Welcome To Knot ~ Season1: #57

其實今日除咗樂少嚟Tea嗰時發生嘅小插曲外，我諗以後如果真係冇人幫到我手，我可以考慮下高薪聘請Taz嚟客串幫忙下。
 
咪以為Taz係啲咩太子女，嬌生慣養咁，今日佢係Knot嘅表現，完全可以用「一個打十個」嚟形容。
無論幾多人同一時間有要求都好，佢都可以應付得自如。
 
「唏~你估我係老豆間酒樓到真係齋坐架？你都未見過同一時間幾廿枱落單叫人嘅情景。」呢個就係當我同下午送蛋糕過嚟嘅啫喱讚緊Taz時，佢嘅回應。
「知道最乖係你喇！快啲去做嘢啦！」啫喱就好似讚賞緊一個小朋友咁，摸咗一摸Taz個頭「留咗個mini New York Cheesecake 俾你，一陣過我舖頭攞啦！」
「嘩！多謝Oppa！」Taz一聽到啫喱嘅讚賞同獎勵，就開開心心、更加起勁咁走咗去舖面幫手喇。
 
「呀…Sky！」待Taz行開咗，啫喱就叫住我。


佢不自覺咁低頭，抓一抓自己個鼻「一陣收舖之後，我同Taz先返過舖頭拎蛋糕，跟住我再返過嚟接你呀！」
面前呢個靦腆嘅啫喱，真係好得意，一啲都唔似平時Oppa嘅佢。
我笑一笑，點一點頭：「嗯~」
 
可惜就係啫喱走咗無耐，就發生咗事喇。
蜜運中嘅樂少拎住佢個電話，一邊係咁㩒㩒㩒，一邊行咗去4號枱自行坐底。
「呀~唔好意思！」樂少聞聲枱頭一望，原來佢對面一早坐咗個少女係到。
少女帶少少怒氣咁睥實樂少：「呢個位有人架！」
「嘎！唔好意思！Sorry Sorry！ 冇心冇心！」樂少即刻係到位到彈起身，𤓓爆咁走咗埋嚟bar枱坐。
 


「哈哈哈~抵死！成日掛住條女，搞到宜家自己𤓓爆！」Taz幸災樂禍咁走咗埋嚟踩多樂少一腳！
「喂！好啦喎你！咁我係𤓓咗，但關我條女咩事？做咩燒埋佢個叠？」樂少似乎…惱羞成怒？！
但係Taz一啲都唔識死，繼續佢嘅咬住唔放。「咩啫！咁係呀嘛！頭先唔係掛住同條女whatsapp，駛坐錯枱咁𤓓？」
「咁平時我呢啲VIP，楊言Kwan仔都會留定位俾我架啦，我點知今日係你呢個二打六啫？」
「二打六？！你話邊個二打六？」
 
「好啦！」我大力將樂少要嘅咖啡放係枱上，發出微微嘅聲響。「嘈完未？係咪要趕我客？係咪要friend都冇得做？」
可能我甚少發惡，佢兩個立刻唔敢再嘈，Taz嗱嗱淋去返舖面招呼客人，樂少就快快手咁K.O.自己個tea，一聲唔出就走咗去。
呀~正確嚟講，佢臨出門口，經過Taz身邊時，係出咗一粒「哼！」聲架！