Welcome To Knot ~ Season1: #64

就快午市，魚魚都一早走咗去睇景。
我真心覺得旺季時候嘅Knot，以宜家嘅人手，係好唔夠用！睇嚟我真係要好好下定決心，盡快請多個part time。
 
係忙到工作枱上開始積聚咗4、5杯飲品而重未出到嘅時候，我嘅救星出現咗！
「喂！有冇咁忙呀？！」一個身影突然係我前面，隔住張bar 枱伏過嚟。
「嘩！Taz，嚇死人咩？你嚟啱喇，快啲幫手出咗啲飲品先。嚟啦~唔該你啦！」我忙住沖咖啡，其實根本都冇抬過頭望佢。
「得！咪嗲我！你唔嗲我我都實幫你，放心！」
一講完，Taz 嘅身影就係我眼尾消息咗，換嚟嘅，係一個勤快嘅身影，不斷遊走於工作枱同客人之間。
 
手上嘅單暫時清晒，抬頭想望一望出面咩情況，嚇人嘅事就發生咗！


Taz佢…竟然…坐。咗。係。佢。個。專。位。食。緊。意。粉！
最重要係，佢碟意粉已經食到差唔多尾聲！
咁…頭先我眼尾見到個「好勤快嘅身影」，係邊個嚟架？
 
Taz似乎知道我諗緊咩，對我單一單眼，再示意我望向舖面…
我見到一個高高嘅女仔係枱與枱之間遊走著，應對住不同客人嘅不同需要。
佢輪廓有啲特別，好似…有少少mix 嘅感覺。
「佢叫Scarlett，係我係美國嗰時識嘅friend，啱啱返嚟香港睇下有冇得發展，又未搵到工，咪睇下你會唔會想請佢做part time 囉。同佢講咗架喇，今日當試工架！」Taz邊咬住枝biscuit stick，邊一臉沒所謂咁講。
 
「吓！咁又唔好…佢都好似好熟手咁喎！」面對住Scarlett嘅自動自覺，我不期然對佢產生了好感。


呢個時候，Scarlett發現咗我同Taz都係到討論緊佢，慢慢向我哋步近：「Hi！ Scarlett！ Nice to meet you！」
 
「Hi！ 多謝你幫手呀！好彩得你咋！」我衷心表示感激。
「唔駛客氣~我係美國都有做cafe part time，所以都熟手架！」Scarlett似乎係一個友善又勤奮嘅人。

就係咁，Scarlett開始成為Knot Cafe嘅一份子。