Welcome To Knot ~ Season1: #78. 靖

原本以為，只要我好好守護佢，終有一日佢會感受到、會接受到…
點知，原來我其實應該同佢講Sorry…
最少我都要代家姐同佢講。
 
「…行近我又怕驚動你，我又怕心難死…」
 
嚟到呢刻，我重可以做啲咩？
與其去撩佢好努力隱藏嘅瘡疤，我會選擇…
 
心痛！！


我呢刻嗰種痛，係代自己心頭上嗰個人而痛！
比起心痛自己，呢種痛更加入心入肺…
 
最後我並冇選擇行上去。
唔係因為唔夠勇氣，反而係因為充滿咗愛。
 
因為深愛，所以痛。
因為深愛，所以選擇離開。
 
臨行咗出啫喱舖頭後門前，我再抬頭望一望樓上。


明明就近在咫尺…
「唉~」輕輕嘆了一口氣，開門，離開了Jerry's Bakery。
 
有少少後悔頭先將成袋啤酒俾咗啫喱。
行咗去7仔買咗打啤酒，正諗住行過去沙灘過邊坐下吹下風。
路經Taz嘅酒樓，入面真係好好生意。
此情此景，不禁令我聯想到，如果當年Taz冇過到去美國，繼續留係香港做佢嘅太子女，成件事可能已經唔同晒！
 
可能佢繼續佢嘅剛烈性格，但已經有一個好崇拜佢，又好包容佢嘅小女朋友。
又或者，佢會有一個比佢更強勢嘅姐姐女朋友，日日捉個貪玩怪返酒樓幫手。


 
宜如果真係咁，可能我根本唔會識到佢…
但呢個世，根本就冇如果！
 
當我嚟到沙灘嘅時候，已經接近半夜十二點。
一個人坐咗係到，嘗試用酒精嚟麻醉自己。
可惜，作為一個酒吧老闆，我酒量真係有返咁上下。
 
但…唔知係啲海風吹到個人有倦意，定一或其實我開始到頂，我雙眼開始有啲視力模糊…
我見到…遠處有一個人影跌跌撞撞咁行緊埋嚟…