<第叄期實體書,經已有售>今年我三十三歲,回到了1998年 (校園、穿越、奇幻): 第二部曲 Chapter ４６　報社（下）

Chapter ４６　報社（下）
 
偌大華麗的廳房內，聚集了不少富二代，賭桌上的籌碼最少的金額是十萬。
 
此時進行的賭局是二十一點，謝家進牌面是十二點，莊家的柯恩隆的牌面是十四點，莊家的點數不足十七點一定要牌，守尾門的謝家進思慮再三決定要牌，豈料充當荷官的美女給他發了一張十點。
 
柯恩隆呵呵一笑，向其他人道：「殺咗進哥依位大戶，輸俾你地啲細注有咩所謂。」
 
柯恩隆在這一局勝了謝家進三百萬，扣回輸給其他玩家，還有兩百多萬進帳。
 




謝家進冷哼一聲，柯恩隆當莊家的派頭十足，倚紅倚翠，他坐在一名身型高挑的混血模特兒的大腿上，又有一名衣著性感的大台女星為他斟酒，柯恩隆把一塊十萬元的籌碼放進女星的乳溝內，並順勢捏了對方的乳房一下，被摸一下便有十萬元，女星在大台工作月薪只有一萬，她打從心底希望柯恩隆可以多摸自己幾下。
 
充當柯恩隆人肉坐墊的混血模特兒看到女星得到獎賞，扭動身體，不依道：「隆少，人地又要。」
 
混血模特兒的舉動惹起了柯恩隆的慾火，他一臉淫邪，道：「妳依個淫娃，靜間我實私人醒幾十億俾妳。」
 
話畢他的手偷偷探進混血模特兒的內褲內，再把兩枚十萬籌碼放進去。
 
一名充當樓柏奇的陪賭女郎看到同來的兩名女生得到豐厚的獎賞，便向樓柏奇大送秋波，阿諛諂媚道：「Patrick，你又靚仔，又有本事，成個package都好吸引啊！」
 




陪賭女郎豐滿的乳房壓在自己身上，樓柏奇臉上現出厭惡神情，一巴掌摑在對方臉上，道：「妳依啲臭雞成身污糟邋遢，唔好掂我。」
 
樓柏奇這一巴掌打得女郎暈頭轉向，嘴角溢血，血液濺在樓柏奇的名錶上，樓柏奇把六位數字的名錶扔在對方身上，道：「隻錶俾你整到污糟晒，我唔要喇！攞咗隻錶就同我躝！」
 
不認識樓柏奇的人見狀都嚇了一跳，想不到外表斯文的樓柏奇會突然動手打人。
 
與樓柏奇相熟的柯恩隆知道對方有異常的潔癖，不喜歡隨便被人觸碰，所以對此見怪不怪。
 
柯恩隆笑道：「Patrick，你咁唔憐香惜玉啊？唔鍾意嘅話，我咪捱下義氣幫你啃埋囉！你唔駛打人嘅！」
 




樓柏奇用手帕抺拭著自己的雙手，冷哼一聲道：「頭先隻臭雞仲污糟過尿兜，都唔知有無咩病？妖，啲下等人睇錢大過一切，無教養、無尊嚴、無學識，成身污糟邋遢。」
 
樓柏奇的說話非常刻薄，讓在場那些出身基層的人聽起來感到非常嘔心。
 
宛琳珊跟隨柯恩繼與柯麗萍走進廳房，她與那名臉頰紅踵的女郎擦身而過，她記得之前和對方在大台曾經同場演出，她正想和對方打招呼，可是對方只是垂著頭急匆匆離去。
 
宛琳珊走進廳房發現內裡豪門雲集，除了大細界的謝家進、尚燈的柯恩隆、宏遠的樓柏奇外，她認得出的還有神京的二公子寧齊家、方家的富三代方貞光、江氏的江彬、白帝百貨的太子白永俊。
 
白永俊繼續剛才的話題，笑道：「Patrick，你咁鍾意乾淨，但係又咁鍾意行山遠足，唔怕成身臭汗咩？」
 
樓柏奇道：「兩樣野點同呢？更何況我遠足從來唔會過夜，同埋走嗰陣，我會坐直升機返屋企沖涼。」
 
江彬道：「Patrick，如果要你唔沖涼三日，你頂唔頂得順？」
 
樓柏奇搖著頭道：「緊係唔得啦！由我懂性嗰日，我一日最少沖三次涼，我唔會去啲無得沖涼嘅地方。」




 
寧齊家倏地煞有介事，道：「當日ricky俾葉炳強綁就試過三日無涼沖。」
 
樓柏奇皺著眉道：「martin，仲乜突然講依啲野啊？」
 
方貞光道：「martin同ricky哥就最老死，ricky哥出事之後，都無再出席公子會嘅聚會喇！睇嚟有好大心理陰影」
 
謝家進插言道：「ricky都唔算傷啊！雙哥先慘，俾葉炳強虐待幾日，放返之後，到依家仲要睇心理醫生。」
 
寧齊家道：「阿隆，聽講當年葉炳強都打過你屋企主意喎？」
 
柯恩隆道：「係啊！當年好在活佛同我伯爺講全家人唔好出門一個禮拜，嗰陣開會都要叫啲職員嚟我地屋企開，結果一個禮拜後葉炳強就俾人拉咗。」
 
江彬道：「我屋企又無各位大佬咁有錢，就算要綁都唔綁我啦！」
 




方貞光亦笑道：「阿爺留俾我地副身家俾基金佬睇住，每個月出雞碎咁多俾我咋！好彩有進哥射住射住。」
 
樓柏奇冷哼一聲，道：「啲窮人又無文化、又野蠻、又污糟，居然想用暴力去要脅我地攞錢，真係過分，好彩個葉炳強最後被人槍決，依啲就係窮人唔自量嘅下場。」
 
宛琳珊初時聽著公子們的趣聞迭事覺得很吸引，然而之後樓柏奇的階級歧視說話讓她不禁側目，讓她對樓柏奇一向的好印象立時扭轉。
 
這時柯恩隆才發現柯恩繼和柯麗萍的身影，柯恩隆道：「咦！七弟、九妹，你地竟然喺到，我以為你地因為老六單野，仲守緊孝添！出嚟散下心咪幾好囉！人要向前看嘅！」
 
柯麗萍看到柯恩隆這副德性，沒好氣道：「四哥，我地一早嚟咗啦！係你開心得濟，睇我地唔到啫！」
 
柯恩隆笑道：「哈哈，正所謂虎父無犬子，我地爸爸生性風流，我都遺傳佢依一樣野，如果佢唔係咁風流，都唔會有我地啦！」
 
柯恩隆拿出父親來當檔箭牌，柯麗萍只能冷哼一聲。柯恩隆的視線由柯恩繼身上轉到站在其身旁的宛琳珊處，立時眼前一亮，道：「咦！七弟，你平時收收埋埋，原來有位明星仔女朋友。」
 
柯恩繼澄清道：「Rammie唔係我女朋友嚟。」




 
柯恩隆喜道：「咁就啱喇！阿Rammie今晚嚟我屋企啦！我個浴缸好大，張床又好軟架。」
 
宛琳珊想不到柯恩隆在眾目睽睽之下，說話這麼大膽露骨，一時間她尷尬得不知如何應對。
 
柯恩繼有些慍怒，道：「四哥，Rammie係我朋友，唔該你尊重啲。」
 
「ＯＫ，ＯＫ，我做哥哥不嬲愛錫弟妹，唔會同細佬爭野玩嘅！甚至會讓細佬，依到兩條女你揀邊個？」柯恩隆指了指兩名女伴。
 
柯恩繼道：「唔駛喇！四哥，依啲留返畀你啦！」
 
柯恩隆揚了揚手中的籌碼，道：「女人唔啱，駛唔駛俾啲錢你地洗啊？聽講三娘對你地好嚴格，平時無乜錢過你地手。」
 
柯麗萍道：「唔駛喇！四哥，我地都有錢，上嚟係要玩返兩手嘅！」
 




柯恩隆道：「九妹，依到最少都要玩十萬。」
 
宛琳珊聞言不禁吐舌，而柯麗萍亦不禁微微色變，但現在勢成騎虎，只好硬著頭皮道：「好啊！」
 
兄妹同心，柯麗萍下注，柯恩繼怎麼也要支持一下，他同樣買了一門十萬。
 
謝家進已經輸了差不多二千萬，他道：「阿隆，我依鋪落注二千萬得唔得先？」
 
柯恩隆道：「第二個就唔得啫，進哥當然無問題啦！不過進哥，我屋企做賭咁多年，當年華大俠就係想追數，結果成間片場都輸埋俾我地屋企。」
 
謝家進道：「我玩依啲有限錢，又唔係賭身家。」
 
江彬附和道：「進哥成間大細界打晒骰，依啲散紙嘅啫！」
 
美女荷官發牌，謝家進的牌面是十八點，這可以說是他這晚上得到最好的牌，他不再要牌，心想終於要贏回一局。
 
柯恩隆是十五點，根據規矩他牌面不足十七點，要多抽一張牌，於是荷官為他發牌。
 
柯恩隆看到第三張牌時，不禁大樂，道：「進哥，真係唔好意思，嚟隻三畀我喎！莊家食夾棍。」
 
謝家進見狀用力搥打賭桌，道：「有無搞錯？咁都輸。」
 
這一局除了柯麗萍和柯恩繼外，其他玩家都輸給柯恩隆，不過他們的下注金額
只是謝家進的百份之一，看著謝家進輸得那麼慘，他們臉上都隱隱地漾出幸災樂禍的微笑，彷彿剛才那一局是自己贏了。
 
柯恩隆這一局進帳二千萬，身旁侍候的兩位女郎當然得到打賞。宛琳珊看到對方出手那麼闊綽，便不禁想如果自己向對方賣好，應該也同樣會得到優待，不過她還是放不下身段，在眾目睽睽之下，成為柯恩隆的一件玩物。
 
柯恩隆道：「進哥，爸爸成日同我講，賭錢要贏就要做莊，馬交政府開放賭牌，你地大細界同我地尚燈合作，攞多個賭牌，咁我地咪可以齊齊搵錢囉！」
 
謝家進搖著頭道：「咪喇！上次信咗你同柏奇合作搞酒店，差啲要賠成百億。」
 
柯恩隆道：「進哥，上次係柏奇牽頭搵靈都幫手，我一早話靈都信唔過架啦！」
 
樓柏奇嘿嘿笑道：「隆少，上次係你拍心口話幅地皮無問題，要進哥出高一倍價錢買落嚟架！」
 
柯恩隆道：「唏！最尾進哥有本事同靈都和解，舊時嘅野唔好講喇！講經營賭場我地柯家係專家，進哥，你屋企一直都想搞賭場架！依個好機會嚟嗰喎！我地另組公司，兩兄弟拍住上，每年等收錢啦！」
 
謝家進被柯恩隆說得心癢癢的，道：「依啲野第日先講啦！依家輸成四千幾萬，我要追數啊！」
 
柯恩隆道：「其他咁多位有無興趣入股，一個賭牌，每年講緊嘅純利係以十億計。」
 
江彬和白永俊聽得兩眼放光，表示有興趣參與；寧齊家興趣缺缺地搖了搖頭；方貞光則道：「我屋企每個月都係俾嗰份錢我，我無能力拍住大家搵食。」
 
柯恩隆轉向樓柏奇，道：「柏奇，你呢？」
 
「公司啲野都係我阿爸揸主意嘅，咁大件事我決定唔到啦！」
 
樓柏奇口裡這樣說，其實他們已經秘密行動，要在馬交政府開放賭牌一事上分一杯羹。
 
柯恩隆道：「合作賭牌嘅事，各位就返去考慮下啦！賭局就繼續，進哥，你依鋪諗住買幾多啊？」：「
 
謝家進正在苦惱應該要大注一鋪追數，還是小注出擊的時候，驀地想起一件事，連忙喝止道：「唔好派牌住，我要叫個朋友上嚟。」
 
謝家進在一名服務生耳邊輕聲道：「即刻落去同我叫成皇志上嚟！」
 
服務生通知我，說謝家進要我立即到廳房見他，初時我還以為他要那些富豪朋友在我的報紙登廣告。
 
我跟隨服務生走進了廳房，看到了多位城中的富家公子，柯恩隆道：「進哥，佢就係你要我地等嘅人嗱？人都上咗嚟喇！你落得注未啊？」
 
謝家進道：「阿志哥仔，我手風唔順，依家輸緊四千萬，你有神通之力，要幫幫我啊！」
 
我聞言不禁愣住了，柯恩隆笑道：「進哥，乜原來你等嘅人係賭神嚟架？係咪叫做今晚打老虎啊？」
 
眾公子發出一陣譏笑。
 
謝家進道：「依位係我新交嘅朋友成皇志，之前佢有份幫我同靈都和平解約嘅！」
 
白永俊道：「哦！我記起喇！之前佢預言話美國恐襲，俾佢講中咗；魔警案又講中咗邊個係兇手。」
 
柯恩隆笑道：「進哥，你請個風水佬嚟幫你賭錢？風水佬掂嘅話，佢地就晨早發咗達啦！」
 
「靈唔靈轉頭咪知囉，依鋪買住五百萬先。」謝家進轉向我道：「志哥仔，你要幫我贏啊！如果輸咗我會好無面架！」
 
我聞言感到傻眼，怎能夠這樣的？我從２０１６年回到這裡，只記下了部份的世界大事，你謝家進某年某日和某公子進行賭局的事情，我怎可能知道？而且我的賭術完全不行，怎會有把握贏錢？
 
我還未反應過來，荷官已經在派牌了，謝家進的牌面是十四點，謝家進道：「志哥仔，點啊？要唔要牌啊？」
 
雖然謝家進現在的點數是十四點，多要一張牌只要是七點或以下便是安全，從概率來看，爆煲的機會較為低，可是謝家進今天輸了四千萬，他的運勢這麼糟糕，他要的牌並不是什麼好牌。
 
謝家進完全指望我，這已經勢成騎虎，無論如何這一場賭局輸贏我都是脫不了關係的。
 
既然如此，我便裝出一幅成竹在胸的樣子，搖了搖頭，道：「謝生，夠架喇！唔駛要牌喇！」
 
柯恩隆的牌面是十三點，所以他要牌，荷官替他發了一張牌，居然是三點。
 
謝家進見狀不禁抱怨道：「係三仔啊！早知要啦！」
 
現在柯恩隆的牌面是十六點，因為他是莊家，未滿十七點的情況下，他要繼續要牌，荷官繼續為他發牌，豈料來的是一隻六，加起來是二十二點，爆煲！
 
謝家進興奮地拍打著我的肩膀，道：「志哥仔，贏咗喇！贏咗喇！」
 
家族經營賭場的柯麗萍，對博彩的知識比一般女生豐富，輕聲道：「七哥，你覺唔覺得頭先鋪牌幾有趣啊！」
 
「九妹，妳都留意到啊！」柯恩繼道：「如果頭先成皇志要牌，佢就十七點，之後佢再要牌就廿三點，爆煲！但佢唔要牌，莊家要牌，莊家就十九點，所以頭先成皇志正確揀啱咗唯一可以贏嘅選擇。」
 
在旁的宛琳珊聽到柯氏兩兄妹的對答，心想原來成皇志的賭術這麼厲害。
 
謝家進道：「嗱！係咪啊！我都話志哥仔有道行啦！佢同神仙有緣，今晚我有神仙照住，實可以反敗為勝。」
 
我自家知自家事，剛才只是一時好運，難保幸運女神會一直眷顧自己，道：「謝生，你都贏返五百萬啦！不如留返下次先追數啦！」
 
柯恩隆道：「進哥，你開始轉運，唔係依家千唔玩啊？」
 
「邊個話架！就過你三口，依鋪第二鋪，一千萬。」
 
謝家進口中說三局，可是他追回了輸的本金，仍然繼續賭下去，結果還真的給他倒贏了柯恩隆數百萬，不知是柯恩隆運滯，還是謝家進好彩，謝家進每局牌的點數總是僅勝。
 
柯恩隆亦覺得邪門，道：「有無咁邪啊！牌又換過，荷官又換過，都鋪鋪輸，咪喇！我投降唔玩喇！返屋企瞓覺算喇！」
 
話畢柯恩隆領著兩名美女離去，看見他深深不忿的樣子，看來回到家中會將一腔怨憤發洩在兩名美女身上。
 
樓柏奇道：「隆少走咗咁邊個做莊啊？阿彬吖！你都未做過莊？」
 
江彬道：「依到屋企最窮就係我，邊有資格喎！係都martin哥先啦！」
 
寧齊家道：「進哥啱啱贏咗咁多錢，又係依到輩份最高，佢唔打莊，邊個有資格打啊？」
 
謝家進意氣風發道：「無問題，打莊咪打莊囉！嚟嚟嚟，買得大贏得大。」
 
寧齊家問道：「成師父，下次賽馬日入嚟馬場吖！你啲玄術咁勁，話俾我地聽邊隻馬跑頭馬吖嘛！」
 
我道：「家師對馬無乜興趣，佢平時同我交流都講下波經。」
 
方貞光插言道：「乜睡仙都對足球有興趣咩？足球我啱啊！佢有無同你講嚟緊歐冠同世界盃邊隊冠軍啊？」
 
方貞光的爺爺方鷹聰是一代梟雄，其子方中庭（亦即方貞光之父）是現任足總主席。
 
雖然來自未來的我知道了那一隊是冠軍，但這種珍貴的情報現在隨便透露便沒有價值，於是我藉此將話題轉入我來這裡的目的。
 
「依層師父仲未同我講，其實嚟緊我會同其他人創辦一間報社，都有構思去為世界盃做一個專題。」
 
白永俊道：「成師父，你都幾多才多藝喎！又係藝人、又係堪輿大師、依家仲搞埋報社。」
 
我道：「我搞嗰份報紙係免費報嚟，要多啲廣告商落廣告先可以收支平衡，所以今日跟謝生嚟，係想搵各位支持下嘅。」
 
宛琳珊聞言不禁搖頭，成皇志的銷售技巧真的差勁，這樣說那些富家公子怎會理睬他呢？
 
果然樓柏奇道：「成師父係進哥嘅朋友，亦即係我地嘅朋友，之但係朋友還朋友，生意還生意，我地俾錢落廣告係要睇效益嘅！如果遲啲成師父份報紙搞得有聲有色，就算你唔開聲，我地都主動搵你合作。」
 
江彬點頭道：「係啊！成師父，等你份報紙流通性夠廣，實大把人搵你落廣告啦！」
 
方貞光道：「係啊！成師父，你識神通，寫啲生肖運程實多人睇。」
 
我道：「報紙報導嘅係已經發生嘅事，唔係預言書，我手頭上有唔少猛料，諗住係創刊嘅時候刊登，例如某闊少與中年女星相戀……」
 
江彬聞言不禁色變。
 
「…某地產商夥同黑社會暴力收地…」
 
寧齊家神色有點不自然。
 
「…某富婆秘密包養男明星……」
 
樓柏奇的臉頰抽動了一下。
 
＊＊＊
 
賭局完畢，我與謝家進一同離去，謝家進滿臉堆歡道：「志哥仔，你真係我嘅幸運童子，之前次次同班友賭我都輸到甩褲，你嚟咗之後十鋪贏咗九鋪，頭先阿隆條仆街仔嬲到半路走咗，真係睇到我好開心，平時佢叫我『慈善賭王』，輸錢俾佢地仲要谷住道氣，以後你真係要多啲陪我嚟啊。」
 
「謝生帶我嚟香港會玩，我高興都嚟唔切啦！之但係我衣著寒酸、身份低微，驚影衰謝生啫。」
 
「阿志哥仔，你咁講野啊！你幫到我，我唔會待薄你嘅！以後有咩需要就直接同我講。」
 
有謝家進這句說話，以後有事要拜託他時便方便得多了。
 
「多謝，謝生。」
 
「嚟緊我伯爺擺大壽，你嘅飲返兩杯，我到時介紹多啲人你識。」
 
謝金龍地位極高，到時他的壽宴城中富商政要、社會賢達定必出席。
 
「多謝，謝生。」
 
「大家朋友，多咩謝？」謝家進疑惑道：「講返頭先，估唔到martin佢地咁豪爽落廣告去你到，平時佢地都係算死草嚟嘅，唔通食錯咗咩藥？」
 
我向那些公子明示有他們本人及其家族的醜聞，那些公子才願意在我的報紙上刊登廣告作為「揞口費」。秦漢滔搜羅了那些富商的黑材料，原意是成為那些富豪入罪的佐證，現在並變成我和他們交易的一種把柄，雖然是有悖對方原意，可是我覺得就算公開這些「罪證」，作用亦十分有限，香港法制的不健全，只是成為當權者和富豪壓榨平民的工具，並不是約束他們的武器。
 
我道：「我諗佢地因為睇住進哥份上，先肯答應落廣告喺我份報紙到。」
 
謝家進驚喜道：「乜係咁咩？佢地真係睇在我份上？」
 
「當然啦！頭先連寧家二少都話你係佢地當中輩份最高。」
 
謝家進一面點頭，一面微笑，道：「阿志哥仔，你住邊啊？我叫司機車埋你啦！」
 
「唔駛客氣喇！謝生，我要返工作室，叫咗助手嚟車我。」
 
與謝家進別過後，我走到德輔道中等候霍去登駕車來接我走，驀地有人在身後喊道：「你係成皇志？」
 
我聞言緩緩轉身，發現剛才大鬧香港會的王耀暉站在我身後。
 
王耀暉道：「我知道你有神通，你可唔可以幫幫我？話俾我聽點先可以過到依一關。」
 
我瞪著他，思慮了一會，搖頭道：「王生，如果你想過番以前咁風光嘅生活，我諗應該好難，我諗你做返一個普通人會開心啲！」
 
「做返普通人？我點可能做得返普通人啊？」王耀暉怒道：「你依個無料嘅神棍，講啲野一啲都唔準嘅！」
 
王耀暉忿然轉身，我看著他的背影，不禁有些唏噓，他成功時意氣風發，現在遇上挫折時潦倒困窘，這刻他的人生谷底仍未到達，還有很多的厄運等待著他。
 
驀然我想到他身上還有很重大的價值，可以幫到我那份將會創刊的報紙，於是我走上前喊道：「等陣啊！王生。」
 
王耀暉別過頭來，我遞上自己的卡片，道：「王生，你有無聯絡方法，或者第時有啲乜野，我地可以互相合作。」
 
王耀暉想了想，收下了我的卡片，冷哼一聲便離去。
 




以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl