Welcome To Knot ~ Season1: #79. 靖

遠處模糊嘅人影，慢慢行近我。
啱啱行到只有兩步距離嘅時候，呢個人突然向前跌倒，自然反應下，我張開咗雙手去接住佢。
 
好彩跌係沙灘到，應該都唔會好痛。
「痛！痛…嗯！」懷中人輕輕呼叫著，佢似乎都幾醉喎。
眼見我身邊有幾枝啤酒，佢嘗試伸手去拎：「我要飲酒…俾酒我！」
 
「Taz！！點解你會出咗嚟？」我驚覺眼前人嘅出現。
「我要飲酒！點解唔俾酒我飲？」帶有7、8分醉意嘅Taz，一直係我懷中亂郁。
「酒？啫喱嗰到個啲呢？」心諗，個傻妹唔係吹咗咁多枝烈酒都未醉啩。


「Oppa啲酒唔見晒啦！」Taz終於搶到罐啤酒「枱面得返一枝whiskey…點知一飲，衰人Oppa原來入咗啲茶入去，普洱扮威士忌！飲咗一大啖，咩酒都醒啦！」
心中暗笑：Good Job Jerry！
 
Taz從我懷中坐返係我身邊，徑自開咗罐啤酒就飲。
「喂！咪隊咁快，一陣又醉過呀！」我嘗試按住佢拎啤酒嘅手，希望佢放慢少少嚟飲。
「邱靖我話你知！你咪成日懶成熟咁呀吓！」Taz突然轉身，舉起右手伸出食指指向我「我問你！做咩嚟到樓下，都唔上嚟搵我？Scarlett應該講晒你知，你冇嘢想知、想問我架咩？」
 
「我…」我逃避咗佢嘅目光，將視線飄向漆黑嘅海邊「我唔想再傷害你！我…feel到你有幾痛，連我自己都覺得痛！」
「…」Taz默默地飲晒罐啤酒「咁你係咪打算一世都唔見我？覺得避開左我，見唔到，就唔痛？」
 


「…」Taz問嘅所有問題，我都唔識答「我…俾唔到答案你，我唔識答…我只可以講…Sorry！對唔住！」
「Sorry for what？」Taz略為大聲咁問。
「Sorry for…我代家姐講。」
「哈哈哈…bull shit！你還你，佢還佢，我不嬲都分得都好清楚！」
 
「如果真係咁清楚，點解你唔話我知你識佢？點解你又唔肯同我開始？」我講完即刻灌咗自己一大罐啤酒。
唔知幾時開始，Taz已經飲緊佢第三罐啤酒：「唔話你知因為我覺得無需要，我依家係同你做friend，唔係同你家姐做囉！」
「你敢講，你從來冇將佢同我擺埋一齊去諗、去秤？」可能係酒精嘅影響，我開始變得有啲咄咄逼人。
 
「…做得出，怕咩認！我係有呀！我係有諗過，你同佢都會一樣！」Taz好快咁灌埋嗰半罐啤酒。


佢突然好快咁將我㩒咗係地，再一個翻身，跨坐咗係我個肚上面，瞪大對眼望實我：「咁你講啦，你會唔會同你家姐一樣，都係玩我、都係呃我呀？」
好自然地，我伸長咗兩隻手，輕輕扶住佢條腰：「我同家姐好唔同，我要嘅事一段長久嘅關係、係一個承諾、係一個家！我真心想對你好…你敢唔敢接受呢個挑戰呀？」
Taz呆咗一呆：「邊個話我唔敢？」
講完，佢突然俯身向前，我雙手順勢向上，變成攬住咗佢。
我哋兩個人嘅距離已經好接近，Taz望入我雙眼：「我警告你，我知你住邊，鋪頭係邊。如果你敢好似你家姐咁呃我玩我，你就要承擔晒所有嘅責任同後果！」
輕輕一笑，我決定反駁：「你唔會諗住埋我身，再報仇啩！」
 
「嗯~」Taz對大眼鬼靈精咁轉咗兩轉「都不失為一個好提議喎！」
「你試下！！」我話口未完，都唔俾時間佢反駁，我就用咗我兩片唇，封住咗佢個咀喇。