Welcome To Knot ~ Season1: #51. Taz

今晚Knot有private party，Oppa同Sky都唔得閒陪我去Silence玩，King 同Winnie更加唔會理我。樂少個衰仔最衰，明明呢頭應承同我去蒲，個頭就話接埋亞青先直接過去，咁擺明重色輕友，衰到冇朋友！
 
好冇mood，結果我求其搵咗件吊帶背心加貼身牛仔褲，化個淡妝就出咗去。
 
過到佐敦，時間都重早，就走咗去翠華食個海南雞飯。
食食吓，叫咗個亞哥埋嚟：「靚仔，幫我寫個豬軟骨唔知咩餃米線，茶走行街。」
「收到！」
 
有時我真係覺得一間茶記做到好似翠華咁，真係好勁！都算係茶記界嘅叫一個好大突破。
嗯~不如返去都提議下老豆將酒樓搞上市好喎！


 
我一路都諗住點搞上市好，唔經唔覺就上咗去Silence。
我知咁早Silence都冇咩人住，所以上到去只係見到小寶好得閒咁抹杯，我都唔覺得意外。
「咦？拎住袋外賣，請我食架？」小寶伸手想拎。
「咪搞！俾亞靖架。」都唔理小寶係我身後點吵鬧，我自己就走咗入靖個office。
咦？！唔係到？
唔通係VIP房？
 
轉過去，見到門輕掩。
我輕輕推開門，竟然…！


竟然俾我見到，靖同嗰個…嗰個Peizi攬埋一齊！！
搞乜x呀！
呢頭話做我守護人，講到幾咁偉大咁！嗰頭就同個TB 搭上？
佢…同佢家姐簡直一模一樣！
 
我將袋外賣俾咗小寶：「請你食！食死佢啦！」
跟住就暴走出Silence！