Welcome To Knot ~ Season1: #61. 路比

知唔知咩叫得閒死唔得閒病？
呢排唔知搞咩鬼，十萬個case要跟，班手足個個都做到癲咗咁。
我當咗差四年，做咗CID年幾，都叫升得快架喇。
呢份工係我嘅夢想，所以再攰再忙，我都冇諗住要放棄。
 
宜家晚晚返到去就攰死咗咁癱上床，唔好話溝女，我連班大帝呢排係點都唔得閒去理。
咁當然，我又唔會完全唔掌握嘅，有樂少呢條針係到，基本上宜家嘅人物關係圖，我都略知一二。
 
不過我最關心嘅，都係嗰一個。
一個我默默守護咗好耐嘅人。


知道佢一切安好，就已經足夠。
 
如果你問Knot班友仔，佢哋一定會用「魔警」嚟形容我。
佢哋話我專搞𡃁妹喎！
嗱！作為一個警務人員，我係唔會知法犯法，搞啲未夠秤架。
 
可惜…條條女都係身體成熟，但心智唔成熟。
成日都嫌三嫌四，又話我唔陪佢地，又話我唔緊佢哋，煩到死。
所以我平均3至4個月就會散。
係我記憶入面，我拍得最長嗰個…好似都有7個月！


 
唔係我唔想長，又或者我真係只吼妹妹仔…
反而，係因為我好清楚自己嘅心結係邊。
與其會將差唔多年紀嘅女仔做比較，重要一定係比唔上我心中嗰個，咁不如索性識啲再細啲嘅，到時就算再點比，我都可以呃自己，話根本冇得比。
我心中嗰個，根本無人可以比。
 
我知道，我係佢心目中就只係一個可以完全信賴嘅好朋友。
如果我係g 或者pure，我應該會被佢歸納做「閨密」。
而因為我係b，所以我只可以做佢嘅兄弟。
 


但其實我好滿足自己有呢個位置，一個佢有事，第一個就會諗起我嘅位置。
可以係佢最困難時陪住佢，我已經覺得好心滿意足。
有時愛一個人，真係唔需要擁有架。