Welcome To Knot ~ Season1: #54

我拎開個結包，再反轉個紙袋，將入面嘅物品倒出嚟。
有一個禮封跌咗出嚟。
 
禮封係珍珠銀色，右上角印咗東涌某新開酒店嘅名。
我打開一睇，係一張酒店住宿同SPA嘅coupon。
我將禮封同coupon反覆睇咗無數次，都冇署名話係俾邊個。
最後我唯有將coupon放返入去禮封到，諗住今晚見到啫喱，問下係咪佢唔小心留底咗。
 
4點半，繼續忙到踢晒腳。
1、2號枱坐咗一大班…應該啱啱係附近出camp嘅年輕人。


雖然佢哋係嘈少少，不過都叫檢點，唔算好騷擾。
 
其中有三個女仔突然行埋嚟吧枱。
「唔該。」頭髮短短，感覺係爽朗型嘅少女A開口問：「我想問呢到係咪有遊戲玩架？我聽朋友講話咩解結，贏咗可以有杯special free drink架。」
呢個女仔，令我諗起Taz。
 
「係呀。」我禮貌咁笑一笑，再係工作枱下面抽咗兩個結出嚟，遞咗俾佢哋。「每枱可以有一個結，如果三分鐘可以解到，就會送一杯House Label俾你。」
 
三個熱褲青春少艾嘻嘻哈哈咁拎住兩個結跳返埋位。
我突然諗起路比同樂少，呢個type，啱佢哋口味。


 
楊言好識做咁過咗去，睇住佢哋係咪真係三分鐘內搞掂。
另一個頭髮及肩，好有陽光氣息嘅少女B拎住個結好努力咁解，但似乎都唔係太有進展。
三分鐘夠，係楊言嘅提醒下，繩結轉咗去長長頭髮，斯斯文文嘅少女C到。
 
三個少女同班朋友輪住係到試解我兩個結，未輪到嘅朋友都哄晒埋去，想睇下有冇可能解到。
其中一個結去到一個cool cool地嘅男仔手上，佢冇出聲，只係靜靜咁望住手上嘅結，再慢慢咁開始由個繩頭開始解。
 
兩分鐘，佢成功解到第一個結。
成班friend都起晒哄，少女C用咗個好傾慕嘅眼神望住個男仔，問咗句：「你好叻呀~ 你點樣解到架？」


「哼~」Cool男咀角微微一揚，似乎對少女C嘅讚賞好受落咁「你哋咁心急，邊會解到。冷靜啲睇下個結係點先，再搵返個繩頭，就自然會解到。」
話口未完，佢就拎埋一個四眼男手上嘅第二個繩結，用返頭先嘅方法，兩分半鐘，解咗！
 
我對呢個男仔有一種…另眼相看嘅感覺。
應該話，我對佢頭先番說話，好有感受。
「冷靜啲，睇下個結係點嘅樣，再搵返個繩頭，就自然會解到……」