Welcome To Knot ~ Season1: #67

當Kwan仔同楊言知道我要請多咗個part time嘅時候，都覺得Scarlett係一個好選擇。
當然啦，聰明伶俐不在話下，重要對cafe嘅運作有基本嘅了解，唔係咁易搵架！
話時話，原來Scarlett有1/4嘅美國人血統，唔怪得個樣有啲mix嘅感覺啦。
 
4：30pm，路比以一頭更短嘅頭髮返咗嚟。
佢都係選擇坐係吧枱。
但就唔係Taz嗰個又可以望到門口又可以唔俾人見到嘅吧枱邊，亦唔係對正我主要工作範圍嘅正面枱，而係喺吧枱轉角，可以見到我做嘢，但我其實甚少對住嘅盲點位。
 
「咦？個新look幾好睇喎！」我笑住將杯ice mocha 放咗係佢面前。
「係咩？」路比靦腆地摸一摸自己嘅短髮，再笑一笑「不過我都覺得幾好呀！係喎，一陣你收6點？」


「嗯~」我自顧自底頭繼續沖調咖啡，一邊回應路比「我約咗靖6：30嚟車我哋。」
「咁…一係我幫你去收舖啦，你咪可以早少少上去換件衫先囉。」
「都好！咁麻煩晒你喇。Kwan仔會話你知點做架啦！」
 
好彩有路比幫手，我哋6：30pm就已經企咗係路邊等緊靖喇！
靖嘅黑色Saab 9-3 Aero慢慢駛到，路比同我都各自上咗前、後座，車就向住尖東方向進發。
靖係柯士甸道訂咗食韓燒，係正宗嘅韓國燒烤，並唔係個啲任飲任食嘅港式韓燒。
亦可能因為靖識人，所以韓裔老闆俾咗間房我哋。
 
路比同靖都點咗啤酒，我當然唔敢同佢哋癲，乖乖哋飲我嘅柚子茶。


食物好快就到，路比就先燒咗片牛肉，再放係生菜當中，配埋啲配菜，包卷好。
坐我身旁嘅路比將手上剛包好的菜卷遞咗俾我：「食啦。冇落泡菜架，放心啦！」
「吓？你自己食啦，我自己整得架喇。」
坐我哋對面嘅靖開始忍唔住：「Sky，接咗佢啦，推嚟推去做咩？宜家有個型B serve你唔好嘅！」
 
我同路比聽到「型B」兩個字，都忍唔住笑咗出嚟，全因冇人會想像到路比之前係有幾薯！
 
三個人，亦由呢個話題開始「話當年」