<第叄期實體書,經已有售>今年我三十三歲,回到了1998年 (校園、穿越、奇幻): 第二部曲 Chapter ４５　報社（中）

Chapter ４５　報社（中）
 
范孝直提議我們創立的報章由原本傳統的收費報紙改成免費，又建議我們與地鐵公司合作，在每個車站放置取報的箱架，好讓乘客自助取來閱讀。孔令揚把這些一連串建議向辜先生匯報，辜先生再三思量，接受了范孝直的方案。不過要創立免費報紙有兩個主要問題要解決，第一就是要遊說地鐵和我們合作；第二就是要拉攏廣告商在我們的報紙上落廣告。第一個問題辜先生會和范孝直去解決，第二個問題就交由我去解決。
 
之前我幫助了謝家進一個大忙，他欠了我一個人情，現在我要他幫忙，應該不會拒絕我吧？
 
我致電給謝家進道出來意，謝家進爽快答應道：「志哥仔，乜你學人辦新聞紙咩？聽講做報紙嘅唔係咁好境咋喎！有唔少都要執粒，不過你搞得報社，我點都支持下嘅，落份頭版廣告賀下你啦！」
 
「謝生，咁多謝你先。係呢！唔知謝生可唔可以問下其他富豪朋友支持一下呢？始終我地依啲傳媒都係要靠你地啲大老細射住。」
 




謝家進聞言沈吟半晌，倏地道：「啊！志哥仔，不如咁啦！聽晚我地公子會會喺香港會有飯聚同賭局，嗰到有好多商界朋友，你跟我去打個白鴿轉，話唔定會有收穫呢。」
 
儘管我最近忙於新專輯和電影的事宜，再加上我不太喜歡應酬，可是為了即將創刊的報章，我只好陪同謝家進出席這些宴會。
 
香港會是香港四大高級會所之一，香港會位於中環遮打道，據聞在七十年代初才接受非白人會員加入，其會內的會員都是非富則貴， 這晚我叨了謝家進的光，才能走入這只屬於上流人士的階級殿堂。
 
香港會內的裝潢奢華、職員服務殷勤、提供的食物酒水都是一流的，不過我覺得這會藉最值錢的是給予人們高人一等的感覺，周遭的賓客不是上流名媛，就是達官貴人，置身在這會場內，就是一種身份的象徵。
 
我首次來到香港會，對這個充滿傳奇性的會所有著強烈的好奇心，我不斷四處打量周遭的景況，沿途不斷有人熱情向謝家進打招呼問好，這些人流露出一副阿諛奉承的樣子，我認出有位是與大細界有生意往來的企業老闆。
 




這時有位男人喊道：「進哥！進哥！」
 
我循聲瞧去，與那男人打了個照面，不禁嚇了一跳，那人赫然是有女星殺手之稱的王耀暉。
 
謝家進臉色一沉，道：「阿暉，你仲嚟做咩啊？」
 
王耀暉笑道：「進哥，我雖然依家兜踎，但我都係香港會嘅會員嚟！」
 
謝家進嘆道：「阿暉，我一早同你講過你同我伯爺嘅事，我幫唔到手，大家一場朋友，你搵我風花說月，我歡迎嘅。」
 




「進哥，你幫到手嘅，你當我朋友就幫我度過依一關先，對於你嚟講嗰個數都唔係錢，你上次鬥地主，輸俾柏奇同阿隆都幾千個啦！」
 
王耀暉當面說出謝家進糗事，謝家進臉色陣紅陣綠，道：「就算我伯爺唔駛你還住，又有咩用？仲有柏奇伯爺嗰筆呢？你爭落通街街數，都係你自己攞嚟，你有十幾億身家唔知足，充大咗個頭。」
 
王耀暉用手指著自己，道：「你接掌大細界買乜輸乜，有咩資格話我？我輸唔係因為我唔得，而係個天唔鍾意我，如果我老豆係龍叔一早成功咗啦！」
 
王耀暉不由情面地數落謝家進，讓謝家進氣得臉色鐵青。
 
此時二人的爭吵已經驚動了其他人，身為主人公的樓柏奇與數名保安走了過來，他瞧見王耀暉，怒道：「喂！你唔好嚟依到搞串個party，香港會係你依啲下等人可以嚟嘅咩？你無鏡都屙篤尿照下自己個衰樣啦！保安趕佢出去！」
 
「王生，請你離開！」
 
王耀暉瞪著一眾保安員，道：「我係香港會嘅會員，你地無權趕我走。」
 
樓柏奇不屑地道：「以前就係，依家你想係到飲杯水都無資格啊！本身你乖乖地做我地隻狗，都可以俾番啖飯你食，但係你唔知足，妄想同我地幾家人平起平坐，最後咪連屎都無得食囉！」




 
被眾保安拉走的王耀暉，咒罵道：「樓柏奇，你全家生cancer，不得好死啊！」
 
樓柏奇聳了聳肩，輕蔑道：「狗即係狗，淨係識得吠。」
 
樓柏奇是環捷集團主席樓敬龍之子，相比起在脂粉叢中打滾的父親，樓柏奇可謂收斂得多，外界對樓柏奇的印象：年青、俊朗、多金是城中出名的「筍盤」，但今天一見讓我了解到他的另一面。
 
富豪間亦有級數之分，就如食物鏈一樣，一般富豪奴役夾心階層和基層，一般富豪亦只可以接受食物鏈更高階的超級富豪所支配，就好像剛才那個王耀暉一樣，超級富豪可以捧起他，亦可以讓他永不翻身。
 
樓柏奇看見謝家進仍然氣鼓鼓的樣子，便道：「進哥，唔駛同依啲契弟勞氣嘅！上去廳房，我同隆少等你好耐喇！」
 
謝家進點了點頭，道：「今次我唔玩鬥地主，玩其他。」
 
「得得得！進哥，你點話點好啦！」
 




謝家進一言不發跟著樓柏奇到廳房，把我留在宴會廳裡，可能在他們這些超級富豪眼中，我如同王耀暉一樣，只是依附他們為生的狗。
 
謝家進走上廳房後，我獨個兒在宴會廳行逛，這時有人從身後拍打了我的肩膀一下，我回頭發現居然是蔣學勤，蔣學勤喜道：「成皇志，估唔到會喺到見到你？你都入咗香港會？」
 
我尷尬地道：「我又唔係乜公子哥兒、達官貴人，有咩資格加入香港會喔！係謝生帶我嚟咋！」
 
蔣學勤訝道：「謝生？大細界嘅謝家進？」
 
我點頭道：「係啊！我搞緊份報紙，希望得到多啲廣告商喺我份報紙上面落廣告，謝生就帶我嚟搵佢啲朋友幫下手。」
 
「乜你打算搞報紙咩？」蔣學勤慨嘆道：「唉！依一年變化真係好大，一年前你仲係我地公司嘅員工，如果唔係發生咗嗰件事，你都唔會離開dream music，我、你、光義三個一齊打天下，你話幾好呢？不過依家見到你有咁好嘅發展，我都好戥你開心，今次我地公司就走寶啦！損失咗一隻千里馬。」
 
「學勤，你千祈唔好咁講啊！蔣生、蔣太一直對我好好，投放好多資源去陪養我，係我犯錯，得失咗蔣生嘅朋友。其實依家beauty song、golden song同dream music喺樂壇都有唔錯嘅成績吖！」
 
蔣學勤搖了搖頭，道：「光義走咗之後，我地捧嘅新人都唔掂，連帶宛琳珊嘅人氣都大不如前，golden song嘅Bingo同林昌奴都話走，嚟緊掌天下嘅音樂部門都要重組一下喇。」




 
我愕然道：「竟然有啲咁嘅事？」
 
蔣學勤拍了拍我的肩膀，強顏歡笑道：「當初你離開係啱嘅，如果你仲係我地旗下嘅藝人，今日就會面對公司重組嘅問題。」
 
一年前，我因為替宛琳珊出頭，被官幹的人狠狠地暴打一頓，之後再被蔣天殺雪藏，後來全靠阿興我才能夠解約，那時我還以為我的銀色旅途已經到了終點，現在可以創造出這樣成績真的是奇蹟。驀然回首，當初與掌天下解約，真是塞翁失馬，焉知非福。
 
