Welcome To Knot ~ Season1: #63

好好休息咗一日，叉足電，今朝再抖擻精神去開舖。
 
咖啡嘅香味再次瀰漫住整間Knot。
比起好多香水，我都係鍾情咖啡嘅香味。
咁當然，出街我點都會搽少少香水，每一年出一次嘅ck Summer係我嘅不二之選。
 
朝早十點，有個稀客到訪。
「Welcome to…魚魚？！」
「早晨Sky姐！ 早晨Kwan仔楊言！」魚魚永遠都係乖乖巧巧嘅一個。
「點解你會嚟嘅？」遞上Green Tea Latte後，我問。


 
魚魚呷了一啖，一臉享受咁答：「嗯~最近接咗份廣告freelance，幫手做美指助手，見呢邊環境可能會啱，咪入嚟睇景囉。」
「乜你唔係返台灣咩？小卒又話陪你返過去？」
「係呀，但9月中先開學，咪9月頭先返囉。宜家做下freelance攞下經驗。Sky姐你知我不嬲都對美術指導好上心架。」
「我知…最緊要你做得心啫。」
 
「係呀~ Sky姐我有件事想問下你。」魚魚煞有介事咁問。
「關於小卒架？冇事呀嘛你哋？！」
「唔係小卒，我哋好好，冇嘢呀。其實係關於…上星期五個Party，我見樂少拖住個女仔嚟，你知唔知個女仔係咩人呀？」魚魚底聲咁問。
「嗯…好似係叫亞青，係中環做SALES，咁佢放假嚟海邊學潛水，就識咗樂少囉。樂少好似好認真咁，話亞青係佢女神喎。」我嘗試回憶起當晚樂少係點介紹亞青俾我識架。「有咩問題？」


 
「冇…冇！我見嗰個女仔好熟口面，唔知係邊到見過，咪問下囉。」
「係咪你去中環嗰時撞過呀？」Kwan仔放底份caesar salad時搭訕。
「唔該Kwan仔。唔會啦，我返咗嚟幾耐啫？而且我都唔會去中環買嘢，買舊嘢就會。」
 
「係咪啲朋友嘅朋友呀？呢~係Facebook見到朋友啲相呢！」楊言又搭訕，呢對活寶貝有時真係俾佢哋激死。
「唔知呢…唔緊要啦。最緊要係樂少開心啫。」既然搵唔到答案，魚魚決定都係回歸現實，專心對付個份大大嘅caesar salad好過。