Welcome To Knot ~ Season1: #94. 啫喱

我好清楚自己想要啲咩…
我要嘅係同Sky有更進一步嘅關係；我要嘅係同Sky有更多嘅日子！ 
今次我決定押上所有同Sky嘅感情，嚟賭呢一舖！
我唔可以再咁有「風度」落去！
King講得啱，幸福係要自己去爭取。
 
藉住些微嘅醉意，我行咗去Sky嘅面前：「我唔理Scarlett係咪咩BDSM嘅愛好者…我只係介意，我同你嘅關係…其實可唔可以再進一步…再多啲？」
講完都唔等Sky有任何反應，我就俯身向前，雙手㩒住佢凳兩邊嘅扶手，定定咁望住佢。
 
「嘎！啫喱…你飲醉啦！」Sky㩒住我肩膀，想推開我。


因為距離拉近，我可以清楚聽到Sky開始有啲喘氣。
「我冇醉！」因為體力嘅懸殊，Sky根本冇力推開我「Sky，我嘅心意，你一直都好清楚，你知我係鐘意你！你一直都話放唔開心入面嗰個人，我明白架！我真係明！但係，唔試過點知啫！點解唔俾次機會大家？」
 
「啫喱…你真係醉！咪亂講啦！」Sky仍然想推開我。
我改為捉住佢雙手，再用力一拉，佢整個人就順勢企咗起身，跌咗入我懷抱。
我捉緊機會，緊緊咁攬實我嘅意中人：「我真係冇醉。Sky，俾次機會大家。與其等你自己一個去解開心結，俾我同你一齊去面對啦！」
 
「啫喱…咪咁！」 懷中人輕微嘅掙扎，令我更加唔想放手。
「Sky！俾次機會我…俾次機會大家。當我求下你好冇？」我抱得更緊。
兩人亦因為咁而係房中推拉著，就好似係到跳緊舞咁。


 
「啫喱！你聽我講…我唔想對你唔公平。我唔想自己心有一個未放開，但同時又有你！」Sky努力說服我。
「我唔介意…應該話，我想同你一齊去解心結，我知道你放唔開…所以我想同你一齊去面對。我應承你，我好好愛惜你，真係架！」
 
「啫喱…」Sky係我懷中微震，唔通佢喊？
就係我遲疑緊係咪應該放開Sky嘅時候，一時失咗重心，加上自己kick到床邊，我同Sky就雙雙都跌咗落床。
 
宜家嘅情況，就同上次係Sky房嘅一樣…