Welcome To Knot ~ Season1: #66. Taz

Scarlett係我係美國時候識嘅朋友，上個月先話回流返嚟。
其實我同佢都唔算太熟，只不過佢係香港冇人冇物，我見一場朋友，咪幫下手囉。
 
佢係被Sky聘請咗做part time之後，就急不及待話要請我飲番杯，當多謝我喎！
但係…本小姐今日真係好早起身，而家好眼瞓（嘩！成十點起身呀搞錯！）。
所以我先hea咗佢返自己個apartment，話聽晚等佢收咗工又無俾Sky炒，先再出過嚟飲。
 
係海邊百無聊賴，又唔想返酒樓坐，我決定…去T.Y. 八下。
 啱啱行到去T.Y. 門口，就見到全新形象嘅路比同樂少，重有嗰個好奇怪嘅…咩名話？噢~Willson！！
 


唔知佢哋傾咩，只係見到佢哋傾完之後，Willson就行返入T.Y.，而樂少個樣…從未如此迷失過。
「喂！」我決定行埋去，大力一拍路比嗰膀頭，再指住樂少個頭大笑「搞咩呀你？嘩哈哈~戴綠帽呀你？」
「咪嘈啦你！」係路比嘗試stop我繼續講嘢之前，樂少已經俾咗個屎面我，再走咗去囉！
 
「喂…喂！唓~咁小氣架！路比乜你buddy咁架！」我轉身向路比投訴。
「唉~崩口人忌崩口碗！」呢句係路比唯一留俾我嘅說話。講完佢就轉身行去Knot 嘅方向喇。
崩口？！唔通…唔係啩！
唔得，為姐妹，我決定去起一起呢個青嘅底！
第一步，就當然係捉嗰個古古怪怪嘅Willson出嚟啦！
 


二話不說，我衝咗入T.Y.。
師太就坐咗係reception，定定咁望住我。
「呀~嘻嘻！你好呀，冇！我見大家都變咗做街坊，咪過嚟探下你哋，吹下水囉。」以我多年同茶客R水吹嘅功力，師太呢啲幸福少奶好難唔落搭架喎！
「呀！哦~」師太完全反應唔切。
「咦！？你呢到裝修都幾舒服喎。介唔介意我參觀下？」都唔等師太俾咩反應，我自己就行咗入去喇。
 
行入去先望左邊，見到師父係到幫緊個客剪緊頭髮。
嗯…啲人話當一個人專心做一件事嘅時候，亦係嗰個人最charm嘅時候。
師父宜家嘅樣，又的確幾charm 幾吸引，你睇師太望住佢嘅眼神就知啦！
 


嗱！咪誤會，我真心覺得專心做嘢嘅人charm。好似Oppa專心整餅、Sky專心沖咖啡、路比專心查案（呵！我有幸見過一次）、靖專心……
唏！點會諗起佢架？
 
視線離開師父，我轉為望向右邊。
見到目標人物了！
嗯…其實會唔會係我被發現咗呢？
佢坐咗係一張剪髮凳上，咀角揚起咗一邊，似笑非笑咁直勾勾望住我。
 
呢個人，相當有嫌疑！