Welcome To Knot ~ Season1: #78

10pm，後門門鐘突然響起。
令到係房睇緊電視嘅我嚇咗一跳。
究竟邊個會咁夜呢？
 
落到已經一早閂晒燈嘅樓下，我先由防盜眼個到望清楚。
可惜後門嘅燈前兩日燒咗，我都重未得閒換。所以宜家望出去，都只係隱約見到有個人影係到。
我小心翼翼咁開咗小小度後門，打算偷偷望出去。
 
點知…一隻大手突然拍向門「嘭！」
「嘩！！」我不禁尖叫咗出嚟。


門即刻被大力地推開，一個高大嘅人影突然衝咗入嚟。
我本能反應係立刻向後移動，點知一時失神，都忘記咗腳後有一小級樓梯係到。結果好順理成章地，我已經向後跌緊。
 
黑影向住我衝前，並一手攬住向後跌嘅我。
我驚魂未定，唯有大叫：「嘩！救命呀！放開我呀！」
「喂！咪叫！」黑影大叫，並嘗試用手捂住我個咀。
我當然奮力抵抗，雙手在自己同黑影間亂舞。
 
唔知打中咗個黑影幾多次，對方突然捉實我雙手。
正想再大叫救命，咀已被黑影用雙唇封住咗！！


 
亦因為如此近，即使漆黑嘅環境，我都終於睇得清楚眼前人係邊個！
我並冇再掙扎落去，對方亦慢慢唔再捉住我雙手。
本來用嚟封嘴嘅動作，亦慢慢變得輕柔，變成細細碎碎嘅親吻。
 
無幾耐，黑影停底佢嘅動作，亦放開咗我。
「…」我暗喘住氣「嚇死人咩！頭先咁樣突然衝入嚟！」
轉身開了吧枱嘅燈，原來嘅黑影，立刻清楚現出真身。
 
「Sorry呀！」啫喱摸一摸自己嘅一頭短髮，一邊唔好意思咁講「我啱啱拍門，你就剛剛開門，所以你先以為我嚇你！對唔住啊！」


我行入工作枱，準備幫自己沖杯咖啡定驚：「你今夜過嚟做咩？係咪有事發生？又做咩拎住個冰袋？」
 
啫喱坐咗係吧枱前面，放咗嗰冰袋上枱面，再由入面拎咗一枝啤酒出嚟：「Taz個傻妹走咗嚟我到賣醉，後尾靖過咗嚟，我諗佢哋都需要啲空間傾下，咪借咗間房俾佢哋。靖就俾咗袋啤酒我，可能當做租金啩！」
 
「嗯~」我將杯咖啡放咗上吧枱，再行咗出去同啫喱並排而坐「唔知佢哋點呢？希望無事啦！頭先靖都有whatsapp我，好似係搵緊Taz。」
「係呀！」啫喱好熟手咁係旁邊嘅儲物櫃到拎咗包Doritos出嚟「我都收到，跟住咪同靖講Taz係我到，叫佢快啲嚟救我！」
 
「哈！你都幾熟手喎！又知我有包Doritos係到？」我打趣咁問。
「上次private party我買嚟架，但冇用到，咪放係到諗住下次用！」
 
「咁點解叫靖嚟，係救你？」我提出我嘅疑問。
「唉！」啫喱飲咗啖啤酒，嘆咗啖氣先再講「次次個衰妹有嘢唔開心，又冇地方去嘅話，就會嚟我工房，拎晒我啲整甜品嘅貴酒出嚟隊。上次佢已經飲晒所有酒架啦，今次靖唔出現，我批新酒會死得好快！」
 
「但係你宜家過咗嚟…你唔驚Taz照飲咩？」
「哈哈…唔怕！我臨出門口前，襯衰妹唔覺，偷偷地將啲酒收埋咗，留咗一枝假Whiskey俾佢。」


「假酒？會唔會飲死人架？」
「呢隻唔會！因為…我係用whiskey個樽入咗啲普洱入去！個衰妹好搞笑架，唔理幾醉都好，一飲普洱，佢就會醒咗一半。由細到大都係咁！佢自己都懷疑係咪細個係酒樓飲普洱飲得多！」
「係咩？咁搞笑！我都想學Taz咁，咁就冇咁易醉。」
啫喱開咗佢第三枝啤酒，笑住咁望住我：「傻妹！你唔需要飲，我會幫你頂！」
 
唔知點解，突然覺得有啲唔好意思：「嗯…咁你打算今晚過嚟瞓？」
靦腆嘅啫喱又再次出現：「呀…嘻嘻！係呀。可以架呵？我…我意思係，借你其中一間房你瞓，無其他意思架！」
我微微一笑：「得！實得！」
亦慢慢開始收拾枱面上嘅嘢。
 
「咁…如果我唔係借間房…係借你半邊床呢？」