Welcome To Knot ~ Season1: #93. 啫喱

明明頭先重好地地，Sky都有對住我笑同講嘢架，點解…突然又唔睬我呢？
係完全一眼都冇望過我喎！
就算我叫佢，佢都只係回應我一啲單字，但眼尾都冇瞄過我一眼呀！
 
反而嗰個Scarlett由樓上落咗嚟之後，就成日借啲意走過嚟同我傾計，又借頭借路咁摸我，搞到我周身唔自在。
咪住先…會唔會…Sky係呷醋呢？！
如果係…咁係咪其實…佢心中有我呀？
 
就係我苦思無答案嘅時候，就見到佢同Scarlett係到密密傾，跟住自己就上咗樓喇。
我同Scarlett示意叫咗佢埋嚟：「Sky佢冇嘢呀嘛？咁早返上房嘅？」


「噢~ Nothing！佢話上去執定嘢，要搬過去你到嘛。」Scarlett定一定咁望住我，令我有少少唔自然嘅感覺「By the way啫喱，其實…你同Sky係咩關係？」
 
對住Scarlett咁直接嘅提問，我真係差啲噴咗啖lemonade出嚟。
「嗯！朋友囉。」其實講真，我同Sky都真係只係朋友關係，會同床、但冇其他事發生嘅朋友關係。
「Friends？Only？？Are you sure？」Scarlett一再進迫。
「…咁其實我同Sky咩關係，又關你咩事呢？」希望呢招以退為進，可以令到Scarlett識停一停。
 
「Well，如果你同老闆娘係冇關係。」Scarlett突然對住我媚笑「咁我想睇下我同你可唔可以有多啲關係咋嘛！」
「吓？！」我不禁大叫咗出嚟。唔單止令到全場靜咗望住我，亦到令到面對嘅Scarlett塊面一陣青一陣紅。
「呀…sorry sorry！我嘅意思係…呀…即係…我呀…」我個腦開始運作唔到。乜宜家啲G，咁主動架咩？點解…又唔見Sky咁主動呀？


「That’s OK！I understand！」Scarlett好快就變返好平靜咁「我都知我咁講係shock咗啲，我明白架喎。唔緊要架！感情嘅嘢，可以用時間嚟培養嘅。Take it easy baby！」
講完，Scarlett突然係我面上鍚咗啖！！
Shit！究竟發生咩事？
 
我望一望鐘，5:54pm，我叫Kwan仔幫我同Scarlett講，叫佢收舖後就出去行下，認識下啲地方先，最好食埋晚飯先返嚟。我就會同Sky搬嘢過去我到。
「唓~ 做咩唔自己講啫？！」Kwan仔一臉疑惑。
「呀…俾個機會你呢個大師姐，指點下新人邊到有好嘢食呀嘛！你去講啦。我幫楊言手收舖。」推走就Kwan仔，我就走去幫手收舖喇。
 
終於係6:30pm耍走咗三個人，吸一啖氣，上咗樓上叩Sky嘅房門。
門後嘅Sky好似冇咩異樣，重叫我幫佢手拎個喼。


我當然二話不說就抽起個喼落樓，過咗一陣佢都落咗嚟。
沿途行返去我舖頭時，都有好多街坊同我地報以「曖昧」嘅微笑。我有理由相信，梅姐應該係同咗唔少人講過Sky會過嚟住呢件事。
 
但係…講又點？！
我同Sky嘅關係仍然停滯不前。雖然我真係好想同佢再進一步，但係…
 
啫喱呀啫喱，如果繼續咁落去，可能真係呢一世都無辦法突破任何關口架。
不如學King少咁講，迫Sky埋牆角，可能可以絕地反擊呢？！
 
但係…如果真係咁做而Sky唔鍾意，咁可能連朋友都冇得做之餘，我會傷害到佢架喎。
佢已經受咗好多苦，我唔係再見到佢受到任何嘅傷害。
 
咁…咁點做好呢？