<第叄期實體書,經已有售>今年我三十三歲,回到了1998年 (校園、穿越、奇幻): 第二部曲 Chapter ４３ 自強會改革
Chapter ４３ 自強會改革
忙碌了一整天，現在終於有些時間記下今天發生的事，我抬頭看了牆上標示為2002年的月曆一眼。
那個時空……現在應該是2020年吧？
我在2016年從大廈頂樓躍下，豈料一睜開眼居然回到了1998年，不經不覺間我在這個時空已經生活了四年，不知原來的時空發生了什麼事？阿興、媽媽的生活過得可好呢？
回到過去，有時我也有不真實的感覺，心想會不會現在的經歷，不過是彌留前的幻覺，有一天會嘎然而止，於是我便不定時把發生的事記錄下來。
我相信有不少人幻想過回到過去，去糾正一些以前犯下的錯誤，讓自己可以有更好的選擇。
我翻閱日記，那時我最初回來的目標是要把書唸好，升讀理想的大學，畢業後找一份穩定的工作；可以的話回便追回我的初戀情人管佳莉。
看到這裡我不禁苦笑，原來我當時定下的目標，連一樣也沒有達成。
這可以算是失敗嗎？
人生往往是出人意表，從2016回到1998，我以為掌握住既有的歷史軌跡；然而牽一髮動全身，我的不一樣選擇，產生了蝴蝶效應，讓歷史的軌跡慢慢偏移了，不但影響了我自己，還影響了一些人與事，因為我的出現，未來存在不可測的變數。
翻開了一頁又一頁的日記，重溫這四年來發生的事情：
雖然我未能與我的初戀情人管佳莉再續前緣，慶幸能解開多年的心結，放下執迷，與她成為好友。其後，我還認識了多位非常優秀的女生：呂靜宜、布正麗、楊鳳瑤、柳豔、宛琳珊。
我以伊申清2002的明年今日去參加1998的歌唱比賽；我得知1999年歐冠決賽的結果，在曼聯落後一球的情況投注曼聯反勝，及後又根據我的記憶在2000年
歐洲國家杯狠賺了一筆。
在會考取得了5A1B的成績，我本應原校升讀中六，然而因為我得罪了一個叫湯仲謀的男人，讓我不得不改變人生目標投身娛樂圈。在娛樂圈經歷了高山低谷，在樂壇新人獎與來自寶島的音樂天才鄭倫平分春色、又促成經典電影阿鼻道的誕生。之後我又以睡仙陳搏之名，說中911的發生，並且在當時沽空了美股。
由樂壇轉戰玄學，我看穿命運的走向，可是有些事情卻偏離命運的軌跡。Hello Kitty藏屍案、秦漢滔殺警案，亦因為我的介入產生了蝴蝶效應，得到了另一個不同的結局。
讓歷史走向另一個方向，不一定完全是好的，我拯救了Hello Kitty藏屍案受害者的性命，爸爸亦因為這樣的改變而坐牢。
我一向是一位沒多大野心的人，現在擁有的已經超出了我的想像，然而當我遇上了一位叫文光義的男人，他的一席話讓我野心膨脹起來，他問：「你知唔知邊一位係最受歡迎、最有影響力嘅偶像？」
我道：「Michael Jackson？麥當娜？披頭四？」
文光義伸出手指指向耶穌基督的雕像，道：「你知唔知基督教、伊斯蘭教、猶太教都係拜同一個神，只不過係唔同嘅代言人，如果你嘅宗教都係信同一個神，而偉大嘅聖人不過由耶穌同穆罕默德換咗做睡仙陳搏。」
太瘋狂了！文光義的話擴闊了我的想像，而且他卻不是說著空泛的目標，還提供了一個實則可行的方向，而我亦開始踏出第一步。
牆上的時鐘提醒我現在時候已經不早了，明早還有一堆工作等待著我，於是我翻開新的一頁，在日記上記錄今天的事情：
今天，棉總的辜先生來找我，他知道自強會有辦理過校園報的經驗，希望找我合作。
棉總是公公年青時加入的，類似一些勞工團體，創辦人辜氏家族是國民黨黨員，他們在背後支持一些政黨走進天水圍、元朗，企圖改變當地的政治生態，之前我與自強會的成員走進元朗，參加聲援棉總舉辦的活動，不幸被捲進元朗事件之中。
文光義的「車上對」提及過要成為現代耶和華，必先掌握五大範疇，媒體正是其中一樣。
雖然創辦報社是我其中一個目標，可是校園報不過是自強會的玩票性質，報章內文都是圍繞著學生的事情，而正規報紙涉及時事、財經、娛樂、體育等新聞，恐怕自強會是沒有能力應付。
我開門見山把我的擔憂說出來，辜先生要我不用擔心，他聘請了不少資深的新聞界從業員籌組報社。
由於這件事關係重大，我向辜先生提出要一些時間去考慮，於是翌日我便通知了自強會眾人，召開緊急大會。
自強會總部設立在葵涌工業區內的工廈，今天這個不足一千尺的空間，會有三十多名自強會會員出席，出席的除了一些自強會的創始成員外，還有一些很熱忱自強會事務的人。
尚興國、陳依官等人得知要舉行會員大會，他們提早到達，把室內的雜物移到門外，騰出空間。
我到達自強會總部時，他們已經整理妥當，我歉意道：「唔好意思啊！我叫開臨時大會，但係遲到，要你地早啲嚟執場。」
尚興國道：「我都係早你半個鐘咋！依官、阿安佢地一早咗嚟咗準備。」
陳依官笑道：「成皇志，最近你由演藝人走到入玄學界，早幾日記者先報導你同大細界集團嘅謝家進一齊食飯，係咪嚟緊有咩計劃啊？」
「都係啲生意仔啫！」我道：「話時話，依官，你同管佳莉就快考ＡＬ，有無信心啊？」
陳依官道：「都ＯＫ嘅！我溫習嘅進度唔錯，有唔明嘅地方會請教Humphrey，佢依啲高材生思路清晰，真係教識我好多。」
如果當日我不是選擇投身娛圈，便與陳依官他們一樣，現在忙著應付高考。
陳依官續道：「自從Humphrey加入咗自強會後，佢拉攏咗唔少大學生入會，自強會同以前唔一樣，唔再係一個純粹嘅中學生組織，自強會有大學生、大人，甚至專業人士。」
「嗯，當初自強會喺吳林紫娣只係得十幾廿人嘅課外活動小組，估唔到依家發展成一個近千成員嘅組織。」
陳依官欲言又止，道：「成皇志，一個組織發展到一定程度，應該…要作出革新。」
我瞧向陳依官，道：「依官，依個係你嘅睇法，定係Humphrey嘅睇法？」
陳依官聞言，現出尷尬的神情，道：「的確係……Humphrey同我講，但係我覺得佢嘅說話係幾有道理。」
我心想為什麼Humphrey不直接對我說呢？呂世伯、呂伯母這麼愛護我，我與他們一家人關係這麼密切，為什麼有話不直接對我說呢？不過想深一層，我與Humphrey的確存在一些尷尬的地方，Humphrey現在的女朋友管佳莉是我的初戀情人，而我亦與Humphrey的妹妹呂靜宜曾經一起，加上Humphrey始終不是創黨成員，他提出的改革很可能會削減自強會舊有成員的權力和利益（雖然我並不認為創黨會員有什麼利益），所以他先找挺得人心的陳依官商量，顯然陳依官都贊同Humphrey的建議，所以他才向我轉達Humphrey的想法
我問道：「Humphrey對自強會嘅諗法係？」
陳依官道：「佢覺得自強會嘅成員除咗中學生外，仲有大學生、在職人士，所以Humphrey覺得我地應該重整自強會嘅管理架構，加入大學生代表同在職人士代表，而自強會嘅秘書長，應該由會員公投選出嚟。」
我想了想，當初創立自強會的時候，為了讓自強會在我的絕對控制下，修訂了有利我的法規，如果改革的話會不會損害我自己的利益？但是想深一層，暫時又想不到會怎樣損害我的利益？
這時Humphrey與他的朋友到達了自強會，他向我和陳依官揮手示意。
陳依官朝門外看去，道：「Humphrey嚟咗喇！佢解釋畀你聽仲好啦！」
Humphrey走到我跟前，臉上的神情有些不好意思。
我見狀立時道：「Humphrey，大家咁熟，以後你有咩就直接同我講，唔駛咁轉折，你話自強會要改革，究竟要點改革？」
「其實關於自強會改革嘅構思，係我一位朋友提出嘅。」Humphrey指向身邊的一名青年，道：「等我同你介紹，我朋友章子喬，佢對自強會今後嘅發展提出咗一啲建議。」
我聞言瞧向章子喬，他的樣貌有點醜陋，個子比較矮小，他伸出手來，道：「久仰大名，平時我都係喺報紙、電視見你，今次可以見到你真人實在太好喇！我叫章子喬，港大政治系三年級學生。」
儘管我對章子喬的第一印象很一般，但看在Humphrey的份上，我還是伸出手與對方相握，點頭道：「你好，聽Humphrey講，你對自強會往後嘅發展有啲建
議。」
章子喬笑了笑道：「我加入自強會無耐，就說三道四，有啲唔係咁好意思。」
章子喬口上說不好意思，但臉上並沒有一點不好意思的神色。
「自強不息係自強會嘅宗旨，可以令自強會進步嘅建議，我都願意去聽，更何況你係Humphrey嘅朋友，有啲咩野直說無妨。」
章子喬豎起了兩隻手指道：「我嘅建議分兩部分，第一就係擴大自強會嘅影響力，第二就係自強會究竟點樣為會員帶來利益，而依兩樣就相輔相承，自強會嘅影響力越大，就會為自強會嘅會員帶嚟更大嘅好處，會員得到好處就自然對自強會更忠誠，同時吸引更多人加入自強會，壯大自強會嘅實力。」
自強會最初成立的賣點是我與其他吳林五美的魅力作招徠，後來經歷了很多事情，讓我們有一層深厚的感情，這些事跡吸引了不少中學生加入自強會，總括而言，自強會成員的關係都是以感情和情義去維繫，一同經歷過布正麗擄拐事件及元朗事件的夥伴們，他們對自強會的忠誠自然沒有問題；可是自己知自己事，對於大學生和在職人士，自強會是缺乏賣點讓他們對自強會忠貞，最近我發現有部分會員已經退會，亦讓我反思自強會今後的動向。
自強會有什麼吸引人的賣點？
如何讓自強會的賣點突顯出來？
如何讓自強會的利益與眾會員的利益捆綁在一起？
我正在沈思中，章子喬續道：「舉一個例子，就好似教會咁，點解有咁多無信仰嘅人入去教會，佢地未必係尋求心靈上嘅慰藉，可能係想識男仔、識女仔，又或者係建立人脈網，睇下點樣去利用。」
我點頭道：「嗯，的確我都聽過有啲無宗教信仰嘅保險佬，入去教會嘅目的係ＳＥＬＬ保險。」
章子喬道：「我講得遠咗啲，我以依個作事例，係希望想講出自強會帶畀會員嘅利益，吸引更多會員加入，以你同一眾知名嘅會員作號召吸引啲人入會，但當啲人入咗會之後，點樣留住會員係另一個重點？通常凝聚一班人長期留係一個團體入面，一係利益、一係理念。」
我瞧著章子喬道：「你講得出依返話，即係代表你有全盤計劃，直接啲講出嚟啦。」
章子喬道：「除咗宗教可以凝聚人心，政治都一樣，兩年後嘅立法會選舉，如果自強會可以有人當選立法會議員，咁自強會無論聲望、知名度、影響力會進一步提高。」
自強會不是未曾參加政治活動，之前的區議員選舉，我們亦曾為朱思遠的表舅父包海瑞站台，讓他成功擊敗兩大陣營，成功當選石梨村的區議員。
一直在旁細聽的陳依官，此時插言道：「之前自強會都幫過朱思遠嘅表舅父得到議席，但係因為條村有好多自強會嘅會員，先得到咁嘅效果。據我所知立法會同區議會係兩回事，立法會係比例代表制，要成為立法會會員最少要得到三萬票以上，我地自強會大概有一千咁上下數會員，而且分佈喺唔同地區，仲要我地有大部份嘅會員都唔係選民。」
在這個年紀的時候，我連什麼是立法會和區議會也未能分辨別清楚，想不到陳依官對這方面已經有一定程度的認識。
章子喬瞧了陳依官一眼，點頭道：「無錯，如你所說就算自強會所有有投票權嘅人集中票源喺一個候選人身上，作用亦都好有限，但係如果我地嘅自強會嘅會員作為義工團，咁就係一支不容忽視嘅助選團。」
我插言道：「立法會議席好多政黨吼住，佢地用區議員深入社區作為樁腳，儲起唔少支持者，而且佢地背後有好多金主，有好多資源去爭奪議席，可以向市民派發蛇齋餅糭收買人心。」
章子喬笑了笑，點頭道：「的確，佢地有資源同經驗，有一班忠實嘅支持者投票俾佢地，但經我觀察大部份選民投票意向都係好感性，佢地對依方面認識唔深，投票取向係好片面。人好鍾意故事，好似悲慘、勵志、熱血咁，而成皇志你就係一個好戲劇化嘅人。」
我皺了皺眉，道：「我唔太明你嘅意思。」
章子喬道：「打個比喻，如果四大天王去參加選舉，你覺得佢地會唔會獲勝？」
Humphrey點頭道：「我諗應該可以，佢地知名度咁高，有投票權嘅支持者都會將票投俾佢啦，哦！你嘅意思係嗰啲天王嘅歌、影、視作品，打動咗選民，得到選票。」
章子喬點頭道：「天王嘅影視作品，塑作自己一個正面形象，而嗰啲政客就包裝自己一個專業、為民請命嘅形象，人往往渴求英雄出現，但無論天王巨星又好、政客議員又好，佢地嘅故事都唔係真，而成皇志你嘅經歷都係真嘅，只存在係電視機嘅英雄點會比現實嘅英雄優勝呢？」
章子喬這種左曲右彎、賣弄聰明的表達方式，我並不喜歡，但我總算明白他的意思，他是要利用我和自強會的優勢去參加立法會。
我道：「我對從政真係無咩興趣，而且我有好多事要搞，無咁嘅時間。」
章子喬道：「我明白你依家名成利就，唔會將立法會議員嘅薪津放喺眼內，但你可以用自強會組成政黨，再從中挑選代議士出選，再為佢站台拉票亦都一樣，有咗立法會議員嘅自強會，影響力一定比依家強得多。另外我仲發現咗一樣野…」
我斷言道：「子喬，入得嚟自強會就係自己人，有咩野直接講就可以，唔需要轉彎抹角。」
章子喬先是一愣，然後神色有些尷尬，道：「唔好意思，我依個壞習慣唔係咁好。其實我想講嘅我留意到１８－２８歲嘅選民登記人口係咁多個年齡層係最低，依個年齡大多都係讀完書出嚟做野，所以對政治投入係較低。我覺得自強會可以利用自身影響力，擴大對依個年齡層嘅影響，咁自然可以做大個餅，穩定咁增加票源。」
我聞言不禁愣了愣，這句說話是章子喬至今最有營養的一句話，的確是最可行、最能運用自強會的影響力達成的事情──去培養現在的中學生成為未來投票給自強會的選民。娛樂圈的歌手也有分偶像派和實力派，去爭取不同口味的支持者，攻佔不同年齡層的觀眾；議員亦一樣，立法會選舉只是比例代表制，不去和兩大陣營競爭選票，而去爭取新的票源，這樣真的不是沒可能。不！是大有機會，我從十多年後穿越回來，便知道這方法絕對有市場。
章子喬與其他人的焦點落在我身上，我豎起拇指讚道：「依個構思一流。」
章子喬得到我的讚許，聞言喜道：「依家學生嘅政治團體主要係得學聯，佢地主要係由各大學嘅學生會組成，而自強會主要係有中學生組成，中學生嘅人數多過大學生，而且每個大學生都要經過中學依個階段，話唔定自強會嘅影響力遲啲會大過學聯。」
我搖頭笑了笑，道：「人地學聯有咁耐歷史，而且資金雄厚，自強會資源匱乏，點同人比。」
自強會的資金來源主要來自會員的年費和募捐，我最近還向自強會注資了十萬港元，作為自強會日常營運之用。
章子喬道：「因為有唔少商界名人都係依啲大學嘅舊校友，所以學聯背後有唔少大筆款項募捐，只要自強會喺兩年後嘅選舉贏得立法會議席，自然有好多金主嚟搵我地，我聽啲立法會議員喺一啲商業機構掛個名，每年就收到七位數嘅政治獻金。」
陳依官聞言一臉錯愕，咋舌道：「咁唔怪得咁多人對立法會議員趨之若鶩啦！原來背後有咁多利益。」
Humphrey道：「要選立法會要好多人力、財力，自強會不嬲無錢，點去選啊？」
我道：「其實今日我召開緊急嘅會員大會係有一件事宣佈，棉總嘅辜先生搵過我，佢希望同自強合辦報社。」
章子喬聞言大喜道：「真嘅？咁樣實在太好喇！報紙係一種流通性好強嘅傳播媒體，如果真係自強會真係有自己嘅報社，咁就可以好好咁宣傳自強會。反對黨就係因為有蛇果嘅幫助，先可以同保皇黨分庭抗禮。」
Humphrey有點憂慮，道：「但係要做到蛇果咁嘅影響力，就要有佢咁嘅銷量，經歷報紙減價戰之後，依一行已經開始走下坡，執咗唔少報社，你搞一份新報紙，面臨好大競爭，我驚你地未做到蛇果咁樣，已經要執笠。」
我因為對報紙這一行完全不熟悉，所以沒有想過Humphrey提出的問題，章子喬道：「我有個朋友叫范孝直，佢係一位資深傳媒人，我諗佢應該俾到一啲意見我地。」
陳依官道：「依家自強會有咁多人才，只要我地集思廣益一定可以諗到解決辦法嘅！成皇志，參加會員大會嘅成員差唔多到齊喇！你喺時候向其他會員宣佈依個消息喇！」
我向會員宣佈自強會將會與棉總合辦報社，大部份會員都表現雀躍，認為這是自強會發展行邁出重要的一步。另外我又宣佈改革現時自強會的架構，秘書長對下有六位幹事共同決策和處理自強會的事務，按會員比例分成三位中學生幹事、兩位大學生幹事、一位成年人幹事，秘書長和六名幹事，由會員投票選出，任期為兩年。會員對自強會改革一事出現分歧，反對的人認為自強會一向是中學生的組織，如果進行改革的話，會違背初衷。贊成的人認為自強會的會員，長大後不再是中學生，難道不再是中學生的會員便要退出自強會？
會上贊成改革的會員比反對的會員多，所以我決定一個月後舉行選舉，讓會員投票選出秘書長和六位幹事。
會後，我要王采堤跟著我和尚興國的車，在車上，我道：「王采堤，妳真係做得好好啊！我地自強會嘅影響力之前都只係喺新界，妳居然可以邀請到港島區名校學生加入自強會，你同頭先嗰兩個姓克堤書院嘅女同學好熟架？」
王采堤笑了笑，道：「佢地係之前繪畫比賽識嘅，係你啲歌迷嚟，之前一直想加入自強會，我無特登同拉佢地入會架！」
正在駕駛的尚興國笑道：「阿志，你後宮又多兩個純情學生妹喇！離咸濕教主又近咗一步喇！」
我瞧見王采堤臉色一紅，薄責道：「阿國，好心你把口乾淨啲啦！有小妹妹喺到架！」
尚興國只是笑了笑。
我轉向王采堤道：「係呢！自強會進行改革，嚟緊會重新投票選過秘書長同內閣，希望妳唔好介意。」
我見王采堤對自強會的事務很上心，拉攏了不少名校生加入自強會，可謂勞苦功高，重組自強會架構，再次投票的話，她未必可以再次被選中成為秘書長，我怕這樣會打擊她對自強會的熱忱。
王采堤聞言搖著雙手，道：「會長，我……點會介意呢？我只係一個中四學生，自強會咁多勁人，一定有人比我更合適。」
王采堤說出這樣得體的話，更讓我感到對她有所虧欠，我想起之前廣告商送給我的贈品，於是打開車箱內的櫃子，取出了一個精美的盒子遞給王采堤，王采堤怔了怔，我道：「送俾妳架！妳上次演唱會救咗我一命，我都未多謝你！妳打開嚟睇下。」
王采堤打開了盒子，瞧見是一條黃金手鏈，訝異道：「會長，依啲咁貴重嘅野我唔收得架？」
我道：「Ｋ金嚟架！唔係純金，而且我係借花敬佛，條鏈係廣告商送嘅，女裝手鏈唔啱我。」
王采堤道：「但係……」
我道：「但咩係吖！除非妳嫌棄條鏈啫！如果唔係妳就收咗佢啦！」
王采堤道：「咁多謝你啊！會長。」
此時，汽車已經停在王采堤的家門前，我們與她揮手道別。
王采堤離開後，車上只剩下我和尚興國，我從後座調上前座，尚興國瞧著王采堤的背影，笑道：「阿志，睇嚟又一條女衰喺你手上。」
我道：「阿國，你講啲咩啊！人地妹妹仔嚟架咋！你當我真係你口中嘅變態教主咩？」
尚興國道：「你大佢三年咋！講到你可以生得佢出咁。」
我從２０１６年穿越回來，如果按照實際年齡的話，我真的可以當她的父親，至於為何呂靜宜等人，我沒有這種感覺，我想因為我在另一個時空是認識她們，而王采堤是我在這個時空才認識她的關係。
我道：「自強會好需要王采堤依啲人才，佢對自強會嘅事務好熱心，自強會嘅改革隨時令佢無得做自強會嘅秘書長，我怕傷害咗佢弱小心靈，先送啲野俾佢啫。總之我就唔會利用自強會嚟搞搞震啦！如果唔係都唔會叫你車我同佢啦！我就係為咗避嫌。」
尚興國嘀咕道：「依個係你嘅諗法啫！王采堤依啲懷春少女未必咁諗呢？」
我沒好氣地搖了搖頭，道：「唔好講依啲啦！講返自強會啦！你對章子喬提出嘅改革有咩意見？」
尚興國道：「我認同佢嘅說法，如果自強會要發展就要改革。講真初時自強會只係一群烏合之眾，我地只係缺乏知識同經驗嘅中學生，對自強會有熱誠同埋優秀嘅人才寥寥可數，要吸納各方面嘅人才，咁樣做無可厚非，而且自強會嘅宗旨就係自強不息，要啲會員一直咁去進步。」
我聞言感到有點錯愕，道：「阿國，估唔到你有咁成熟嘅睇法？出咗去跟雄老大搵食係唔同啲嘅。」
「唔好玩啦！你先係我老大，我只係出去拍一套戲啫，拍完就返嚟跟返你。」
之前我與凌風合演一套名為異靈靈異的奇幻武打片，由於戲內有大量動作鏡頭，菁姐怕我受傷，要求使用替身，於是我便問平常習武、身型又與我相若的阿國有沒有興趣？最後他便成為我戲內的替身，導演覺得阿國的身手不錯，便問他有沒有興趣當另一套電影的替身，他有為此事徵詢我的意見，我當然要他答應。
我道：「做我嘅助理有咩前途吖！難得雄老大睇中你，你俾心機做，話唔定隨時成為新一代動作巨星。真心嘅，做兄弟當然望你好架啦！」
「係呢？你兩個朋友接手我啲野做成點？」
我苦笑道：「佢地新手，當然比唔上你，係有啲甩漏，有時會搞錯咗啲appointment咁。」
尚興國愕然道：「吓！咁大鑊？駛唔駛我幫你啊？」
「你專心啲拍戲啦！佢地遲下就會熟手架！」
「希望啦！」尚興國話題一轉，道：「講返自強會吖，雖然我同意自強要改革，但係又怕有利益，又會有拗撬，遲啲自強會要搞埋政治，我真係驚會影響到會員嘅感情，一涉及到利益，真係驚有人會出賣自強會。」
我拍了拍尚興國的肩膀道：「依層你又唔駛太過擔心，話晒我地經歷咁多次出生入死，有份深厚嘅感情喺到，唔會嘅。」
以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl