<第叄期實體書,經已有售>今年我三十三歲,回到了1998年 (校園、穿越、奇幻): 第二部曲 Chapter ４４　報社（上）

Chapter ４４　報社（上）
 
我對報社這方面一無所知，為了加深對紙媒的了解，章子喬向我引薦了資深的傳媒人范孝直。
 
今天，我們相約在東方文華的咖啡廳見面，辜先生亦派出他的心腹孔令揚陪同我們。
 
孔令揚是一位四十多歲的中年人，外表是那種不苟言笑的人；而范孝直與孔令揚年齡相若，皮膚黝黑、一臉鬚渣，給人爽朗沒架子的感覺。
 
章子喬為我們雙方介紹，我與孔令揚握手，道：「幸會、幸會，唔好意思，今日遲到。」
 




范孝直笑了笑：「唔緊要，你依啲歌影視紅星，走埋入玄學，仲要搞埋報社，我都知道你忙架喇。」
 
孔令揚道：「范先生，我聽過你嘅大名，波斯灣戰爭爆發嘅時候，你去過做戰地記者，又攞過國際新聞自由獎，之後又做過每天日報嘅總編輯。」
 
我聞言感到錯愕，原來眼前這位大叔是這麼有來頭的。
 
范孝直笑道：「睇嚟孔先生你對依一行都有好深嘅認識。」
 
孔令揚道：「我之前都喺依一行做過一段時間，但當然遠遠無范先生咁資深啦！」
 




我們將要成立報社一事向范孝直說，他聞言道：「嗯，恕我直言，其實依家紙媒競爭好大，如果用傳統方法去做係好難做，我怕你地堅持唔到太耐就要離場。」
 
孔令揚道：「范先生，以你喺依行咁多年嘅經驗，你有啲咩意見？」
 
范孝直道：「我聽你地所講投資嘅金錢、人手同規模，講真只係一啲小規模嘅報社，基本上市面嘅報紙已經囊括所有唔同類型嘅讀者，就算你用到明星效應，個賣點都唔係咁吸引。喺外國我見到車站派發一啲免費報紙，內文大約有廿零三十頁，我覺得以你地嘅人手同資金係適合咁做。」
 
孔令揚一臉為難道：「吓！蛇果咁大間報社都收三蚊，我地無佢地咁財雄勢大，仲要免費，我怕我地報社未必捱到。」
 
范孝直道：「廣告先係報紙嘅主要收入來源，如果你地免費，讀者群自然會好多，咁自然令廣告商肯落廣告。」
 




孔令揚沈思了片晌，才道：「范先生嘅提議，不無道理，我返去會向辜先生匯報，唔知范先生有無興趣加入我地呢？」
 
范孝直瞧向我，道：「依層要問下會長喇！」
 
我訝異道：「乜你係自強會嘅會員嚟咩？」
 
范孝直點頭道：「前日先入會。」
 
我喜道：「當然歡迎啦！有范先生咁有經驗嘅人加入，我地嘅報紙一定會做得更好。」
 
孔令揚道：「咁就好喇！我相信我地嘅團體一定會同范先生合作愉快，不過你頭先提到嘅廣告商，有咩辦法可以說服到廣告商可以喺初期已經落廣告呢？」
 
范孝直道：「依層就要我地會長親自出馬喇！佢識得咁多商人，自然佢親自出馬去遊說，我相信會有唔少廣告商落廣告去我地到。」
 
我愣然指著自己道：「我！」




 
＊＊＊
 
之前與六嬸見面後，不知為何她對我的印象很好，人面甚廣的她很喜歡舉辦一些名人飯聚，不時邀我出席。
 
一次晚宴，大細界的謝家進是其中一名坐上客，席間上陸嬸為我引薦。
 
雖然在娛樂圈打滾了一整年，我的眼界已經開闊了不少，但與這種級數的超級富豪打交道還是第一次。
 
謝家進是一位很出名的敗家子，生意買賣經常虧蝕，富豪們在背後取笑他遴迍、扶不起的阿斗。
 
我看著這位年約五十，外貌敦厚的男人，一時間不知用什麼方式和他打招呼，他搶先道：「我有留意你嘅新聞，聽講你睇風水好叻。」
 
我有點錯愕，道：「其實風水嗰方面我唔太在行，不過我就有啲仙緣。」
 




謝家進壓低聲音道：「唔知你有無啲方法可以為我改運，依排我有啲運滯，頭頭碰著黑。」
 
身為大細界這種數百億巨企的主席，謝家進沒有半分運籌帷幄的企業家風範，居然在公開場合向我這個首次見面的人求助。
 
我道：「謝生，你大細界集團咁大規模，旗下一定有好多能人異士為你排憂解困，究竟你遇到啲咩事？」
 
謝家進忿忿不平道：「嗰班擦鞋仔廢架！平時淨係識得拍馬屁，一遇到困難要用佢地，就交唔到功課。」
 
我看了看四周，道：「謝生，不如搵個靜啲嘅地方，我地再慢慢講啦！」
 
六嬸的豪宅很寬敞，我們走到一處僻靜的地方，謝家進向我娓娓道出他的煩惱：
 
謝家進接手了家族集團一直希望大展拳腳，以證明父親的決定正確，他一上場向外收購了不少資產，可是他的眼光一般，作出的買賣多半是虧損的，最近他與一班富二代朋友投資酒店項目，他在這個項目投資涉及的金額以百億計，但豈料他所買下那幅地皮的土地用途不可以發展酒店，他與建築商靈都集團簽下了合約，如果毀約的話，隨時要賠償數十億。
 
這些合約糾紛、土地政策我是一竅不通，而且我那種預知未來的能力，也未能在此事上有任何作用，看來我是幫助不了謝家進。




 
謝家進怒道：「一日最衰都係樓柏奇、柯恩隆，佢地競投咗個發展項目，但又唔睇清楚，淨係識叫我注資，毀約嘅話，靈都告嗰個係我，唔係佢地；輸錢嗰個係我唔係佢地。」
 
我聞言不禁愕然，聽謝家進所說好像是樓柏奇、柯恩隆與靈都一起合謀欺騙他一樣。
 
謝家進繼續向我抱怨，他話畢我更加肯定是柯恩隆等人合謀欺騙他一樣，那幅地皮是柯恩隆遊說他買下，而靈都就是由樓柏奇牽頭的，最讓我訝異的是樓柏奇、柯恩隆這些城中的富二代最少要比謝家進年輕十載，樓柏奇的父親樓敬龍要稱呼謝家進的父親謝金雄為叔父，謝家進居然被這些年齡矮了一截的晚輩瞞騙，難怪人家在他背後取笑他為阿斗。
 
我試探道：「謝生，你覺得會唔會係佢地夾埋靈都嚟呃你啊？」
 
謝家進皺著眉，搖頭道：「點會啊？我地屋企係世交嚟，我睇住佢地大，點會呃我啊？」
 
謝家進這麼說，我也無謂枉作小人再說什麼。
 
謝家進再問道：「係呢？你話你同神仙有緣，有咩辦法可以幫下我？仲有呢！之前我搵過李師父算命、麥師父睇相、再搵埋蘇師父擺風水陣，都無乜作用，爸爸仲鬧我亂咁洗錢。係呢！你幫我，唔知你可唔可以收平啲呢？」
 




謝家進的父叔謝金雄是很出名的孤寒財主，據聞為了慳錢可以在三十多度的高溫、一身西裝筆挺，步行兩公里回公司。
 
我笑道：「乜謝生你無聽過免費先係最貴咩？講真如果真係可以幫到你解決依個問題，我收你貴啲，都係物有所值吖！」
 
謝家進點頭道：「咁又係，我之前已經輸咗爸爸好多錢，如果再輸幾十億，我真係怕激到佢賣鹹鴨蛋。」
 
我聞言不禁好笑，這位百億巨企的掌舵人，居然像犯錯的小孩害怕爸爸責罰那樣，在我這位外人面前真情流露，完全沒有絲毫戒備，不過很可惜我沒有能力幫助他，靈都、樓柏奇、柯恩隆，我對他們之間的商業糾紛完全沒有印象，會不會又是蝴蝶效應衍生出來的旁枝？
 
正當我要推搪自己無能為力幫助謝家進的時候，驀地我想起了秦漢滔交給我的文檔中，好像有關靈都的黑材料。
 
我道：「謝生，咁啦！如果我夢見師父，一定會將你嘅情況轉述俾佢老人家聽
，睇下佢老人家有咩啟示啦！」
 
回到家中，我從保險櫃取出秦漢滔交給我那些記錄了那些達官貴人的犯法記錄，這裡的文檔相信會讓他們很頭痛，但我並不會直接向他們勒索什麼，因為這世上只有死人才能夠保守秘密，我怕他們知道我手上有足以讓他們麻煩的證據，難保他們不會把我幹掉。
 
從秦漢滔交給我的文檔，我找到了靈都的痛腳，原來靈都有數個政府項目出現短樁的情況，相信以此為脅，靈都會對謝家進作出讓步。想來好笑，秦漢滔把這些犯罪證據交給我的目的，應該是希望我用來讓那些犯法的達官貴人得到應有的果報，可是我現在卻用來去維護他們的利益，相信秦漢滔在天之靈一定會懊悔他所托非人。
 
我把這些有關靈都的黑材料交給謝家進，道：「之前家師報夢俾我聽，靈都集團有啲不可告人嘅秘密，於是我搵人去查下，果然俾我發現佢有幾個政府項目都出現短樁嘅情況。」
 
謝家進雖然為人蠢鈍，可是畢竟在商場打滾三十餘年，市場觸覺還是有的，他立時得悉這黑材料的價值，喜道：「你個神仙師父真係有料到，搵到啲咁好嘅野，今次一定可以迫到靈都解約喇！」
 
三天後，謝家進宴請我到他旗下的酒店吃飯，我走進謝家進的專用包廂內，他滿臉堆歡道：「阿志哥仔，我酒店啲吉品鮑就最出名喇！你要試真啲啊！」
 
看著謝家進的樣子，我道：「謝生，咩事咁高興啊？係咪靈都肯無償解約啊？」
 
謝家進笑著搖頭，道：「咁大個項目，我點都要跌啲錢嘅，只係賠咗一億啫！」
 
我不禁咋舌，賠了一億還可以這麼高興請人家吃鮑魚，超級富豪就是超級富豪。
 
我用刀叉品嚐著貴價的吉品鮑，讚道：「謝生，你酒店啲鮑魚真係一流，我未試過食啲咁好食嘅鮑魚。」
 
謝家進笑道：「阿志哥仔，除咗鮑魚之外，我地酒店出品嘅官燕都好出名架！靜間你一定要試下。本身我毀約要賠幾十億，最尾可能未必要賠咁多，但係要打官司，到時上晒新聞紙，我伯爺又唔高興。今次我只係跌一億，佢都讚我做得好，話輸錢唔緊要，唔好做水魚俾人劏就得喇！」
 
原來謝家進罕有地得到父親的贊許，難怪他會這麼高興？
 
謝家進把一個紅包遞給我，道：「嗱！志哥仔，今次你幫咗我，利利是是。」
 
我接過紅包，道：「多謝啊！謝生。」
 
席後，霍去登與姚智風駕駛保母車來接我，我把打包的外賣遞給他倆，姚智風打開外賣盒，道：「嘩！咁大隻鮑魚，有錢佬真係唔同啲，請食飯居然有鮑魚。」
 
「姚少，你唔好一個人食晒啊！留返啲俾我啊！」正在駕駛的霍去登，道：「都話跟鳩爺搵食就無錯架啦！魚翅浪口、鮑魚刷牙。」
 
姚智風邊吃邊道：「係呢！大鳩，嗰個遴迍阿斗搵你唔會淨係請你食飯咁簡單啩？」
 
我皺著眉道：「你喺到講好喇！唔好畀佢聽到你地咁叫佢。」
 
姚智風道：「緊係啦！有錢佬喎！唔驚佢溶咗我咩？係呢！你都未講頭先食飯嗰陣，你地傾過啲咩？」
 
我將剛才與謝家進飯局的事說出，姚智風聞言，興奮道：「嘩！大鳩，你幫佢慳咗幾十億，佢封嗰張利時應該唔細張啩？快啲拆開嚟睇啦！」
 
我敵不過姚智風的糾纏，拆開了紅包，內裡是一張五萬元的支票。
 
姚智風見狀大失所望，道：「嘩！遴迍阿斗都幾孤寒喎！你幫佢慳咗咁多錢，佢喺佢伯爺面前難得威返次，先俾幾雞野你，我仲諗住幾球實走唔甩添。如果你收幾百個大利是，我估你都分多少俾我同阿登啩？」
 
我冷哼一聲，道：「你真係諗多咗喇！」
 
此時霍去登道：「鳩爺過幾日，我朋友搞咗rave party，有好多女都去，你join唔join我地啊？」
 
我搖頭道：「唔喇！依排日日都瞓唔夠四粒鐘，你地玩得開心啲啦！」
 
姚智風道：「阿登，依家大鳩係大明星大紅人，啲女排住隊去搵佢啦！邊似我地咁吖！」
 
霍去登道：「鳩爺，你知我同姚少啦！周身無蚊，屋企連啲似樣嘅衫都無，去依啲party著得寒酸少少，都俾啲女笑，佢地笑我同姚少唔緊要啊！但係間接笑埋你就唔好啦！所以我地想問你借衫。」
 
「嗯，咁你地去我個倉到攞囉！橫豎你地都有鎖匙。」我警告道：「借衫唔係問題，不過要有手尾，唔好整污糟！仲有玩還玩，工作時工作，做野嗰陣上心啲。」
 
霍去登道：「放心啦！鳩爺，我地會識做架喇！正所謂君憂臣勞，君辱……讀得書少，下句唔識，總之老細你放心啦！我同姚少係你嘅關羽張飛，一定會幫你排難解憂。」
 
姚智風道：「係啊！大鳩，我地識咁多年，唔通會害你咩？反而嗰個尚興國，依啲外人，你先唔好咁信佢啊！不過佢走咗都好嘅！」
 
「阿國同我出生入死，外咩人啊？你地唔好再講佢壞話，佢係咩人，我清楚過你地。」
 
霍去登道：「ＯＫ！ＯＫ！唔講就唔講，鳩爺你嘅兄弟即係我嘅兄弟。」
 
謝家進給我的利是算不上大封，可是我並不像姚智風目光那樣淺窄，最少我與大細界的集團主席拉上了關係，日後有事情要拜託對方便輕鬆得多，還有我打包了很多鮑魚和官燕回家，這樣的行為不知叫作有衣食？還是寒酸？
 
我提著一大袋外賣盒回到家裡，我見阿興的房間透著燈光，便喊道：「阿興，有宵夜食啊？鮑魚同官燕做宵夜啊！快啲出嚟食喇！」
 
阿興嗯了一聲，我又聽見浴室傳來水聲，又問道：「阿媽今晚唔係約咗人打麻雀咩？咁早返嚟嘅！」
 
這時水聲漸斂，未幾浴室門敞開，從浴室出來的不是阿媽，只見萬黛以毛巾拭著濕透的頭髮，她瞧見我嚇了一跳，而我看到她從浴室出來亦不禁愕然。
 
萬黛神情尷尬道：「會長，你…返咗嚟啊？頭先…我地游完水，上嚟借你個浴室沖涼啊！」
 
現在也快要十二點了，還游什麼水？而且泳池也有更衣室可以洗澡，為什麼要來這裡洗？
 
我指了指桌上的外賣盒，道：「有官燕同鮑魚喎！一齊食啦！」
 
萬黛道：「唔駛喇！我要趕尾班車返屋企。」
 
阿興從他的房間出來，他的目光迴避著我，他道：「阿哥，我送萬黛去搭車啊！」
 
兩人離去後，我對兩人剛才的神情舉動感到狐疑，扳著手指一算，阿興還未夠十六歲，而萬黛比阿興大上一、兩年，兩人的年齡還這麼小，不會吧？我記得之前的時空，阿興的初戀在中學發生，但那時他要比現在大上兩、三歲。除了年齡外，更讓我擔憂的是萬黛是萬喜的妹妹，之前我還對尚興國說不會在自強會內搞些什麼男女關係，現在阿興跟萬喜的妹子搭上，萬一發生了什麼不得了的事情，我很難和萬喜交代，而且他們萬家是那些圍村望族，如果得罪了他們又是一件麻煩事。我一向不曾過問阿興的感情事，這應如何開口呢？如果布正麗在便可以要她幫忙。
 
話說布正麗在台灣的生活也不容易，一個女孩子生活在異鄉，又要照顧榮仔，想起榮仔我又有些擔憂，究竟他在台灣發生了什麼事？我聽游大輝說回當晚的情況，他們原本已經走脫，榮仔脅持住王炳要他們先走，後來王炳又死在暗巷，究竟發生了什麼事？雖然不能確定王炳的死與榮仔有直接關係，但他是不能回來香港的，黑白兩道都有理由要抓他，本來我是希望榮仔和布正麗到台灣暫避，待我提升足夠的實力，能夠保護他們便讓他們回來，現在我離這個目標已經越來越近，相信一年後湯仲謀即使重獲自由，我亦有能力保護身邊人，可是現在榮仔有了殺人嫌疑，事情便變得更複雜了。
 
一位自己的親弟弟、另一位親如弟弟，兩人都有事情要我去煩心。


以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl