Welcome To Knot ~ Season1: #93

眼見啫喱俾Scarlett抽晒水，我竟然有啲嬲。
搞錯，做咩要摸人？
啫喱又做咩任人摸而唔出聲？
佢兩個…唏！我冇眼睇呀！！
賭氣咁決定唔望佢哋，繼續沖我嘅咖啡。
 
5:00pm
襯舖面開始冇咩客，我叫咗Scarlett過嚟，同佢講清楚住呢到嘅規矩。
「Scarlett，其實你係到住，都冇話要有咩規矩，最緊要你記得鎖門同小心用啲電器，我唔想第二日返嚟成間Knot燒咗。」我停一停，望住係到點頭嘅Scarlett。
「明白，我都會執好啲地方，唔會亂搞亂掂你啲私人嘢。」


「嗯…轉頭我會執好個櫃俾你擺嘢。唔好介意，不過我會鎖好自己啲嘢，咁都希望你會尊重返我私隱。」
「當然啦。」Scarlett乖巧咁點頭。
「如果1、2號房有人租咗，你夜晚就一定要係到睇住，如果你真係要行開，記得話我知，我可以返過嚟瞓。」
「嗯嗯，我會架啦。」
「最後，我唔係太鐘意有啲唔識嘅人瞓我張床，所以如果你想帶朋友上嚟過夜，用1、2號房，冇房嘅話，就冇計喇。而當然用完，亦都要執返好啦。」
Scarlett做咗一個OK嘅手勢：「No problem！放心啦，我會幫手睇住架啦。」
 
我向Scarlett微微一笑，再同Kwan仔講咗聲，就上返房開始執嘢。
唔執，都唔知原來自己有幾多無謂嘢係到。
不過話分兩頭，就係因為我當咗呢個係我嘅家，先會放咁多無謂嘢係到。


 
「咯咯咯…」房門外傳嚟叩門聲。
我開門一睇，係啫喱：「呀…我叫咗Scarlett出去行下食個飯先，轉頭先返嚟。我上嚟睇下你有冇嘢要幫手。」
「吓？！」我望一望櫃頂上嘅鐘，原來已經6:30pm。應該係啫喱同Kwan仔幫我收咗舖。
「乜原來咁晏架喇！」我驚訝於時間過得咁快「其實我都執得七七八八，可唔可以麻煩你幫我拎呢個喼過你到呀？」
「啊，當然可以啦。我係樓下等你啦。」啫喱又再一次展示佢強勁臂彎嘅能力，一手就將個喼抽起，落咗樓下喇。
我將自己其他私人物品鎖好之後，都落咗樓，同啫喱匯合。
 
短短嘅一程由Knot Cafe過Jerry's Bakery嘅路，其實都只係隔咗七個舖位，唔知點解，就已經見到唔同街坊，包括剛剛收舖嘅強哥強嫂、報紙檔嘅華叔、同茶餐廳嘅明嫂，都不約而同咁對住我同啫喱笑。
唔係微笑，而係…好曖昧嘅笑容。


而啫喱呢，就一直尷尷尬尬咁推住我個喼，急步向住自己舖頭嘅方向行。