Welcome To Knot ~ Season1: #58. 啫喱

明唔明白呢兩日我有幾咁坐立不安？
知唔知我幾驚Sky唔肯收張禮卷？
又了唔了解當Sky主動話同我一齊用嘅時候，我有幾驚喜？
 
由行返去Knot接Sky，到宜家去到酒店check-in，我都只可以用戰戰兢兢嚟形容自己嘅心情。
一方面我好期待有啲事情會發生，令我同Sky嘅關係可以推前一步；另一方面，我又好怕Sky 突然反口話想走，又或者其實Sky根本同我諗法唔同。
 
呢份禮物，實在有太多不確定。
 
我認！我係有策略性地去安排一切架。


由將個無寫名嘅禮封放入紙袋，到下午再去送貨，等Sky主動問我，都係我嘅安排。
咁當然，「以退為進」呢招，都係同亞King飲酒個時，佢教我架啦。
 
其實，我都冇咩把握Sky會唔會約我。
而如果…佢約Taz或者靖…咁都無法。
最緊要，我都係想佢有得抖下休息下啫。
 
我知我自己只係一個毫不特別嘅餅佬（OK！ 餅B好未？），只求平淡開心，天長地久…
係呀！係老套呀！咁又點？玩得幾癲嘅人，心深處咪又係渴求呢樣嘢！
 


我以前甩拖嘅原因，不外乎都係年少氣盛嘅我未玩夠、或者對方未玩夠。
但人大咗，就開始學會咩叫「難得平淡」。求嘅，就變成咗只要一個可以陪到對方行到最後嘅人。
 
記得有人問過我，如果我同partner一定要有一個先死，我會想邊個死先？
我二話不說，真心希望先離開嘅係對方。
 
唔係我黑心，而係你根本唔會體會到，尚存嘅一方所需要面對個種痛、個種牽掛、個種無奈、個種悲絕…係幾咁難受熬人！
我絕對唔會希望我愛嘅人要面對呢個情況，我寧願難受辛苦嘅係我自己。
 
我更加清楚知道…我唔會想我宜家眼前嘅呢個人，再受多一次呢種苦。