蔣學勤又道：「其實今次我係同宛琳珊一齊嚟架！佢啱啱行開咗。」
 
「唔通你地……」
 
蔣學勤連忙否認道：「唔係你咁樣諗架，我已經有個感情好好嘅女朋友，因為宛琳珊話想嚟香港會見識下，所以我先帶佢嚟咋！」
 
宛琳珊來這裡是為了見識？不會吧？
 




我四處打量，終於讓我發現了盛裝打扮的宛琳珊，此時她與星旺的副總裁易星宿之子易奇通言談甚歡。
 
宛琳珊這隻鳳凰怎會不是無寶不落之輩？
 
宛琳珊與易奇通交流完畢，她發現了我便走過來，道：「成皇志，乜你又喺到嘅！係喎！依排報紙成日影到你同謝家進一齊，應該賺唔少啦！佢帶你嚟架？」
 
「乜妳講到佢好似包養緊我咁架？」我突然想到一個無關痛癢的問題，於是問道：「係呢！如果謝家進話包妳，妳會唔會應承？」
 
宛琳珊瞠目道：「痴線！點可能啊？佢五十歲，仲大過我老豆。」
 
「大細界主席喎！幾百億身家喎！出手一定唔低啦！」
 
宛琳珊試探問道：「出幾錢先？」
 
我罵道：「痴線！妳真係當我係扯皮條咁喎！」
 
「超！原來你玩我嘅！以為你同謝家進咁熟，會有野益我添。」
 
我訝道：「聽妳咁講，唔通有人同妳問過價？」
 
「咁我都叫有啲知名度，實有人打嚟叫我出席飯局，食餐飯有錢收，得閒咪出去應酬下囉！上次食完餐飯仲有登台ＳＨＯＷ，講真做得依行點都要交際應酬下嘅。」
 
我懷疑道：「淨係食飯咁簡單？無再進一步咩？」
 
宛琳珊睨了我一眼，道：「嗰啲agent當然會幫啲老細問啦！但我緊係唔會應承啦！我假假地都叫做攞過女新人獎，不過飯局入面有啲女明星就唔知喇！」
 
「係邊啲女明星啊？」
 
宛琳珊悄悄在我耳旁說出幾個女明星的名字，我咋舌道：「吓！佢好純品嗰喎！係小朋友偶像，唔會做依啲野嗰喎！」
 
「大家係依一行都做咗年幾，我地都見過好多『偽人』啦！有唔少人人前一個樣，人後另一個樣。」
 
宛琳珊中五畢業後便投身入娛樂圈這個人事關係極其複雜的行業，這一年多的經歷讓她看到了很多不同的人事，眼界拓寬了，思想亦成熟了。因為自強會的人大多是求學階段，平常有些工作上的事情找人傾訴亦沒有對象，在娛樂圈亦很少有信任到可以放下戒心傾談的朋友，宛琳珊亦是在娛樂圈工作，我們的關係亦算做友好，所以和她聊天，我便不用提防些什麼。
 
我道：「其實嚟緊我會同人搞一份報紙，所以希望搵廣告商落廣告喺我份報紙到。」
 
宛琳珊上下打量著我，道：「原來你係嚟搵老細。」
 
我亦上下打量著她，道：「大家咁話啦！」
 
宛琳珊嘆了一口氣，道：「唉！真係黑仔，上年我先叫做有少少成績，但係突然遇到啲咁嘅事，公司要重組。」
 
我問道：「其實發生咗啲咩事啫？蔣生投放咁多資源，諗住做樂壇班霸，突然話要重組公司，咁多管理層同藝人要走。」
 
宛琳珊壓低聲音道：「聽講話蔣生上面嘅生意得罪咗人，佢遇到好嘅麻煩，所以都無咩心機理香港嘅生意，搞到全公司人心惶惶。」
 
「上面得罪人？唔會又係嗰三兄弟嘛？」
 
宛琳珊嘆道：「唔係佢地，仲有邊個吖？件事我都係學勤講電話嗰陣我聽到幾句咋！你唔好喺佢面前提起啊！」
 
我點了點頭道：「當然啦，我唔會咁多口嘅。」
 
之前蔣天誅幫助我而得罪了三官，不知與這件事有沒有關係呢？
 
我問道：「係呢？妳頭先同易奇通傾咁耐，係咪打算轉會啊？」
 
宛琳珊點頭道：「嗯，星旺始終係大公司，如果可以加盟就最好啦！我唔係唔飲水思源啊！但依家公司要重組，我隨時失業，緊係要搵定條後路啦！」
 
我壓低聲音道：「聽人講星旺嘅女藝人，如果要俾公司力捧，要犧牲色相陪老細嗰喎！妳唔怕咩？」
 
宛琳珊訝道：「唔…唔會咁離譜啩？啲人亂講啫！唉！不如你唔好搞報社，搞娛樂公司簽我做藝人啦！」
 
「吓！我做妳老細？我邊有咁嘅本事啊？」
 
「記唔記得讀書嗰陣時，我地都一齊合作過炒賣麥噹噹嘅史露比公仔啦？你咁多諗頭一定可以嘅。」
 
我聞言不禁笑道：「嗰陣時點同啊？炒賣老麥公仔嘅簡單操作，點可以同經營娛樂公司相題並論？娛樂公司涉及嘅資源、人脈、後台，無一樣係我有嘅。其實妳都可以好似我咁，自己獨立發展架。」
 
「我邊到好似你咁多技能：作曲、填詞、寫劇本，仲識埋啲風水玄學，我自己知自己事，我淨係得個樣之嘛！你要我搵贊助同人傾生意，我真係唔得。我只係適合做幕前，其他野我做唔嚟架！」
 
宛琳珊說得沒有錯，當年炒賣麥噹噹公仔的主意是我出，協調工作亦是我，她只是聽我的指示做事。
 
這時宛琳珊發現到她的「獵物」，便道：「成皇志，我見到熟人，轉頭再講。」
 
＊＊＊
 
今晚的上流人士派對，柯家除了二房的恩隆前來玩樂外，三房的恩繼和麗萍亦前來這個聚會。
 
兩人的兄長恩承意外身亡不久，他們還未收拾心情，可是他們的母親要他們多出外走動，不要讓別人以為他們這一房人意志消沉，成不了氣候。
 
「七哥，恩隆係上面廳房同其他人賭緊錢，我地係咪要上去打過招呼啊？」
 
「轉頭先啦！你知佢嘅說話不嬲都唔好聽架啦！」
 
宛琳珊走到兩人身前，道：「柯小姐。」
 
柯麗萍道：「Rammie（宛琳珊的英文名），又會喺到見到妳嘅？七哥，記唔記得Rammie啊？上次我地新酒店開張佢嚟做表演嘉賓呢？」
 
宛琳珊在娛樂圈浸淫了一年，星味漸濃，二九年華剛剛踏進成人的階段，蜜桃初綻，正是人生最亮麗燦爛的歲月。
 
身在上流社會的柯恩繼，每天見盡美女，都被宛琳珊獨有的香骨和病態美所吸引。
 
柯恩繼對宛琳珊當自己酒店的開幕嘉賓一事並沒有印象，道：「係咩有啲咁嘅事？可能嗰日我太忙，錯過咗同Rammie見面。」
 
柯麗萍笑道：「Rammie係麗華最鍾意嘅兩個明星之一，如果佢知道妳嚟咗，佢一定要跟住嚟。」
 
宛琳珊好奇問道：「係呢！柯小姐，Laurinda另一個最鍾意嘅明星係咩人啊？」
 
柯麗萍道：「成皇志。」
 
「成皇志，佢今日都有嚟啊！就係嗰邊咋！」
 
柯恩繼聞言表情有點異樣，成皇志之前預言９１１的發生，柯麗華深信成皇志的話，苦勸柯恩承不要到美國，他還覺得成皇志鬼話連篇，豈料柯恩承最後陰錯陽差搭上了那架死亡航班，屍骨無存。
 
宛琳珊續道：「柯小姐，柯先生，其實嗰次酒店開幕唔係我地第一次見面，唔知你地有無印象三年前香港花蕊展呢？我就係其中一個賣Macaron嘅攤位幫手。」
 
宛琳珊提起三年前的花蕊展，柯恩繼的心湖立時浮起了布正麗的臉容，布正麗的身影不時出現在他的夢中，他不知道為什麼只與對方碰過一次面，便對布正麗的印象那麼深刻？
 
柯恩繼隨口問道：「係呢！妳係咪有個同學叫布正麗？佢依家點啊？」
 
宛琳珊訝異道：「柯先生，你識布正麗嘅咩？佢去咗台灣好少返香港。」
 
「哦！原來佢去咗台灣喇！」
 
宛琳珊看到柯恩繼聞得布正麗到了台灣後，現出一副悵然若失的樣子，心中昇起了一股妒嫉的醋意，在讀書時布正麗在校花榜壓在自己頭上，現在柯恩繼又在自己面前流露出對布正麗不捨的情感，難道自己永遠只能夠屈居在布正麗之下？
 
柯麗萍道：「七哥，我地係咪要上去同恩……四哥打個招呼啊？」
 
柯恩繼嗯了一聲，然後指了指樓上的廂房道：「Rammie，有無興趣跟我地上睇下？」
 
宛琳珊問道：「我見好多名人上咗去，但樓梯又有保安把守住，究竟係做咩啊？」
 
柯恩繼道：「上面嘅賭局注碼隨時過千萬。」
 
宛琳珊聞言咋舌，她一向喜愛錢，對這些窮奢極侈的富豪們打牌耍樂都動輒千萬元上落的玩意很有興趣，於是便跟隨兩人走上樓上。
 
＊＊＊
 
我取了一些食物和酒水坐在泳池邊一旁享用，剛剛看到宛硃珊跟隨柯家兩兄妹走上廳房。周遭的公子哥兒、名媛淑女聊著他們的優渥生活，話題不外乎名車鑽飾、美滋年的美酒佳餚，我與他們的話題格格不入，也好我的性格也不是喜歡應酬，坐在一旁靜靜地大吃大喝也好。
 
「你好，請問你係咪成皇志先生？」一個男人說著半鹹淡的廣東話。
 
我抬頭望了一眼，那是一張陌生的中年大叔臉孔，大叔理著一個小平頭，穿著ＰＯＬＯ衫、吊腳褲、皮鞋，腋下還夾著一個皮包。
 
我對這位大叔完全沒有印象，難道他是我的歌迷？
 
我向他點了點頭，道：「你好。」
 
中年大叔從皮包取出卡片遞給我，繼續以半鹹淡的廣東話道：「依個係我張卡片。」
 
我接過卡片，看到卡片上的文字，不禁愕然道：「你就係仁泰集團嘅向仁泰？」
 
向仁泰同樣訝然道：「你識得我咩？」
 
在我穿越來這個時空前，向仁泰的仁泰集團是一間市值千億的內房公司，不過現在的仁泰集團成立不久，知名度連官商的華山集團亦遠遠不及。
 
我點頭道：「我睇報紙知道向老闆係一個白手興家嘅實業家。」
 
向仁泰呵呵一笑，道：「成先生，你嘅威名先係如雷貫耳，之前居然被你批中咗美國喺邊一日發生恐怖襲擊，真係厲害！聽聞成先生仙緣深厚，同睡仙陳搏結下師徒情緣。」
 
我道：「我都係轉述家師嘅說話，講出嚟希望世人可以趨吉避凶，係一種善舉嚟。」
 
原來是我那種掌握歷史軌跡的能力讓向仁泰認識我，難道他有事情要我幫忙？
 
向仁泰點頭道：「係嘅，係嘅，睡仙真係好有善心。既然睡仙咁有善心，唔知可唔可以為我指點迷津呢？」
 
「向先生最近遇到唔順心嘅事？」
 
向仁泰說出他的難題，仁泰集團的急劇擴充出現了債務危機，他希望來香港尋求香港富商的幫助，好讓集團能度過難關，他找了謝金雄和樓敬龍，可是對方請他吃了閉門羹，於是他打算向他們的兒子入手，聽說那群富二代會在香港會定期舉行派對，便前來碰碰運氣。
 
向仁泰道：「成先生，頭先我見你同進哥一齊嚟，唔知你可唔可以幫我同佢講，我想見佢呢？」
 
我沉思了片晌，才故作神秒，道：「向先生，因為你個情況較為特殊，我怕就咁約你同謝生見面，未必幫到你，我要返去稟報師父，等師父進一步指示。」
 
我越裝作煞有介事，向仁泰應該會越恐慌。
 
果然向仁泰一臉驚懼，道：「成先生，我係咪有啲咩麻煩？」
 
我拍了拍向仁泰的肩膀，道：「向先生，我有你聯絡方法，等師父佢老人家報夢俾我之後，再同你聯絡。」
 
仁泰集團在十多年後可是價值千億的巨企，我要好好把握這個機會和對方拉上關係。


以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl