Welcome To Knot ~ Season1: #49

今晚係一個好奇怪嘅夜晚。
 呢個唔係Knot嘅第一個night party，但一定係最多變化嘅night party。
 
唔講我同啫喱 (其實都唔係有咩變化，就繼續我們的「順其自然」吧)，見到最多變化嘅，一定係樂少。
 
以我所認識嘅佢，係唔會玩咩真感情架。正確嚟講，係唔夠膽玩。
佢曾經有一次好感性咁同我講過，佢宜家未準備好再去入多次情關。佢寧願去ons或者去flirt下人，都唔想承擔多一次痛。
 
前兩日見佢嚟tea嗰時，已經見佢撩緊個客。
不過見個客又冇話抗拒，重好似同樂少好熟咁，我先唔阻止佢。


點知，今晚就見到佢拖住人哋隻手過咗嚟。
我唔知佢諗緊咩，但從佢嘅眼神，我覺得佢係真心開心架。
希望佢今次真係認真啦。
亦都希望，佢今次唔會受到任何傷害。
 
靖今晚都好似有啲收穫咁。
呢個叫Peizi嘅TB，成晚都同靖傾計。
由飲咩酒，到不同cocktail嘅不同配搭，再到個人職業、興趣、愛好…
唔知點解，硬係覺得靖刻意咁笑，顯得對Peizi好有興趣咁；尤其當Taz係佢附近徘徊嘅時候。
而每次，Taz都係黑口黑面咁行開咗。


 
獅子呢？！
平時係party animal嘅佢，今晚似乎靜咗落嚟。
見佢要咗枝巴西啤，就走咗出去露天位坐，好似完全無mood 去識人咁。
而似乎，唔單單得我一個見到佢咁。
 
一個中等身型嘅短銀髮B，過嚟問咗我要咗舊青檸，跟住就走咗出去同獅子搭訕。
「佢叫Willson，係Btf都幾紅，啲女都幾冧佢架。」Taz唔知幾時過咗嚟，沒頭沒腦咁講咗呢句。
「佢…係player？」對於player呢個字，我承認我係會敏感啲。
「唔知喎又，又唔覺佢有咩po係flirt人之類。」Taz講完，就拎住佢今晚應該第6支Heineken，走開咗去另一邊玩喇。