Welcome To Knot ~ Season1: #56

其實我真係唔係好知啫喱以前係邊日放假。
 
印象中Kont會開舖嘅日子，都一定係啫喱自己親自送貨過嚟。
嗯…都有兩三次例外嘅！但都係因啫喱病咗，或者係佢個邊啲爐有事，佢要頂住，先過唔到嚟，改為強叔送貨。
 
星期一，開門第一個入嚟嘅人，竟然係Taz！
「咦？！ 咁早呀？ 」Taz嘅出現，的確令我有少少驚訝。「係咪又琴晚蒲完，啱啱先返嚟，所以想食個早餐先呀？」
「咩呀？！ 係Oppa琴晚係咁打俾我，又用佢啲殺人嘅甜品引我，要我今朝過嚟幫下你手，我先同我張舒服嘅床分手，過嚟幫你做一日義工咋。」
「啫喱？！」
「佢話今日得你一個，驚你會辛苦，但佢自己又過唔到嚟，咪搵我呢個閒人嚟囉！」


「咁…今日就要辛苦你喇。」個衰妹會咁好死肯幫我，其實都只不過因為係佢Oppa叫到，同因為佢最愛嘅甜品啫。
 
忙到過咗午市，我先幫Taz同自己煮咗個意粉，同沖咗兩杯咖啡。
「嗱！ 白汁海鮮意粉同Cappuccino呀。」我將呢份tailor –made lunch set送到去已經「死咗」一半嘅Taz面前。
佢抬頭望一望我，再見到眼前嘅美食，都理自己咩身世，三扒兩撥咁就K.O.咗碟意粉。
 
「呼~」Taz抹一抹咀，一臉滿足咁癱坐係半腰高的梳化上。「我以為自己死咗呀！」
「邊有咁誇呀？！」我都飲咗啖自己嘅Caramel Macchiato，笑住咁望住呢個太子女。
「我真係諗唔明。」呷咗一口咖啡，因為係Cappuccino嘅關係，Taz嘅咀唇上多咗一圈白色泡泡。「點解你會覺得暑假嘅海邊，就算係星期一，都可以自己一個人搞得掂成間舖？如果唔係Oppa叫我過嚟，你真係覺得自己一個人ok咩？」
又一啖咖啡，白色泡泡圈又深咗厚咗。「好心你就請多個人幫下手啦。」


 
「我真係諗住請多個part-time架。」我望住見前嘅Taz，突然有種感覺，開始明白點解靖會鍾意佢。「我請咗你Oppa幫手留意下有冇人可以介紹俾我。但未有咁快咋嘛。」
「人？ 我有人喎。」Taz突然好興奮咁成個坐走咗身「我有個朋友係美國嗰邊返咗嚟，如果係做part-time，我諗佢ok架。」
「真係？！咁你搵日介紹佢過嚟見工好嘛？」
「Sure~我晏啲搵佢啦。」
 
我開始收拾枱面上嘅杯碟：「你休息多陣啦。轉頭Tea-time都會多人架。重有呀，一陣三點幾樂少會嚟Tea，可以嘅話留4號枱俾佢啦。」
「樂少呢個衰仔？！」Taz揚起咀角笑咗一笑。「好~ 我實留枱架。睇下點！！」