<第叄期實體書,經已有售>今年我三十三歲,回到了1998年 (校園、穿越、奇幻): 第二部曲 Chapter ５７　收買人心（中）

Chapter ５７　收買人心（中）
 
早前媽媽見隔壁的陳太要搬遷放盤，她希望將來我、阿興各自組織家庭時，在附近居住，那麼既有各自的空間又可以隨時見面。
 
我對媽媽先斬後奏的買樓方式甚感不滿，道：「媽，點解妳事前唔同我講聲啊？出年樓市會大跌，依家買蝕咗喇！」
 
「就係怕同你講，知你會反對，依個價唔算貴架喇！香港買磚頭保值啊！」
 
我嘀咕道：「出年樓價再跌多啲，妳到時就後悔。」
 




「月供之嘛！怕咩喎！你依家係娛樂公司主席，應該買多幾間屋添！你啲錢擺係銀行都收唔到幾多息，投資房地產仲好啦！香港啲有錢佬，好似利天成、寧兆京，到同你好老友嘅謝金雄都係靠房地產起家。」
 
「要投資我情願將啲錢買落世界盃到好過啦！」
 
媽媽聞言睨了我一眼，道：「後生仔唔好心頭咁高，賭錢只係做莊先賭到錢，每年咁多人去馬交搵柯生，最後邊個真係贏到佢錢喔？嗰個王耀暉咪有板你睇囉！普通打工仔做到有幾億身家都唔知足，之後俾啲有錢佬夾手夾腳拉返落嚟！」
 
我與王耀暉不同，我掌握著歷史軌跡，一切都是順勢而為，他只是被貪婪蒙蔽雙眼的投機者。當然我和媽媽說自己一早料到球賽的結果，她是不會相信的。
 
當初我埋怨媽媽在這時候多買一個單位，現在我可能要慶幸她下這個決定，因為多了一個單位，我才可以讓布正麗父女暫時住在這裡，避免她和黃尊義同居。
 




我招待布正麗父女進入新的單位，道：「世伯依到有三間房，最埋面嗰間我嘅，其他兩間你地隨便啦！」
 
布世伯拖著行李車四處打量，嘆道：「唉！都唔明阿麗妳點諗，麗城成十幾年樓齡，明明個汶萊王子貝沙灣有座幾千尺別墅，我成世人都無乜機會住到依啲豪宅架。」
 
布正麗道：「貝沙灣好遠架！荃灣方便好多，而且咁大間屋，我怕有鬼啊！」
 
阿興拍了拍布世伯的肩膀道：「咪係囉！布叔叔，我地住咁近，咪可以一齊去打下功夫囉！我仲可以教你捉新式象棋，依樣係我同天誅伯一齊研究出嚟，好好玩架！」
 
布世伯摸了摸阿興的頭，道：「你唔駛陪你個女朋友仔咩？嗱！你話同我一齊打功夫架！唔好講過唔算數啊！」
 




「緊係啦！你最後嗰三式棍法都未教我。」
 
布正麗道：「咁難得今日得閒，我去買餸煮飯啦！」
 
布世伯道：「唔駛返工就抖下啦！今晚我地出街食。」
 
布正麗道：「出面啲野邊有我煮咁好食啊！」
 
「好野！好耐未食過布甸姐煮嘅餸喇！萬黛成日話要跟妳學煮餸。」
 
布正麗道：「阿興，你婆婆煮餸好叻架！萬黛可以跟佢學架！」
 
阿興搖了搖頭道：「阿婆近排成日病，都唔知咩事！邊有心機煮飯喎！」
 
布正麗瞧著我道：「吓！好嚴重咩？」




 
「都係啲老人病啫！我依家得閒，陪妳去買餸啦！」
 
話畢我便與布正麗一同離去，阿興則教授布世伯玩他與蔣天誅共同創作的新式象棋。
 
布正麗要到楊屋道街市買菜，從麗城到那裡有一段距離，而且我是公眾人物，我說要找阿登開車載我們，布正麗拒絕道：「你真係洗人唔洗本，買餐餸都特登叫人開車嚟接你。」
 
「嘩！你講到我好似啲無良老細咁，我出嘅錢比出面最少高一半，而且佢嘅工作量只係得出面一半。」
 
「搭咩車吖！我地行去啦！你係咪依家貴咗，行幾步路都唔得吖？」
 
「ＯＫ！ＯＫ！行就行啦！」
 
難得今天有半天假，可以拋開繁重的工作，與布正麗在街上行逛，可是未幾我的手提電話便響起，電話彼端傳來了阿葆的聲音：「喂！阿志，史丹菲同曹麗莎又吵交喇！」
 




我嘆了一口氣道：「今次又咩事啊？」
 
「咪又係為咗啲企位同衫嘅小事囉！本來你放假我都唔想打擾你，但係菁姐同Trace、貞蘭去咗馬交拍劇，只有你先可以調停佢地。」
 
阿葆與KYLE是我在dream music時期的同事，我創立了順勢後，他們便從蔣天殺的掌天下過來我這裡工作，現在他倆都協助菁姐管理Galaxy girl的工作。
 
「嗯，我打俾佢地兩個啦！」
 
我先致電給史丹菲，我還未開口，史丹菲便道：「老闆，曹麗莎一向唔合群，唔理其他人感受，明明我嘅本命星係海王星，佢就天王星，但係佢就著咗我件藍色衫，仲有啊！佢搶咗我個Ｃ位啊！」
 
「有啲咁嘅事？我即刻打去鬧佢。」
 
掛了電話後，我馬上致電給曹麗莎，曹麗莎道：「老闆啊！頭先史丹菲一定同你打小報告啦！導演話搞錯衫嘅ｓｉｚｅ，要我同佢交換角色，你一定信晒佢啦？」
 
「我緊係唔會啦！妳知道Galaxy girl，我最錫就係妳喇！之前張ＣＤ，妳首歌咪係我寫俾妳囉！本寫真集，妳嘅頁數仲多過史丹菲一頁，妳就知我偏心妳多啲啦！」




 
曹麗莎喜孜孜道：「咁我一向都抵錫、好乖，聽晒老闆嘅說話。」
 
掛上電話後，我再致電給史丹菲，道：「阿菲，我鬧咗佢架喇！不過因為場地同技術問題，妳同曹麗莎交換啲衫啦！」
 
「老闆，我知你一向都偏心曹麗莎，之前你幫佢寫歌。」
 
「緊係唔係啦！講真我錫妳多過曹莉莎啦！因為妳一向識得大體，顧全大局，
我同Bingo商量過，搵万刀甲同妳做銀幕情侶一齊拍戲同合唱，劇本我已經搵人度緊。」
 
「咦！嗰個万刀甲塊面好方，如果由你代替佢就好喇！」
 
「我都想，不過我好多野做，万刀甲幾好吖！運動叻，形象又健康。」
 
「依啲再講啦！既然你話我大方，咁我唔同曹麗莎計較啦！」




 
擺平了這場爭執後，我才鬆了一口氣，想不到難得的半天假，還要去應付Galaxy girl的人事問題。
 
布正麗斜眼睨著我，道：「大老闆，你同旗下嘅藝人都幾好感情喎！揀啱咗邊個未啊？唔講我仲以為係你嘅二奶、三奶打俾你添！」
 
我尷尬道：「都係做野啫！無其他野架！」
 
布正麗不依不饒道：「我就唔信喇！你依啲人不嬲都花心啦！依家成立個Galaxy girl，成十條女畀你揀你會唔心動？上次生日會人地王采堤個家姐有幾分姿色，你即刻發晒呆咁，搵人地做埋助手。」
 
我叫屈道：「阿布甸姐，乜我似係嗰啲欺壓旗下員工嘅大淫魔咩？講到我每一個女員工都唔放過咁？」
 
「咁你由讀書嗰陣已經俾人嘅感覺就係咁！」
 
上次我瞧見王采研的失態讓布正麗誤會，我又很難向她解釋因為王采研是我的預科同學（我在這個時空沒有升讀預科課程）。
 
布正麗的視線落在我的手腕上，道：「阿興同我講王采堤織咗條珠鏈俾你，你話晒都係一間公司嘅主席勞都唔戴一隻，戴人地小妹妹嘅手鏈，又請埋人地家姐做助手，係咪對人有意思啊？」
 
我不禁暗罵阿興反骨，居然當起布正麗的間諜來監視我。
 
「王采堤話依條珠鏈保平安，難得人地一番心意，而且嗰啲勞都唔啱我嘅，十幾廿萬一隻錶，我情願用啲錢嚟買波好過啦！」
 
「又係你嗰位睡仙師父報夢過你聽啊？」
 
「哦……係啊！上次歐冠決賽妳都見識過師父佢老人家嘅威力，講嗰樣中嗰樣。」
 
「其實你依家都有自己嘅事業，點解唔好好發展，要去掂依啲偏財？萬一唔好彩輸咗咁點算？好似嗰個王耀暉咁，隨時會一鋪清袋。」
 
我苦笑道：「我依家只係表明風光，依家我每個月都蝕緊過百萬，如果我唔做任何野，我好多生意多捱唔到去年尾，到時我仲慘過王耀暉，所以世界盃就係我唯一機會，無辦法喇！依個世界係由金錢主導嘅世界，我想做嘅任何野都要洗好多錢。」
 
布正麗現出錯愕的神情，道：「吓！睇唔出原來你咁大壓力，不過你又報社、又娛樂公司，養咁多人，皮費都好重下。」
 
「依層當然啦！咁多人跟我搵食，我唔為自己著想，都要為佢地諗下。」
 
「但係……真係無其他方法咩？十賭九騙，最後做莊家先會贏錢，咁睡仙同你講邊隊會贏世界盃？」
 
我瞥著布正麗道：「巴西會贏得今屆世界盃。」
 
「巴西？即係有哨牙仔嗰隊波？雖然我唔係好識波，但啲人話法國同阿根庭先係大熱門，嗰個哨牙仔傷咗好耐，最近先好返佢仲踢唔踢得起啊？」
 
「法國第一場就輸波，佢、阿根庭、葡萄牙分組賽都出唔到線，決賽嗰陣朗拿度會射入兩球做英雄打低德國。」
 
「但係你贏莊家咁多錢，佢地真係會賠俾你？到時會唔會走佬啊？」
 
布正麗這個問題，我和文光義也曾想過，文光義替我在立博、Ewin、Bet365、ＡＣ國際等博彩公司開了數十個帳戶，我已經在自強會找了十多個可以信賴的會員負責操盤，他們會在開場前五分鐘收到我的指令下盤，這樣一來可以避免博彩公司起疑，另外亦不會讓一筆大額投注降低了賠率去影響利潤，莊家會設定賠款上限，我分開多個帳戶，便能達至利潤最大化。
 
「咁唔會，佢地打開門做生意，邊可以輸打贏要，咁仲會有人去賭錢嘅？」
 
我的思緒從世界盃到了榮仔身上，榮仔的情況實在讓人擔心，我幾次話到口邊，又怕榮仔的狀況真的不好，會讓布正麗感到自責難過，畢竟她的好友顧琛琛死前，拜託她好好照顧榮仔。
 
最終我還是忍不住向布正麗詢問榮仔的詳情，布正麗嘆了一口氣，道：「始終都係暪唔到你，榮仔之前真係發生過一啲事，因為一啲事佢同天海聯發生咗一啲事……」
 
我聞言大吃一驚，插言道：「天海聯係台灣最大嘅黑幫，榮仔點會惹上佢地架？妳唔係睇住佢咩？妳依家嚟咗香港，咁佢點啊？」
 
布正麗道：「件事已經由黃尊義出面解決咗喇！榮仔唔會有麻煩，佢依家搬咗去台東嗰邊，有…柳豔佢地睇住。」
 
我聞言再吃一驚，道：「柳豔？」
 
布正麗瞥了我一眼，道：「我都唔知點解佢地會遇到，但佢地好投緣，柳豔知道榮仔嘅情況之後，建議榮仔去台東嗰邊讀書，嗰邊無咁複雜。」
 
聽畢布正麗的說話，我才冷靜下來，之前我出言苛責她實在太不該，她一個女孩在陌生的國度除了應付生活，還要照料榮仔，她一直把榮仔當成弟弟，又怎會不著緊他呢？她不曾向我說起榮仔的事，是不想讓我操心，而且榮仔的事還涉及到柳豔。
 
想到這裡，我道：「對唔住，我之前激動咗，無考慮到妳嘅處境。」
 
布正麗瞧了我一眼，笑了笑，然後一拳打在我的手臂上，道：「你條友不嬲衝動架啦！罰你買餸俾錢，今晚蒸條斑、灼斤蝦，再加半隻燒鵝。」
 
我笑道：「無問題，睇下啲蟶子同扇貝靚唔靚，阿興同世伯都鍾意食。」
 
阿媽與阿興在Ａ室居住，布正麗父女在隔鄰的Ｂ室居住，我有時會借故在Ｂ室過夜，雖然我日常在脂粉叢中打滾，大半隊Galaxy girl都是娛樂圈的一線美女，但每當我在Ｂ室過夜時，想到布正麗就在同一屋簷下，心中便會種難以言表的異樣感覺，就似那時中學與管佳莉一起去宿營時的感覺差不多。
 
布正麗在浴室沐浴，我在客廳裝作看文件，聽著浴室涓涓的流水聲，腦海生出很多綺麗的畫面。
 
當布正麗從浴室出來，用毛巾擦拭著濕髮，膚色泛著桃紅，滿室都是從她身上散發的洗髮水和沐浴露香氣。
 
布正麗瞧見我背對著她，便道：「我用完厠所，到你喇！」
 
我只是嗯了一聲，沒有面向布正麗，只因我的血液集中在身體的一處地方，很是礙眼。
 
布正麗坐在沙發上看電視，我側身走向浴室，就在此時布世伯捧著肚子，道：「喂！我急屎啊！畀我用先。」
 
布世伯一個箭步走進了厠所，嘭一聲把門關上，然後門後隱隱傳來了咇波咇波的聲音，看來布世伯排遺得很暢快。
 
既然布世伯正在凌辱著馬桶，我心想一時三刻間我還是不要進去為妙，只好坐在沙發上，與布正麗看電視。
 
布正麗瞧見我蹺著腳坐，道：「擺返隻腳落嚟啦！坐得咁核突。」
 
因為我兩腿間的器官已經呈戶愚呂弟的１００％飽滿狀態，我放下腳的話，只會在布正麗面前出醜，我道：「阿布甸姐，間屋我架！係咪連點樣坐都要妳管？」
 
布正麗沒好氣地白了我一眼，然後拿著搖控器不停轉台，我道：「今日大台有Galaxy girl嘅專訪出街，撳去睇下。」
 
布正麗轉到大台，這時主持人問及Galaxy girl的感情事，Galaxy girl的隊長宛琳珊道：「目前我都為事業衝刺，拍拖嘅野都係留返遲啲先講啦！」
 
主持人問道：「近日有記者影到你同柯家三房公子食飯喎！其實妳地係咪地下情啫！」
 
宛琳珊嬌嗔道：「邊係喎！普通朋友食飯之嘛！」
 
主持人問道：「咁宛琳珊，你嘅理想對象要有咩條件啊？唔知柯恩繼係唔係你嗰杯茶呢？」
 
「你依條問題要我點答喎！柯公子條件咁好，一定有好多女仔鍾意佢啦！」
 
主持人見此暫且放過宛琳珊，把焦點轉移到Galaxy girl其他成員身上，他道：「好喇！咁問下其他人啦！就由最左邊嘅吉兒答先啦！妳有無鍾意嘅人，佢係一個點嘅人架？」
 
吉兒想了想，道：「上個月我地Galaxy girl去咗韓國學舞，其中一個男導師好大隻、好靚仔，嗰陣我有觸電嘅感覺，但係最後都無進一步聯絡。」
 
「哦！原來吉兒鍾意啲韓國型男，咁家姐貞蘭呢？」
 
貞蘭道：「咁我又相反，我唔係太鍾意靚仔，因為靚仔好無安全感，都係有才華嘅男仔吸引啲。」
 
「嗯！原來你地兩姊妹嘅揀偶條件差咁遠嘅！細妹鍾意靚仔，家姐就鍾意有才華嘅男仔。咁另一對姊妹花，Trace同 Tiffany呢？」
 
Trace搶著道：「我家姐鍾意啲成熟型男士，最好就大佢十年。」
 
主持人笑道：「Trace搶先一步爆咗Tiffany係鍾意成熟啲嘅男士。」
 
Tiffany補充道：「咁我覺得成熟啲嘅男士，喺各方面都有經驗，可以照顧到人，我好怕啲男仔思想唔成熟，好似湊仔咁。」
 
Trace道：「咁我同Tiffany就唔同，我希望男朋友唔好大我咁多，最好五年內，如果唔係我怕有代溝啊！」
 
主持人取笑道：「係喎！最近有記者影到Trace你同蔣學勤成日出雙入對喎！係咪發展地下情先。」
 
Trace道：「緊係唔係啦！只係我地都係李華度同巴西嘅球迷，所以我地先一齊食飯講波咋！」
 
主持人道：「咁妳覺得蔣學勤係咪適合成為妳男朋友呢？」
 
「吓！依層我又無去諗喎！不過佢真係好照顧我，依家我專注喺事業嘅發展，其他野留番將來先講啦！」
 
「問完兩對姊妹花，就輪到曹麗莎同史丹菲喇！你地之前喺電視劇都扮演過姊妹，唔知你地揀男朋友嘅條件，會同Trace佢地有咩分別呢？史丹菲講先啦！」
 
史丹菲道：「其實我同貞蘭好似，都唔係好鍾意靚仔，覺得有才華嘅男仔吸引啲，最好就識作曲、填詞啦！」
 
主持人道：「你地順勢集團老闆係一名創作人，上年領獎禮攞個好多創作大獎喎！」
 
史丹菲讚道：「係啊！老闆好叻、好有才華，佢同我一樣係十九歲，就已經做到娛樂公司嘅老闆。」
 
主持人笑道：「咁即係成皇志係你嘅理想對象？」
 
史丹菲笑道：「如果我將來嘅男朋友好似老闆咁叻就好喇！我咁樣講，希望老細聽到會加我人工啦！哈哈。」
 
主持人聞言笑了笑，道：「史丹菲就希望將來嘅男朋友好似成皇志咁樣，曹麗莎呢？」
 
曹麗莎道：「我都同史丹菲一樣，希望將來嘅男朋友好似老闆咁叻，不過我比佢更加早就留意到老闆嘅事跡。」
 
主持人問道：「妳喺指佢做歌手嗰陣時？」
 
曹麗莎搖了搖道：「唔係啊！係再之前，其實我中學嗰陣，有同學加入咗自強會，佢同我提起老闆中學時候嘅事，老闆為咗救返個女仔，居然赤腳走過一條佈滿玻璃碎片嘅路，去抱走個女仔，事後成腳都係血，講真如果我係嗰個女仔，一定霖死。」
 
史丹菲亦搶著道：「係啊！我都有聽過依件事，諗起當事嘅情況，老闆真係好有型，如果我係嗰個女仔，依一世都忘記唔到老闆。」
 
聽了曹麗莎和史丹菲這番話，讓坐在電視機前的我與布正麗不禁有點尷尬。
 
片晌，布正麗輕聲地道：「咁…當時你又幾型嘅！」
 
我不敢與布正麗對視，只是輕輕地嗯了一聲，目光落在窗外，恰巧看到窗外懸掛的衣物，在那堆衣物當中，有一條少女甚濃的hello kitty內褲，那內褲的主人當然不是我和布世伯。
 
這條內褲讓我勾起多年前的回憶，那時南乳向布正麗下了藥，打算迷姦她，幸好我打跑了南乳，再用冷水淋醒布正麗，濕透的布正麗被迫換上建華那套不稱身的衣服，讓她在我面前春光乍洩。
 
布正麗循我的目光瞧去，問道：「出面街有啲咩野望啊？」
 
當她發現我看著她掛在窗外的內褲，嗔罵道：「你變態架？啲底衫褲布有咩好睇啊？」
 
「布甸姐，估唔到妳同以前一樣，咁鍾意hello kitty喎！」
 
布正麗先是一愕，然後瞪著我，道：「你係咪又諗番起嗰陣時嘅野？」
 
我當然知道布正麗所說的是什麼事，但我裝瘋賣傻，反問道：「咩事啊？」
 
「你唔駛扮傻，你個死人樣出賣咗你喇！」
 
被布正麗看穿我的心事，不禁內心一怯，她不依道：「你條友話咗唔提架？」
 
我辯道：「我諗下咋！我無提啊！」
 
「你條仆街！」
 
布正麗不斷以粉拳打我，以掩飾心中的尷尬，而我向後退去，撞在沙發上，整個人躺在沙發上，而她亦失去平衡仆倒在我身上。

以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl