭道：「你阿婆仲話將畢身功力傳授俾阿麗，話咁多年嚟終於搵到傳人喎。唉，真係吖！之前就水溝油，依家就糖黐豆，都無解嘅！」
 
這天晚飯，布正麗與阿婆合力為我們炮製了一席豐盛的晚飯，冬菇炆豬肉、客家釀豆腐、蕃茄紅衫魚、鹽焗雞、胡椒豬肚湯。
 
布世伯呷了一口胡椒豬肚湯，讚道：「阿興阿婆，妳真不愧係督爺御廚，我飲過咁多次胡椒豬肚湯，要數今次最得，以後妳真係要多啲下廚。」
 
阿婆笑了笑，道：「其實我已經教咗阿麗點煲，以阿麗嘅悟性同手藝，相信唔會差我好遠。」
 




布正麗道：「老豆，婆婆真係好厲害，佢識好多唔同嘅菜系，我要學晒隨時要幾年。」
 
布世伯道：「阿麗，咁妳多啲跟阿興阿婆學野，煮多啲好野食俾老豆喇！」
 
阿婆笑道：「依家好少後生肯學我啲功夫菜，仲要咁靚女、咁有天份，我嗰三個女教極都無我一半水準，阿麗唔同啊！一點就曉，係呢！布生，你食唔食苦瓜架？我兩個孫唔食苦瓜，原本我諗住整釀苦瓜。」
 
「半生瓜好野喇架！不過係要真正男子漢先識欣賞，婆婆，妳下次整嘅話，我擔保全碟同妳食晒佢。」
 
看見眼前他們相處得這麼和諧融洽，我開始懷疑這頓飯是夢？還是之前那頓不歡而散的飯是夢？
 
我不禁把目光瞟向身旁的媽媽和阿興，他們臉上不約而同出現困惑的神色，相信亦對眼前的景象感到不解。
 
晚飯後，我要布正麗和我一起去散步，藉此要她解答我滿腹的疑問。
 
「究竟發生啲咩事？點解妳同我阿婆突然間咁老友？」
 
布正麗反問道：「乜你好想我同你阿婆不和咩？」
 
「當然唔係啦！我只係想知妳用啲咩方法啫！下次如果我激嬲阿婆，可以用妳嘅方法去氹返佢。」
 
 
布正麗笑了笑，道：「講出嚟你未必信，係你婆婆主動搵我，嗰晚你地瞓咗之後，佢食過我煮嘅飯餸，覺得我幾有煮野食嘅天份，於是嚟教我煮餸。」
 
我啞然失笑，道：「哈！阿婆真係吖！原來妳煮嘅餸，佢最後都有食，仲打動埋佢收妳為徒。」
 
「你阿婆煮野食咁叻，你媽媽同阿姨嘅廚藝……都唔乎合你婆婆嘅要求，佢想將佢門手藝傳承落去。」
 
廚藝精湛的阿婆一直抱怨媽媽和阿姨們的廚藝不達標，害怕一門手藝失傳，難得遇上布正麗這塊琢玉，於是化干戈為玉帛傳授布正麗廚藝也很合理。
 
我點了點頭：「咁樣實在太好喇！我仲諗緊應該我去日本之前，你地都唔會和好，依家我起碼煩少一件事，依排實在太多野煩，等完咗世界盃，一切都會上軌道。」
 
我見布正麗一臉欲言又止的模樣，笑道：「我知妳又想勸我唔好賭錢，妳同我阿婆真係同聲同氣，難怪佢會搵妳做傳人，妳都係慳返啖氣，就當我係一個頑固嘅『賭徒』啦！唉，好耐無跑過步喇！我去跑返個圈先。」
 
布正麗輕輕嘆了一口氣，瞧著成皇志漸遠的身影，想起婆婆的吩咐：「阿麗，我知嚟緊依兩個月對阿志好重要，佢已經多野煩，我個病等得，唔好喺依個時候煩佢。」

以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl