<第叄期實體書,經已有售>今年我三十三歲,回到了1998年 (校園、穿越、奇幻): 第二部曲 Chapter ５8-1　收買人心（下）

Chapter ５8-1 收買人心（下）

我們四目雙投，怔怔地看著對方，我的心跳加速，有種燥動的感覺，我們維持著這個姿勢，不進不退。
 
布正麗的手不知為何，居然放在我此刻身上充血得最誇張的地方上，她臉色一紅，她這些神情舉動宛如火上加油一樣，原本已經燥動的我，理智正在崩塌，我伸出綠山之爪，向布正麗動人的雙峰進發。
 
布正麗見狀，只是呆呆的瞧著我，呼吸變得急促，並沒有阻止我的舉動。
 
正當形勢快要一發不可收拾之際，一把粹集驚怒、訝異的聲音響起，道：「你地做咩啊？」
 




我循聲瞧去，布世伯終於從厠所辦完公事出來，我與布世伯對望了一眼，儼如一盤冷水淋在我身上，體內的慾火頃刻熄滅，我立時站起，布世伯上下打量了我一眼，最後他的目光落在我那很礙眼的挺拔地方。
 
布世伯訝道：「你扯旗？」
 
布世伯這是明知故問，我很尷尬地嗯了一聲。
 
布世伯再問道：「你對住我個女扯旗？」
 
連汶萊王子也要拜倒其石榴裙下的布正麗，只要是正常男人也會有這樣的生理反應吧！
 




我非常不好意思地點了點頭。
 
布世伯這個問題不單是在刁難我，還讓布正麗十分尷尬，她喊了一聲：「老豆啊！」
 
看到布世伯一臉鐵青，我害怕他再次向我施展他那套拿手的太祖盤龍棍法，立時道：「世伯，你冷靜啲，件事唔係你咁諗嘅！我地只係玩下……唔係只係純粹意外，我地知你係屋企點會亂嚟啫！」
 
布世伯怒道：「你嘅意思即係我唔係到，你就擒咗阿麗？」
 
「嗱！世伯，假設性嘅問題真係唔好問，我答你唔到，咁依家咩事都無發生吖嘛！係咪先？」我緩緩向大門退去。
 




布正麗道：「老豆啊！你又發咩神經啊？我話無野，你又唔信。」
 
「我喺到緊係無野啦！我唔係到，就生米變成熟飯啦。佢係娛樂公司老闆，出面有好多女人架！」
 
「嘩！世伯，咁大誤會啊？你唔好聽啲報導亂講啊！我唔係某間娛樂公司嘅老闆，唔會對自己員工打啲咩鬼主意架！」
 
「依個世界邊有唔食魚嘅貓架？」
 
布正麗一臉沒好氣的樣子，道：「唉！我唔理你，返入房瞓覺。」
 
此地不宜久留，我扭開了門柄，道：「我有啲文件漏咗係隔離，今晚都係返過嗰邊瞓喇！」
 
我未待布世伯作出什麼反應，便奪門而去。
 
回到媽媽那裡，她與阿興正在邊吃生果、邊看電視，媽媽道：「細佬，依隊Galaxy girl，你鍾意邊個多啲啊？」




 
阿興扭頭瞧向我，道：「咦！阿哥，你又話要睇文件，喺嗰邊瞓嘅？」
 
我嘀咕道：「我再係嗰邊留多陣，身上會多幾個窿啊！」
 
媽媽笑道：「點啊！入贅姑爺，今晚仲乜唔喺嗰邊瞓嘅？」
 
我讓布正麗和布世伯在隔壁暫住，經常被媽媽拿來開玩笑，說我是入贅姑爺，還笑我日後有子女的話，應該是姓布還是姓成？
 
我道：「咁兩邊我都有房，瞓邊都一樣啫。」
 
話畢，我匆匆走進浴室洗澡，兩間屋都是使用同樣的沐浴露和洗髮水，同樣的香氣產生了條件反射，不禁讓我產生了無窮遐想，我那條臥龍再次充血成為了堅硬挺拔的鐵柱。
 
傳統智慧告訴我，如果心中那團火只是壓抑，不去宣洩的話是很傷身的，於是我自好來個自我安慰。
 




完事後，看著已經平復的臥龍，我不禁有點悽酸，從前我也是偷偷躲在一角去解決，想不到現在我變得富有，還是要以同樣的方法去解決這些生理問題。
 
自從布正麗搬了進來，我們便有口福了，她一有空便會親自下廚做飯，在台灣生活了一段時間，她學會了不少台灣菜，好像三杯雞、薑母鴨、蚵仔煎，她都煮過給我們品嚐，她的廚藝了征服了阿興，還擄獲了我母親。
 
阿興賣口乖道：「布甸姐，妳不如唔好做化妝師，去做廚師啦？都唔好，最好做我阿嫂，咁我日日都可以食妳煮嘅飯。」
 
阿媽亦不時會和我談起布正麗，道：「阿志，嗰個阿麗靚過晒你嗰隊Galaxy girl每一個女仔，又識煮飯，好難得架！你唔追佢，大把人追佢，好似嗰個汶萊王子咁，如果你好似以前咁嘅身世，我就叫你唔好諗啫！但係你依家係娛樂公司老細，絕對可以同嗰個黃尊義爭……哈哈，講真喔！阿媽真係估唔你咁本事，咁細個就開公司搵咁多錢，依家我喺啲friend面前提起自己個仔都唔知幾威。」
 
阿興和阿媽這樣說讓我有些想法，可是當我想起活佛對布正麗的批命便不禁猶豫起來，那個具有神通的宗教領袖並不會隨便戲言，如果布正麗真的會成為皇后，那麼怎樣看，最後和布正麗走在一起的是黃尊義而不是我。
 
阿興和媽媽都對布正麗致以好評，不過正所謂關公都有對頭人，還是有人不太喜歡布正麗，那個人就是我婆婆。
 
因為家庭關係，我們兩兄弟從小便給婆婆帶大，最近婆婆的身體不太好，經常要到醫院覆診，由於婆婆覆診的那間醫院很近我們這裡，為免舟車勞頓，婆婆便暫時住在我們這裡。
 
某天，阿興用微波爐翻熱布正麗昨晚煮多了的滷肉飯，阿興正在吃得津津有味之際，阿婆走過來道：「興仔，食咩食得咁開心啊？」




 
「布甸姐尋晚煮嘅滷肉飯，我叮返嚟食之嘛？」
 
「隔夜飯有乜好食啊？等阿婆靜間煮啲好野過你食啦！梅菜扣肉同豉椒排骨啦！」
 
「吓！阿婆，妳隻腳唔方便，就唔好周圍行啦！今晚，布甸姐早返，佢會煮飯。」
 
阿婆嘀咕道：「一個小丫頭，煮野有佢叻啫！嗰啲滷肉飯，下欄野嚟，想當年你阿婆我煮餸畀督爺食，督爺食到舔舔脷，依啲先叫功架！」
 
「阿婆，唔係啊！布甸姐，煮飯都好叻架！」
 
阿婆怒道：「真係白養你地兩兄弟，阿婆煮咗咁多年飯俾你地食，都未見你地咁讚過我。」
 
阿興有些愕然，不知阿婆為何突然發怒。
 




Galaxy girl的日韓世界計劃已經安排妥當，在世界盃開始前，我較為空閒，可以陪同布正麗到街市買菜，其實我覺得她要我陪她，不過是要人拿東西及結帳。
 
布正麗問道：「你婆婆食唔食蝦架？我想整蒸籠沙蝦。」
 
「我阿婆食蝦架，淨係唔食牛咋！佢成日話牛有毒，我俾佢帶大，搞到我都唔食牛。」
 
「但係上次打邊爐，阿興都食牛架？」
 
「咁證明我聽話過阿興囉！」
 
布正麗沒好氣地白了我一眼，我道：「上次我地去買蟶子嗰檔，啲野好新鮮，我地去嗰檔買蝦。」
 
我們走到魚檔，魚檔老闆道：「成大師，又同女朋友嚟買餸啊？」
 
布正麗立時否認道：「我唔係佢女朋友嚟架！」
 
老闆道：「明嘅！成大師你係娛樂圈人，要玩嗰啲地下情。」
 
布正麗聞言為之氣結，我只是笑了笑道：「老闆，今日啲蝦靚唔靚啊？」
 
老闆豎起拇指道：「今日啲花竹蝦好似你女朋友咁靚啊！」
 
我道：「咁畀斤我吖！」
 
布正麗瞧見老闆不斷把花竹蝦撈進膠袋，立時阻止道：「老闆，我地要一斤咋，你畀咁多我做咩？」
 
老闆道：「我睇成大師份報紙，佢話歐冠決賽和波，我跟佢買，真係中咗，依到兩斤蝦，我請你地食。」
 
我愕然道：「吓！咁點好意思啊？」
 
老闆道：「成大師，你唔駛唔好意思架！嚟緊世界盃，你講俾我聽邊隊攞冠軍就得架喇！」
 
「咁，你買巴西啦！今年巴西攞。」
 
老闆聞言大喜，道：「收到晒！中咗，我就請你食石斑。」
 
我拿著花竹蝦離去，布正麗以懷疑的目光打量了我一眼，道：「唔怪得你要揀依間鋪買海鮮啦！用一句說話就可以有免費海鮮。」
 
「咁……依啲互惠互利啫！佢就嬴錢！我地今晚又有免費蝦食。」
 
＊＊＊
 
難得這晚我們所有人都在家，布正麗為我們準備七人份量的餸菜，上來作客的萬黛到廚房協助布正麗，順便偷師。
 
阿興和布世伯玩著自製玩法的象棋，阿媽幫阿婆推拿按摩，我與王采研通電話。
 
「成生，你話要安排另外五個人去日本嘅機票食宿，我已經幫你辦妥喇！我ＳＥＮＤ咗啲資料去你ＥＭＡＩＬ度。」
 
「咁快手！我今朝先叫妳做咗喎！」
 
「成生，你交代要我做，我緊係要盡快搞掂！我問過幾間旅行社，揀咗間最乎合你要求嘅package。」
 
從前姚智風當我的助手時，交託他辦一些事，他不是忘記了，便是把事情弄糟，現在王采研這麼有效率，我反而不習慣。
 
「嗯，我差唔多食飯，晏啲再睇ＥＭＡＩＬ啦！唔該晒。」
 
我掛上了電話後，布正麗與萬黛從廚房把飯菜捧出來，布正麗喊道：「食得飯喇！」
 
我聞言自動請纓去幫手開檯，未幾把餸菜全都取出放在桌上，阿興見狀，如數家珍般道：「甕仔雞、九層塔烘蛋、麻婆豆腐、糖醋排骨、三杯花枝……仲有依個係有蜆又有蝦，叫咩名堂啊？布甸姐。」
 
布正麗道：「蒸籠沙蝦，平時多數用河蝦，但今日啲花竹蝦靚，所以我用咗花竹蝦代替。」
 
布世伯道：「阿興阿媽，阿興阿婆，妳地有口福喇！阿麗今晚整九大簋，仲煲咗陳皮鴨腎西洋菜湯，整啖湯飲吓先！正啊！」
 
萬黛道：「布甸姐，妳依個九層塔烘蛋好食啊！我屋企都有種九層塔，下次攞俾妳吖！」
 
布正麗喜道：「係喎！妳屋企有好多田可以種野，可以嘅話，下次攞啲菜上嚟吖！」
 
萬黛嗯了一聲，阿興道：「布甸姐，妳同阿哥下星期都去日本，之後都有排試唔到妳手勢。」
 
阿婆訝道：「阿志，你地兩個去日本？」
 
布世伯插言道：「阿興阿婆，緊係唔係啦！佢地各有各做野，我阿麗係汶萊王子嘅專屬形象顧問。」
 
阿婆道：「汶萊？我都未聽過，個王子都唔慌有錢得去邊，我阿志咁後生，就做老闆，叻過咩王子多多聲啦！」
 
布世伯道：「阿興阿婆，咁妳就真係唔識野喇！汶萊好多石油，啲人唔駛做，有政府養架！」
 
「靠政府養？咪即係廢人，人唔做野，有乜用啊！咁阿志佢本事好多。」
 
媽媽看到布世伯與婆婆的話題開始有點火藥味，把話題一轉，讚道：「啲蝦好新鮮，咁樣蒸仲好過白灼，阿媽我搣俾妳食。」
 
布正麗亦配合媽媽，道：「啲花竹蝦好靚架！嗰魚檔老闆識成皇志，請我地食，老豆你食蝦啦！」
 
我亦希望飯局在和平氣氛下進行，把一塊糖醋排骨夾給阿婆道：「阿婆，食排骨啦！啲排骨好食啊！」
 
阿婆哼了一聲道：「有幾好食吖！你阿婆舊時入港督府煮飯，嗰碟冬菇炆豬肉食到啲鬼佬舔舔脷，嗰啲就真係好食喇！」
 
布世伯一面剝蝦殼一面道：「阿興阿婆，食飯唔好講舊屎，９７之後換咗枝旗喇！督爺都走咗喇！依家香港最大嗰個叫特首。仲有啊！阿興阿婆，我阿麗咁辛苦煮九大簋，都係想大家食得開開心心，妳成餐飯嫌三嫌四，妳雖然係長輩，但咁樣講就唔係咁好啦！」
 
阿婆怒道：「咩啊！依家妳地住緊間屋，都係我阿志畀你地住咋！」
 
布世伯霍地而起，道：「阿興阿婆，原本我住嘅係汶萊王子嘅貝沙灣豪宅，妳估我好想住喺到架？講到我好似黐金糠咁！」
 
「阿婆，唔好咁啦！」
 
「老豆啊！」
 
我們雖然極力勸阻，但最後這餐飯都是不歡而散，布正麗父女回到隔離屋。
 
屋子餘下我們五人，媽媽道：「阿媽，妳又係嘅！好好地一餐飯，點解要搞成咁啫？」
 
阿婆道：「個丫頭煮啲野有幾好食啫？食到你地著晒迷咁？你地想食嘅，我即刻煮畀你地食都得。」
 
媽媽道：「媽，咁夜仲煮咩啫？妳身體又唔好，人地阿麗煮好咗，仲乜要煮過啫？」
 
「哦！依家真係嫌我老喇！手腳慢，你地三個都係我帶大，真係養你地。」阿婆話畢便忿然走向房去。
 
媽媽喊道：「媽，你真係唔食啊？夜晚肚餓無野畀你食架！」
 
「唔食啊！」
 
我搲了搲頭，問道：「咁依家點算啊？」
 
媽媽搖了搖頭道：「咁我地自己食啦！夾開啲飯餸，靜間攞過隔離俾阿麗佢地。」
 
阿興與萬黛彼此看了對方一眼，便垂頭扒飯。
 
我搖了搖頭，嘆道：「好地地食餐飯都唔得嘅。」

以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl