Welcome To Knot ~ Season1: #92. 啫喱

@$#%#¥&！
Sorry，我唔係爆緊粗，因為粗口我識講，唔需要火星文。
 
我係…點形容好？
如果話中咗頭獎係十級興奮同難以置信，咁宜家嘅我，就係連中咗3次頭獎。
以為只係好似平日咁送貨過Knot，點知原來係領獎！
 
好彩Sky係我放底手上嘅cake之後先同我講，唔係我實成個跌咗落地下。
不過我最唔明，係點解…今時今日Sky會突然想搬過嚟呢？
又只係住一個月？


佢個心結…係幾時解架呢？
 
我冇問，亦唔敢問。
Sky下晝個時只係神神秘秘咁問我可唔可以嚟我到瞓一個月，我當然係立即話好（OK！唔係立即！我係有呆咗幾秒！）。
 
返去舖頭，我立刻請梅姐幫我執下間房，我真係唔想失禮人。
點知梅姐笑淫淫咁對住我：「傻仔，我一早執好啦！駛你叫喎！你呀，好好對人啊，我當Sky半個女架！」
「梅姐！」驚訝於梅姐嘅消息靈通同時，亦都怕咗佢會四圍亂講「咪亂講啦！咩…好好對人啫！我不嬲…對個個都咁好！」
梅姐向我展露一個深藏不露嘅笑容：「咁你要對Sky特別好囉。都住埋囉，就咪鬼咁收埋收埋啦。梅姐好開通，明架喎。大愛呀嘛！！」
 


俾梅姐搞到都唔知好嬲定好笑，所以我決定，講少句為妙。
收咗工（係我收工，舖頭由強叔強嬸睇住，直到6點），我就過咗Knot，諗住幫Sky搬啲日用品過我到。
 
「Hi~」唔知點解，過到去好似好尷尬咁，都唔知同Sky講咩好。
「啊？Hi！」Sky幫我整咗杯homemade lemonade，再若有所思咁對住我「啫喱，其實我會唔會阻住你休息架？我冇問過你就話要搬過嚟，好似唔係幾好咁。」
「傻啦！邊會阻住啫。」我摸摸後尾枕，盡力掩飾自己心入面嘅諗法：「其實我不知幾想你過嚟住。」
 
其實我真係好鐘意坐係吧枱望住Sky做嘢，個感覺係好近、好舒服。
可惜平日嘅工作，令我真係冇咩時間可以咁做。
所以今日可以靜靜咁坐係到望住佢，我當然要好好珍惜，慢慢享受。


 
就係我好慢好慢咁飲緊杯凍飲嘅時候，樓上有人行咗落嚟。
啊~原來係嗰個新part time Scarlett。
Scarlett一見到我坐咗係吧枱，就好殷勤咁行咗埋嚟我身邊：「Hi 啫喱~ 今朝唔該晒你呀！！」
「啊Hi！唔駛客氣啦，我都拎慣重嘢。」我禮貌式咁對佢笑。
「Oh really？No wonder你咁大隻啦。」呢個 Scarlett好奇怪，佢一邊講，竟然一邊搓我手臂！！
我自然地向後縮一縮。
「Oh！I'm sorry！！你知，我哋啲鬼妹仔性格，會成日去同人有slightly嘅body touch架！我冇心。Sorry！」Scarlett講到好似冇事發生過咁。
「呀~明白嘅。」佢講到咁，我重可以講咩啫？！唔通叫非禮咩！