Welcome To Knot ~ Season1: #80. 靖

擁吻住Taz嘅動作愈來愈狂熱，攬住Taz嘅雙手，就愈攬愈緊。
隨住我同佢兩條香舌不斷糾纏，大家互相交換緊呼吸，我就愈來愈發覺自己有幾鍾意懷中嘅傻妹。
 
終於，唇分。
繼續維持住我被Taz跨坐係身上嘅姿勢，我對手滑落返去佢條腰。
兩個人都喘住氣，兩個人係到對望。
 
我嘗試坐起身，Taz變相坐咗係我大脾之上。
好彩佢唔係太重，唔係真係會坐斷腳。
同佢面對面對望，我忍唔住輕撫佢嘅面；而Taz亦都伸手，幫我撥走頭髮上嘅沙粒。


「傻妹~」我輕輕叫喚眼前人「我應承你，我以後都會一心一意對你好，我唔會俾人傷害你。」
從未見過嘅羞澀表情，第一次係Taz面上展現。
佢點一點頭，但又再扮強悍咁講：「如果你蝦我，我班friend實唔放過你，我會叫佢地唔好去Silence到飲，唔參加你啲咩鬼瑜伽班，我重會叫Sky唔交租俾你！問你驚未？」
 
「哈哈哈哈~」忍唔住，我抱住佢狂笑「得…好驚！哈哈！傻妹，你以後對我，記得要溫柔啲，唔好再起晒槓咁喎！哈…哈哈！」
「咩喎！」Taz輕拍我手臂「Oppa都話我呢啲性格先至特別呀！」
 
「Oppa…啫喱！！大鑊！」我突然推開Taz，到拉佢一齊企起身。
Taz投訴：「做咩啊？」
拉住佢，開始向回程路狂跑：「你Oppa千叮萬囑，叫我記得鎖門！你就咁走咗出來，唔駛估，你都係無鎖門架啦！」


「嗄…嗄…」Taz邊喘氣，邊笑「嘻…我邊度有鎖匙…嗄…嘻嘻…你死啦你！嗄…實俾Oppa鬧！嘻嘻…」
「嗄…嗄…咁黑心嘅你！」終於嚟到舖頭後門，我正想拎條後備匙出嚟鎖門，點知…
 
Taz一手搶咗條鎖匙！
「又輪到你做咩啊？」我無佢咁好氣咁問。
「鎖咩鬼門啫！你唔好話我聽，你冇諗過今晚同我瞓呀！」Taz講嘢永遠都咁直接。
「我…」因為Taz嘅直接，搞到我有少少尷尬「我認我係有諗過…但係…你唔係諗住係啫喱到…瞓呀？」
「Oppa俾得條後備匙你，即係預咗你係到瞓囉！」Taz講完，就拉住我上樓梯。
「嘩~乜宜家啲女仔咁主動架咩？！重主動拖人上樓喎！」