Welcome To Knot ~ Season1: #62. 樂少

宜家星期二嘅海邊，真係一個好悶嘅日子。
 
Knot Cafe例放，宜家連啫喱都話放星期二，成個海邊只係得返Taz個死婆！搞錯呀！
就咁，本來我都係逢二放架，貪星期一晚如果成班去玩，我唔怕斷片嘛！啫喱或者King哥實車我返嚟架。
 
但係自從遇到我女神青之後，我就同老闆要求credit星期三放！
我Baby逢星期三過嚟學潛水喎，我實要陪住佢架！
 
亦因為咁，呢個星期二開始，我會處於極度無聊嘅狀態。唉~鬼咩！連去Knot吹下水嘅機會都冇。
 


好彩嘅係，我親愛嘅King哥係成朝最放蚊嘅時間嚟咗！
我簡直可以用喜極而泣嚟形容King 哥嘅出現：「Oh！ 巴打！見到你，我先發現人生有返啲意義！」
King哥閃身避開咗我嘅擁抱：「妖！行開啦！今日放假諗住搵啫喱去出海，點知強嫂又話佢放假，重要由琴晚出咗去都冇返過嚟，都唔知去咗邊！」
「嘩！成晚冇返？啫喱都曳喇~」我唔係一個咁易放棄嘅人，所以決定慢慢行前，向住「強勁嘅臂彎2號」進發。
 
「唉~ Winnie今日又要返學…好悶呀。喂…喂！搞咩又痴埋嚟？！」我襯King哥防不勝防嘅時候，嚟一個突擊，攬住咗我嘅目標 – 手臂！
「頂~ 如果唔係因為知你係no label重要偏b，我真係以為你暗戀我架大佬。」King哥一臉無奈咁俾我攬住佢強勁嘅臂彎。
「要暗戀你，一早細細個就戀咗飛埋啦，駛等宜家？咪嘈啦，好眼睏，借俾我挨陣啦。」我都唔理自己宜家其實係舖頭，一頭就挨咗落King哥嘅手臂到。
 
「喂！」King哥拍咗我個頭一野「你同嗰個亞青，嚟真架？」


「嘩~ 我女神嚟架。」
「樂少，你有邊條女唔係叫女神架？呀！有，同你ONS個啲。」
「King哥，咪玩我啦。我去ONS時又話我唔認真，宜家認真，又問我係咪嚟真。想點啫你哋？」帶住少少悔氣，我決定起身扮下執貨架。
「我同你一齊大架，細細個你已係咁。記唔記得嗰時我哋得個幾歲人仔，學人去沙灘玩打排球。結果俾幾個中學生恰。」
「記得！個次亞Taz逞強，行埋去鬧班人，結果差啲俾人打，好彩你同啫喱護住佢，啫喱重幫Taz硬食咗一巴添。嘩~諗返都覺得型到爆。」
「問題係，你個次之後死都唔肯再去沙灘玩。次次唔係扮唔舒服，就係扮晒嘢咁話沙灘幾唔好，一係就拉咗我地去碼頭，一係就去公園。樂少，一朝俾蛇咬，唔一定以後都要怕草繩架。」
「…唓~ 咁宜家我都會落沙灘個邊架啦。有咩問題啫？」
「我宜家講緊你嘅感情線呀。」
 
「…分叉的感情線　正等我為你蔓延　彼此的感情線　早佈滿對方雙手　你的感情線　看出我下個十年　分叉的感情線　總會有某天一起發展…」


「喂，同你講緊正經嘢呀，唱乜ｑ歌呀。我係話，你唔好因為曉櫻，而逃避咁耐啦。」
「夠啦！！！」唔知邊到嚟嘅勇氣，我喝咗King哥一聲。「……Sorry呀King哥，我…重有嘢要做，唔同你傾住。呀！星期五去Silence呀，我請你同亞嫂。」
 
King哥見我都落晒閘咁唔想再傾，都無晒我符咁走咗，留底咗一個沈溺係回憶中嘅我。