Welcome To Knot ~ Season1: #94

啫喱一直幫我拉住個喼，向住佢舖頭嘅方向進發。
沿路行，啫喱都冇同我講過一句嘢。
 
直至到去到佢鋪頭，佢幫我拎咗個喼上去。但上到樓梯口，佢又奇奇怪怪咁停咗一陣。
最後，佢幫我推咗個喼入去佢自己房。
「啫喱，其實我可以瞓蛇房架！」我提議。對於蛇房嘅存在同用途，其實我都略知一二。
「唔得！蛇房太細，你住係委屈咗你。而且都唔知幾時、樂少或者Taz會走咗上來話要用，咁咪重唔方便。」啫喱似乎對我呢個問題有備而嚟，一早就諗定曬答案。
 
佢將我個喼推咗入佢房，放埋一邊：「其實如果你介意，你可以瞓床，我打地舖都得。冇所謂架！」
「唔得~點可以咁架！你咁樣我重唔好意思！」對於啫喱嘅提議，我只係覺得愕然。


「得啦！呢啲不如一陣再傾！我好肚餓，不如出去食啲嘢啦。」啫喱決絕咁終止咗個話題，一手拉住咗我，就落樓梯喇。
 
簡簡單單咁係附近食咗個飯，我哋就決定慢步返Jerry's Bakery。
係咪我少行呢邊呢？
原來係後一條街嘅時裝舖頭又易咗手，見到圍晒木板咁，唔知今次又會開咩呢？
 
經過7仔時，啫喱話要買啲嘢。結果係我啱啱睇晒所有八卦雜誌嘅封面後，佢就拎住兩大袋嘢行咗過嚟。
「嘩！買咁多？買咩呀你？」我嘗試窺探一下袋入面嘅物品。
「冇呀！咁以前一個人住，我都冇咩儲糧，咁你嚟住，我咪入定啲貨，驚你會餓嘛！」
「哈哈…住係麵包舖樓上都會餓死？」終於俾我我見到袋入面有咩「咦？但係咁多啤酒嘅？」


「吓？咁我飲架嘛！」話口未完，啫喱就開咗其中一支啤酒，邊飲邊單手拎住兩個大袋，繼續向舖頭方向行。
 
說說笑笑，好快就返到Jerry’s Bakery門口。
遠眺Knot，一切似乎都安好，我就安心咁跟啫喱返上樓喇。
係回房嘅樓梯上，我突然醒覺，其實我係有需要同啫喱交代清楚發生緊咩事，話晒呢個安排，都係因為佢而決定嘅。
 
入到房，我先拉住啫喱坐底。
「啫喱，sorry呀，啲事發生得太快，我都未嚟得切同你交代下。」我停一停，等啫喱可以有時間思考下發生嘅事。
啫喱只係好自然咁又拎咗一支啤酒出嚟開始飲，並且示意我繼續講。
「其實係咁，Scarlett點解要搬嚟海邊住，我諗你都已經知。本來我係諗住俾一間房佢住，我就返係自己房到。點知…今日Taz同我講，話Scarlett原來係…BDSM嘅愛好者。」


「BDSM？！？！」啫喱嘅反應，同我預期嘅一樣。同一時間，佢已經準備飲第三支。
「嗯…」我點一點頭「本來佢係點，我真係冇咩所謂，始終呢啲佢私事。但係…靖同Taz今日重同我講，話…Scarlett佢…佢…」
「佢…對我有意思？」呢個回應，係我始料不及嘅。
「頭先下晝，問我同你…係咩關係，又問我可唔可以…同佢有多啲嘅關係。我…我只係估唔到佢係睇中我同佢BDSM啫。」啫喱已經飲緊佢第四支啤酒。
 
「咪飲咁快…好易醉架。」但似乎呢個勸籲嚟遲咗，因為眼前嘅啫喱，講完，已經好快咁乾咗佢第四支啤酒，並且已經出現一啲醉意。
 
已經面紅嘅啫喱，突然企咗起身，步履有少少不穩咁行咗埋我面前。
「我唔理Scarlett係咪咩BDSM嘅愛好者…我只係介意，我同你嘅關係…其實可唔可以再進一步…再多啲？」
我都嚟唔切俾反應，啫喱佢就已經…