<第叄期實體書,經已有售>今年我三十三歲,回到了1998年 (校園、穿越、奇幻): 第二部曲 Chapter ５９　２００２年世界盃（上）

Chapter ５９　２００２年世界盃（上）
 
世界盃是四年一度的體壇盛事，一共三十二支來自五大洲的球隊參加，自然成為全球的焦點，這次世界盃是首次在亞洲地區舉辦，亞洲區的球迷觀看電視直播不用去捱更抵夜，如果想親身到現場體驗精彩的比賽，也不過是三至四個小時的機程，不少經濟條件較好的球迷為了支持自己熱愛的球隊，都樂意花費十多萬前往現場觀賞賽事。
 
這次世界盃是首次在亞洲地區舉行，加上中國隊歷史性晉身世界盃決賽週，就算未到七月，市內的氣氛已經非常熾熱，什麼事情都與世界盃牽上關係。這時候的香港，與中國關係處於蜜月期，不少港人與有榮焉，全力支持中國隊，不少藝人平時不看足球，現在卻趕潮流般化成球評家，分析中國隊的出線形勢。
 
那名把自己愛隊荷蘭「燈」出決賽週的歷哥認為中國隊出線十六強沒有問題，運氣好一點的話，八強是最低目標，他道：「作為中國隊嘅支持者，見到咁嘅對手，出線名額真係手到拿來。同組嘅對手，巴西係最強，不過依支退色勁旅，都係僅僅出線決賽週，前線靠住大傷兩年嘅朗拿度攻堅，如果中國隊沉著應戰，打穩守突擊，隨時可以偷雞；土耳其依支本身喺亞洲嘅足球隊，入到歐洲成為魚腩部隊，上次入世界盃，差唔多五十年前，我真係無睇過依隊波，中國應該出八成功夫都夠贏；最後一隊哥斯達尼加，我連佢喺非洲定南美洲都唔知，出晒後備都數佢地四五六球啦！我地有四大球星楊晨、范志毅、孫繼海、李鐵，再加上關鍵王郝海東，進身十六強毫無懸念，睇下可唔可以壓過巴西首名出線啫！」
 
吳林紫娣不少師生都是中國足球隊的支持者，亦對中國隊麻木樂觀。學校的期終試結束，暑假前夕學生會舉行了一連串活動，其中公開組的五人足球賽因為世界盃的關係最受歡迎，剛剛讀畢一年毅進課程的陸榮祥與林海原、郭左杰、黎早強、何敏傑以校友的身份回來參加足球比賽，五人撃敗了以陳依官為首的自強會聯隊，得到了冠軍。
 




林海原一邊抺汗一邊道：「阿祥，你啲體能越嚟越勁，一野爆過兩個，一起腳又入一粒，依官佢地波都掂唔到。」
 
陸永祥聞言，嘴角上揚道：「依層緊係啦！我閒時Keep住跑步、舉啞鈴，毅進畢業我就去考警察喇！」
 
郭左杰頹然道：「阿強，你就識諗啦！唔似我咁，做廚房日日俾大佬屌。」
 
黎早強道：「你條友頹嘅唔係依樣，係因為同盛衣貝散咗。」
 
陸永祥安慰道：「小西，我之前都俾宛琳珊個八婆飛起，不過我諗通咗，男人最緊要有事業、搵到錢，到時啲女撲埋嚟啦！」
 




何敏傑笑道：「係啊！小西，阿祥依啲識諗啊！你不如同佢一齊讀毅進、考警察，到時大把女啊！我有朋友做警察，啲女唔係空姐，就係護士。」
 
林海原笑道：「頭先阿祥連入三球，我見有唔少囡囡尖叫，阿祥有無去抄人牌啊？」
 
陸永祥搖了搖頭，道：「自從我地嗰批畢咗業後，吳林紫娣啲女嘅質素差咗好多，搵個睇得上眼都好難。」
 
林海原話題一轉道：「咦！聞屎，你同阿登咁老友，無叫佢返嚟踢波咩？點解唔見人嘅？」
 
何敏傑搖了搖頭道：「叫咗啦！佢話開工，佢依家跟大鳩搵食。」
 




黎早強道：「依家大鳩幾巴閉，成立咗娛樂公司，佢嗰隊Galaxy girl紅到去日本，仲唱埋世界盃主題曲，十條女當中有六、七條女嗒得杯樂，佢隨時晚晚酒池肉林，一皇十后添！小西，你同大鳩舊時咁老友，不如去投靠佢，話唔定佢分返條女俾你呢？」
 
陸永祥嗤之以鼻，道：「黎早洩，你無睇到姚少咩下場咩？嗰個大鳩志出賣朋友，搵姚少做替死鬼，啲毒品喺佢架車上面搜到，你話佢無份，當我傻仔啊。」
 
林海原附和道：「係啊！我之前去探過姚少，佢成個落晒形，好慘架佢，佢同我講係大鳩害咗佢。」
 
郭左杰道：「唔會怪？我識大鳩咁耐，佢唔似啲咁嘅人。」
 
黎早強道：「人會變嘅！佢依家咁有錢，都無帶挈過我地，就知佢唔當我地老友啦！」
 
林海原道：「佢依家貴喇！佢啲朋友係謝家進、謝金雄嗰班，邊記得我地依班老友吖？」
 
陸永祥橫眼掃視眾人一眼，道：「同你地講吖！大鳩做咗咁多唔見得光嘅衰野，唔會風流得好耐，我遲啲做咗警察，實拉佢返去，佢依家洗定個蘿柚都啱架喇！」
 
何敏傑覺得陸永祥太武斷，不太想在這個話題上繼續討論，道：「係呢！嚟緊世界盃，我地去邊到睇波啊？」




 
郭左杰道：「就腳嘅話就８座，嗰到仲可以賭波添！」
 
林海原道：「上屆場場波大台都有得睇，今年得幾場有，想睇就要裝畸寶，去朱斌仔個場睇都好。」
 
郭左杰道：「第一場法國對嗰隊菜乜鬼，合埋眼買法國啦！」
 
陸永祥點頭道：「法國係上屆冠軍，有施丹同英超、意甲、法甲三大神射手，攻力好強，我同歷哥一樣睇法，今年唔係法國就阿根庭捧杯。」
 
黎早強反駁道：「唔係喎！我睇大鳩份免費報紙，佢睇好今年巴西喎！佢話法國同阿根庭有暗湧，未必出到線。」
 
陸永祥罵道：「佢食屎啦！唔識波，喺到放山埃，朗拿度上屆決賽腳軟，啱啱先大傷完，隨時踢一場又傷過，最多都係八強貨仔，法國同阿根庭出唔到線？如果係嘅話，我認佢做契爺。」
 
陸永祥把話說得太盡，但在場的另外四人亦難以相信法國與阿根庭這兩隊奪標大熱會在分組賽止步。
 




何敏傑的目光停在一位經過的女同學身上，不禁雙目放光，道：「咦！又話我地嗰批走咗之後，吳林紫娣再無靚女嘅？依條女得喎！唔係差布正麗、宛琳珊好遠咋喎！」
 
林海原道：「聞屎，你真係好耐無返嚟，依個咪就係人稱『小布甸』嘅王采堤囉！」
 
陸永祥打量著王采堤，道：「依啲先叫做女㗎嘛！值得我去抄佢牌。」
 
郭左杰道：「咦！條女走去依官度，佢地原來識㗎！我地搵依官介紹我地識啦。」
 
五人坐言起行，說畢便走向陳依官與王采堤。
 
陳依官完成了公開試後，回來學校參加活動，王采堤道：「依官，我有同你同埋關國安打氣㗎，頭先你地嘅表現已經好好，但係可惜贏唔到。」
 
陳依官道：「阿祥佢地太勁，我地算輸得少喇！」
 
「唔緊要啦！你地都攞咗亞軍啦！好叻㗎喇！」王采堤臉上漾出雀躍的神色，道：「係呢！下星期我地就同會長去日本喇！同你講吖！咁大個女我係第一次去日本咋！我真係好期待啊！」




 
陳依官道：「實不相瞞我係第一次搭飛機，估唔到考完ＡＬ可以去日本，真係要多謝成皇志。」
 
王采堤喜孜孜道：「係啊！會長真係好闊綽啊！贊助咁多人去日本。」
 
成皇志提供機票、食宿給多位自強會成員，好像陳依官、尚興國、飯桶武、王采堤等人，一來可以收買人心，讓支持自己的會員更加忠誠；二來他亦交下任務給眾人。
 
陳王二人正在聊著這次東瀛遊，有人喊道：「喂！依官！」
 
陳依官別頭一看，原來是陸永祥五人。
 
陳依官應道：「喂！阿祥、聞屎、小西、阿原、黎早強，咁難得返嚟踢波啊！我地都有一排無見，轉頭去食飯啦？」
 
郭左杰道：「喂！依官，你身形肥咗唔少喎！係咪之前忙住溫書，少踢波啊？」
 




陳依官道：「係啊！最近係忙，不過對住阿祥，輸波都無計啦！係呢！小西，你係咪仲做緊之前份工啊？」
 
郭左杰有點不自然道：「無計啦！讀唔到書，係做依啲工作㗎喇！」
 
何敏傑指了指一旁的王采堤道：「喂！依官，嗰位師妹你識㗎？介紹埋俾我地識啦！」
 
陳依官向雙方介紹，道：「依位係王采堤，佢嚟緊升中五，依個係林海原、郭左杰、黎早強、何敏傑同陸永祥。」
 
王采堤道：「咁多位師兄，你地好啊！你地就係啱啱贏咗五人足球賽嘅校友隊？」
 
陸永祥心想自己剛才比賽的出色表現，相信已經在對方心目中留下深刻印象，便道：「係啊！我就係陸永祥。」
 
王采堤喜道：「你地幾位同陳依官一樣，以前都係同會長讀同一班嘅？」
 
林海原訝道：「邊個會長啊？」
 
王采堤自我介紹道：「我係自強會嘅幹事，我所講嘅會長係成皇志。」
 
陸永祥、林海原聞言臉上都流露出不自然的神色，何敏傑道：「係啊！我地以前中四、五都係同成皇志一班㗎！我地仲成日一齊食lunch同一齊玩添！」
 
王采堤羨慕道：「係咩！係咩！你地就好啦！可以同會長讀同一班，佢以前點㗎？」
 
黎早強笑道：「佢個花名大鳩志，就係我幫佢起，嗰陣我同佢入男厠屙尿，睇見佢原來好大抽，於是同佢起依個花名。」
 
王采堤雙頰一紅，啐道：「你咁㗎！厠所偷睇人，仲改埋啲咁嘅花名。」
 
被王采堤薄責，一向口沒遮攔的黎早強也難得有些不好意思，道：「咁我地一向都係咁玩，其實依個花名都係讚佢啫！」
 
王采堤流露出對成皇志的好感，讓陸永祥看在眼內感到不是味兒，明明自己剛才的比賽，在眾人面前大出風頭，正常來說王采堤的焦點應該放在自己身上才合理，怎麼對方這麼奇怪，纏著他們問起成皇志的事？
 
陸永祥道：「其實妳睇到嘅只係表面，實則成皇志唔係咩好人，佢害到我地其中一個同學姚智風坐監，佢要我姚智風幫佢頂罪，我勸妳都係唔好黐咁埋佢到。」
 
王采堤楞了楞，道：「點會啊！會長唔係咁嘅人嚟！報紙都講咗啦！係姚智風自己吸食毒品。」
 
陸永祥搖了搖頭，道：「我地探過姚智風，佢同我地講係成皇志害咗佢架！」
 
王采堤辯道：「佢自已犯咗法，俾人拉去坐監，於是抺黑會長。」
 
陸永祥冷笑一聲，道：「你知唔知佢老豆係黑社會嚟啊！佢一定係威迫姚智風代佢坐監。」
 
陳依官覺得陸永祥說話太過火，道：「喂！阿祥。」
 
陸永祥冷哼了一聲，道：「明嘅，你地都喺佢個組織啲人，當然會幫住佢講野啦！作為朋友我只係提醒一下啫！你唔鍾意嘅話，我咪唔講囉！」
 
陸永祥出言誣蔑成皇志，王采堤很是憤慨，一向待人和善的她，罕有地一言不發地轉身離去。
 
林海原作為陸永祥的忠誠好友，自然力挺到底，揶揄道：「依啲𡃁妹睇野好表面，諗住大鳩做咗娛樂公司，痴埋去有著數，加埋嗰個咩自強會都係啲咩洗腦組織，喺入面俾人洗晒腦，第日俾人滾大個肚就會後悔喇！」
 
陳依官沒好氣道：「阿原，我都係你口中邪教組織嘅成員，我係咪又俾人洗腦呢？」
 
何敏傑聞言連忙打圓場，道：「咁難得先聚返唔好講啲唔開心嘅野傷感情，係呢！就嚟世界盃，依官，我地一齊去８座睇波啦！」
 
陳依官道：「世界盃依段時間，我要飛去日本，我諗陪唔到你地喇！」
 
黎早強道：「嘩！陳依官，無見一排，發咗達啊！去日本睇世界盃！」
 
陳依官苦笑道：「我邊到有錢吖！係跟成皇志去日本啫！」
 
話題再次回到成皇志身上，眾人沉默了一會，然後何敏傑打開了話匣子，彼此再寒暄幾句便離去，原本說好了稍後的飯局，各人也很有默契地不再提起。
 
陳依官知道陸永祥等人與成皇志不咬弦，一向面面俱圓的他，曾努力去排解雙方的衝突，但不知何原因，陸永祥並對成皇志有很深的成見，看來他也沒有辦法讓彼此間的關係得到改善。
 
與陸永祥等人不歡而散後，王采堤沿樓梯走上禮堂。
 
王采堤對陸永祥的說話嗤之以鼻，她覺得對方很偏執，她認識的成皇志絕不是一位厚黑歹毒的人，他不但幫助過自己，還受到很多人的愛戴，歌頌他的英雄事跡，怎麼陸永祥要這樣顛倒是非去誣衊他？
 
想到成皇志被曾經的同班同學這樣中傷，王采堤很替成皇志委屈，她越想越生氣，不禁氣得溢出淚來。
 
一名身形魁梧的男子正步下長樓梯，發現王采堤眼泛淚光，便以他獨特的小雞腔調問道：「王采堤同學，妳仲咩喊啊？」
 
王采堤以手背拭淚，抬眼一看，發現李老師一臉關切地瞧著自己。
 
王采堤想起李老師除了是自強會的指導老師外，還是成皇志與陸永祥的班主任，於是她便向李老師說出自己剛才碰到陸永祥的事。
 
李老師聽畢，笑了笑道：「估唔到成皇志咁受女同學歡迎，因為有人講佢壞話而喊。」
 
王采堤聞言臉色一紅，道：「會長…咁好人，我……我只……係戥佢唔抵咋！」
 
李老師嗯了一聲，道：「成皇志同學雖然離開咗吳林紫娣，但我對佢嘅野都偶有所聞，佢喺出面做過唔少大事，但係我唔相信佢做啲出賣朋友嘅事；依個學生有時好古惑，不過好講義氣，姚智風坐監，佢仲每個月都俾錢佢屋企人。」
 
王采堤聞言不禁喜道：「我一早知道係陸永祥講大話，會長對害過佢嘅姚智風都咁講義氣。」
 
得到這個消息，王采堤更加傾慕成皇志，覺得他人格高尚，出言抺黑的陸永祥就是卑劣齷齪的小人。
 
王采堤道：「李老師，你係會長中四、中五嘅班主任可唔可以講多啲佢嘅野俾我聽啊？」
 
李老師點了點頭，然後講述他與成皇志相處的事情。
 
與李老師一席話後，讓王采堤更加了解成皇志的事情，她滿足地與李老師道別。待李老師走遠後，她掏出了那部成皇志送給她的生日禮物ＧＢＡ，這不是一部普通的ＧＢＡ，而是由游大輝的表哥游稻發明的第二代追蹤器，與她送贈給成皇志的珠鏈是一個組合，在十公里範圍內可以知道成皇志的位置，而且有偷聽功能。
 
王采堤痴痴的瞧著螢幕上那顆小紅點，小紅點代表成皇志現在身處的位置，有時她還可以斷斷續續聽到成皇志的隻言片語，讓她有種成皇志對她說話的錯覺。
 
王采堤覺得自己有些變態，但心想成皇志送自己這份禮物究竟有何用意呢？難得他想自己窺探他的隱私？
 
以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl