《將軍澳迴旋處上的時空裂縫》: 第四章第四回：盛滿上帝大怒的碗

 
第四章第四回：
盛滿上帝大怒的碗
 
 
 
《啟示錄》 第十六章：

「我聽見有大聲音從殿中出來，向那七位天使說：
 




你們去，把盛神大怒的七碗倒在地上。
 
第一位天使便去，把碗倒在地上，就有惡而且毒的瘡生在那些有獸印記、拜獸像的人身上。第二位天使把碗倒在海裡，海就變成血，好像死人的血，海中的活物都死了。第三位天使把碗倒在江河與眾水的泉源裡，水就變成血了……」
 
 
波叔不是一個教徒，
但都上過一陣子教會。
以上來自《啟示錄》的一段文字，就最適合用來作這一回的引子。
 
＊＊＊＊＊＊＊＊＊＊




 
 
在我升了做研究中心主管後當日，
共和黨就把我召到了他們的會議室。
 
那次所謂「會議」，
其實全程我都主要是聽。
 
所以我在此，
把共和黨「秘密研究小組」主管F教授對我說的話，由頭至尾覆述一次吧。




 
＊＊＊＊＊＊＊＊＊＊
 
「黎博士，首先恭喜你正式成為
『第二代等離子氣化廢物技術研究中心』嘅研究主管。
 
我哋共和黨有一個研究計劃，
可以話係關乎整個中華邦聯嘅命運。
我希望閣下能夠好好配合。
 
不過成個故事好長，我慢慢講你聽：
 
自從2050年嗰次海平面上升，
各國都深感氣候暖化嘅迫切性，
紛紛停止使用化石燃料。




 
但由於可再生能源科技未成熟，
而且技術被西方先進國壟斷，以致價錢昂貴，
好多窮國小國都用唔起。
 
結果，好多國家都轉用咗核能。
 
幾十年間，
全球核電廠嘅數目以幾何級數增加。
 
大規模採用核能嘅結果，
就係產生咗好多核廢料。
 
雖然第五代核能發電廠，
已經能夠從核廢料中再次發電，




比傳統嘅核電廠產生少60%核廢料，
但核廢料嘅數量依然驚人。
 
咁啲核廢料點處置？
 
中国未解體之前，
一直秘密地將核廢料，以火箭發射到外太空棄置。
 
 
依個做法，其實係一個國際條約中嘅灰色地帶。
因為核廢料嘅處理及棄置係受到國際原子能機構嘅《乏燃料管理安全和放射性廢物管理安全聯合公約》規管，嚴禁一切會危害公眾安全嘅核廢料處理方法。
 
但係，該公約並未提及，將核廢料掉出外太空依個做法。
無提及，即係無禁止啦。
 




公約無提及嘅原因，
最主要就係一路都無國家夠膽用，
因為萬一火箭發生意外，後果不堪設想。
 
果然，依個「萬一」，不幸地上年發生咗。
 
不過唔係我哋，而係印度。
 
原來印度同我哋一樣，秘密地將核廢料掉出太空。
 
但佢哋上年發生咗一次嚴重意外，
一支載住五十桶核廢料嘅火箭發生爆炸，
所有核廢料，就咁喺印度本土上空隨風飄灑。
 
而家印度可以話一片死城，




情形就好似當年切爾諾貝爾核事故後一樣，
不過範圍更廣更嚴重。
 
所有水源全數污染。
好多人受核幅射感染而死。
生還者好多都有核幅射感染嘅症狀。
人們爭相逃到較安全嘅地方，又引發大大小小嘅騷亂。
 
依件事你唔會喺新聞上知道架。
因為各國政府都唔敢向人民公佈，怕引起對核電嘅恐慌。
 
 
依家國際原子能機構考慮下年修訂公約，
明確禁止將核廢料掉出外太空。
 
咁唔可以將核廢料掉出外太空，
我哋全個中華邦聯嘅核廢料點算？
 
 
而另一個令問題更迫切嘅事實係，
我哋而家產生嘅核廢料，
都係無方法「消滅」架。
 
只能夠「擺喺度，安全咁儲存」佢哋。
 
本來而家啲核廢料係放喺一啲離岸好遠嘅荒島上。
但你知，而家海平面越升越高，土地面積越縮越細，
好多島就快被水淹沒，到時核幅射就會隨水流污染整個水源。
 
咁點算呢？」
 
共和黨的F教授終於停頓了，喝了一口清水。
然後走到我身邊，遞上一份封面寫著「國家高度機密」計劃書。
 
 
 
「共和黨內部一致決定，將佢哋全部掉去另一個時空。」
 
 
 
F教授搭一搭我膊頭，微笑著說。
 
 
(待續)