Welcome To Knot ~ Season1: #58

星期一嘅打佯時間，係每個星期我都期待嘅時段。
忙咗一整個星期，終於可以好好休息下。
 
唔知係咪因為今次自己主動約啫喱，我竟然有啲忐忑不安。
唔知…啫喱會點睇我呢？
佢…會唔會覺得我好大膽，太隨便呢？
 
其實我好清楚，如果再咁樣無了期去等個結自己解開，我唔單止令自己繼續痛苦，亦都負咗嗰個一直願望無條件等我嘅人。
 
換好衫，我拎起個旅行袋，就落樓等啫喱喇。


百無聊賴，我把玩著工作枱上嘅月曆。
距離Ocean嘅生日，重有十日。
兩年前嘅7月24日，係我第一次以「女朋友」嘅身份同佢慶祝生日，亦都係唯一一次。
 
我唔想俾回憶入侵我嘅思緒，順手就將月曆揭後一頁。
我之前已經用紅筆係8月26日至9月2日上畫咗記號，顯示Knot會休息。
我知，暑期最後一個星期，好多人都會book場搞Good-bye Summer Party，呢個星期會係賺錢嘅好機會。
但係有啲嘢，我相信比錢同事業更重要。
我知道，如果我想move forward，呢段日子我一定要去一去台灣。
 


「咯咯咯！」開咗Knot嘅後門，係啫喱。
啫喱一如以往簡簡單單嘅格調，深藍色tee配Levi's 洗水牛仔褲，加埋Timberland嘅Classic boot，俾人自然舒服嘅感覺。
唔知點解，見到眼前嘅佢，我咀角不自覺地向上揚起咗。
 
「Hi！你…行得未？」「OK！」
啫喱逕自幫我拎起我個旅行袋，就向停車場方向出發。
 
啫喱揸住佢架黑色jeep wrangle，向住東涌方向進發。
每次見啫喱好輕鬆咁就跳咗上車，再諗返起次次小卒或者樂少要「爬」上車嘅狼狽樣，我就會覺得眼前呢架車，真係唔係人人都揸得。
記得有次我同Taz半扶半推咁將個已經斷咗片嘅樂少𢯊上車，Taz係忍唔住爆粗：「頂！ 搞錯呀！邊有人會揸架咁Q高嘅車架！上車都難，宜家重要性𢯊呢pat嘢上車！妖~」


所幸嘅係，我未至於要用「爬」嘅方式先上到車。
 
「嗯…我book咗酒店嘅buffet，聽講佢哋啲cake唔錯，個師傅幾出名架…」
啫喱一直係咁介紹邊個師傅叻整咩、要點整先好食，我突然有個預感，如果同佢一齊，以後嘅日子除咗肥之外，應該重會…好甜！