Welcome To Knot ~ Season1: #66. 路比

每次去剪頭髮，心入面都不期然哼起首歌：
「…濕了便　吹一吹　愛情由它去
留下眼淚獻給誰　誰要這點水
分與合　洗剪吹　我們成長裡
尋伴侶　換髮式　各有程序…」
 
最慘係，我為咗可以keep到短髮，差唔多一個月會剪一次。
而呢首歌，就同大姨媽一樣，一個月都會嚟探我一次。
 
見住師父手起刀落，心情都跟隨飄落嘅髮碎而心有戚戚然（嗯~原來我文筆都唔差！）


 
幾多年呢？
印象中，我當日成個kai子慌死遲到咁，係咁衝入班房搵位坐，而佢就係第一個用佢可以殺死人嘅笑容嚟同我打招呼，兼請我一齊坐嘅人。
結果我哋做咗三年同學，三年嘅好朋友。
 
佢係讀完書之後就去做咖啡學徒，我就去咗考警察，雖然前途各異，但我哋一直都維持知心好友嘅關係。
 
我唔係冇表白過，基本上由讀書開始，我差唔多每3-4個月就表白一次，開頭佢都會好認真咁答話要專心搵佢嘅夢想先；後尾，佢就當咗我嘅表白係開玩笑。
直到佢去台灣，我就下定決心，要紥職，要俾到個安穩嘅環境佢去搵自己嘅夢。
 


當年佢話要過台灣學藝…知唔知我真係有諗過唔做警察陪佢過去？
係靖一句：「佢會睇唔起放棄追求夢想嘅人」，我先冇咁做。
 
直到佢係台灣出咗事，我係佢第一個亦係唯一一個會聯絡嘅人。
我個刻咩都冇理，嗱嗱淋遞假紙再飛過去台灣搵佢。
我唔介意俾人話我黑心，不過我真心𪊓幸佢係人生最黑暗嘅日子，可以陪住佢嘅係我。
 
都6年喇！
我仍然忘記唔到佢開懷純真嘅笑容，同個對可以電暈我嘅雙眼。
 


到今時今日，我真係唔再太介意做唔做到佢身邊嗰個。
我要嘅，只係可以再見返當年嗰個好燦爛嘅笑容。
 
師父剛好剪完，思緒亦都係佢最後一剪時回歸。
我暗暗地再一次提醒自己，要一直做好我呢個守護者同守密人嘅角色。
一直！