Welcome To Knot ~ Season1: #55

5:30pm，客人群開始散退。
啫喱呢個時候都過咗嚟。嗯…梗係覺得佢今日好似怪怪哋咁，入到嚟都好似唔多想望我咁。
 
我襯Kwan仔同楊言都收緊舖嘅時候，拎咗個禮封遞咗俾啫喱。
「啫喱，呢個係咪你架？ 我今日係結包個袋到見到。我見個禮封冇署名，所以開過嚟睇過。唔好意思呀！」
「啊~」啫喱突然顯得不知所措。「呀…其實個coupon係我有個客俾我嘅。咁…咁我見你呢排咁忙咁辛苦，張coupon又係做SPA嘅，咪…送俾你，你睇下幾時得閒，咪用咗佢囉。平日都用得架。我都係借花敬佛啫。嗯…張coupon係for 2架，你…咪睇下搵邊個朋友一齊去囉。」
 
啫喱好少可講說話咁扭擰。
以我所認識嘅啫喱，佢唔係個啲口花花嘅人，與其花巧，佢會選擇用最平實嘅方法去令人覺得窩心。
當然，佢又未至於過份木獨，太過老實。有時一啲小心思、小心意，佢係會願意去花嘅。


 
我望一望手上嘅coupon，張coupon係包埋一晚住宿嘅…
我抬頭望住眼前呢個，係過去大半年都願意無條件守護係我身邊嘅人。
 
我知道，有啲嘢係需要自己主動去行出一步，事情先會有改變。
「啫喱！」我將手上嘅coupon遞返俾佢「我…唔想袋住佢。你自己keep 返啦。」
「吓？！ 你…唔要呀？」啫喱一臉失望，接過coupon「哦…我明白喇。」
 
「聽日…我俾Kwan仔同楊言都放假，所以只係得我一個，我估我要遲少少先走到。」我低頭抹住咖啡機，都冇留意到啫喱一臉不明所以。
「遲少少先走？ 走去邊？」


我咀角向上一揚，抬頭笑，望住坐係吧枱前嘅啫喱。
「去東涌個間酒店囉，唔係可以住一晚咩？ 聽日得我一個收舖，會遲少少先搞得掂架。你會揸車去架呵？！」
 
「你…你…意思係…你想用張coupon？ 你…我…你想…我去？！」面前嘅啫喱根本好似一時間唔佑發生咗咩事咁，好明顯佢個腦跟唔切。
「我嘅意思係…」我微微紅住臉，再次低頭以抹杯為藉口，避過啫喱瞪到大一大嘅雙眼。「你一陣去打電話confirm將coupon聽晚用，另外就…我星期二用埋個SPA囉。係喎…其實我都冇問過你係咪得閒？！」
「我…其實…我一早就同強叔強嬸講好咗，我逢星期二休息…同KNOT一樣。」啫喱都有啲面紅紅咁。
 
我放低手上嘅杯，抬頭望住一臉靦腆嘅啫喱，真心感受到佢對我嘅好。