Welcome To Knot ~ Season1: #50

琴晚個party玩到十二點幾，啲人先散晒。
而結果係，有兩pair人都租咗樓上嘅地方過夜。
即係話，Knot今次係full house。
 其實未散場，我已經叫咗楊言同Kwan仔收工返去休息下，第二日早少少返嚟幫我開舖好過。
啫喱留咗係到幫我手清場，最後我要迫佢返過去，成點幾佢先肯走。
 
第二日，我瞓到差唔多十點先落樓下，好彩楊言同Kwan仔都乖，幫到手。
係時候我要諗諗，係咪請多個人會好啲。
 一直忙到午市過後，我先有時間坐底食少少嘢。
今晚重有另一個private party 要搞，我叫咗楊言同Kwan仔輪流上去抖下。


唉~ 我重想聽日開到舖架。
 
「做咩係到唉聲嘆氣呀？」啫喱突然係我面前出現！
「呀！嚇死人咩？」
「係你諗嘢諗得太入神啫~」
我凝望住啫喱，搞到佢開始有啲唔好意思。「點解…你琴晚明明成點幾鐘先返過去，今朝就一早起身焗包，點解你可以重精神過我嘅？」
「咁…見到你，咪精神囉。」
呢一刻，我feel自己面都紅晒。
咁大個人，情話聽唔少，但由啫喱呢個睇落唔太識浪漫嘅人嚟講，呢句說話佢應該係鼓咗好大勇氣先講到。
 


「啊…呀！ 係呀。」我唔打算繼續呢條令人尷尬嘅話題。「我想問你識唔識人想搵嘢做？ 我想請多個part-time 幫下手。如果你有人選，介紹俾我呀。」
我幫啫喱沖咗杯ice coffee，放咗係佢面前。
「嗯…我幫你問下啦。到時話你知。」佢啜咗一啖再講「我頭先兜咗去街尾望下間salon，又裝修得幾靚喎。今晚個private party唔知會有幾多人嚟呢？」
 
我望一望前幾日師父俾我張order紙：「佢寫就20-30人，即係少過琴晚。Private party 應該唔會玩得太癲，希望唔好又搞太夜啦。」
「今晚…我過嚟幫手啦。」啫喱用認真嘅語氣同我講。
「吓？！咁…唔該晒你。」無可否認，我聽到佢話會嚟幫我手，我係開心嘅。
 
但究竟我係開心今晚多個人幫手？
定係開心…今晚可以同佢一齊做嘢？