Welcome To Knot ~ Season1: #51

下午5：00，salon嘅師太過咗嚟。
 
「呼~ 好攰呀！唔該我要杯凍latte…少甜！」
我向住呢個散發住幸福氣息，一入嚟就揀坐吧枱對住我嘅女子笑一笑。
 
我將沖調好嘅咖啡放係伏咗係枱面上嘅佢面前。
「你要嘅咖啡。你冇嘢呀嘛？」
「嗯…唔該！無事，只不過有啲攰，估唔到開張咁多嘢做！」
「唔緊要啦，都係開心事啫！」我嘗試安慰。
「咁又係！師父可以自立門戶，都真係幾開心！我哋都搬咗嚟附近住，以後大家可以成日見啦！」師太展示佢友善嘅笑容。


「嗯…有機會介紹呢到啲朋友你識，佢哋都好nice架。唔好意思，我要做嘢先。」客套完，我同Kwan仔佢哋就要準備打佯，同安排今晚party嘅嘢。
 
師太飲完杯咖啡，正想走時同啱啱想入嚟嘅啫喱打個照面。「噢~ Hi！ 今晚要麻煩你同你女友啦！一陣見！」
「吓？喂…佢…我…」啫喱一臉尷尬咁想叫住已經走遠嘅師太。但人哋根本一啲都聽唔到。
 
Kwan仔走過去拍拍啫哩嘅肩膀：「算吧啦！澄咩清呀，遲啲咪又要改多次。」
「咁…人哋都未ready！」啫喱無奈咁講。
「未ready，咪做到佢ready囉！」Kwan仔講完呢句說話，就留底咗呆若木雞嘅啫喱係門口了。
 
「啫喱？」我從工作枱個邊發現呆咗嘅啫喱「做咩呆晒咁企係到？」


「吓？！呀…冇事冇事。有咩要幫手呀？」我都未回答，佢就已經幫手搬緊啲枱櫈喇。
 
晚上8點，師太先過咗嚟打點一下，而師父同啲朋友跟住陸陸續續都過咗嚟。
 
Private party 其實就即係包場自己同班朋友一齊玩，唔需要音樂或者dim燈，食品都係飽肚為主，我哋唔需要成晚不斷咁整tapas。
 
我係今晚嘅客人當中，發現咗佢！
銀短髮，其實一啲都唔難認。
 
我襯空檔，向師太點頭招一招手。「唔好意思，我想問下，銀短髮嗰個係咩人？」


師太望一望：「佢？佢係師父其中一個stylist，叫Willson。做咩？你…對佢有興趣？你唔係有啫喱咩？」
「唔係，我好奇問下啫。」我尷尬咁答。
「哦~佢係TB，好似係師父啲朋友介紹識嘅。唔多講嘢，師父話佢手勢唔錯架。」
「嗯！唔該你先，我好奇問下架咋。」
 
呢個Willson，真係…感覺上有啲奇怪！