Welcome To Knot ~ Season1: #49. 靖

雖然今晚party係Knot搞，但我始終都係唔放心。
我選擇坐咗係凍櫃附近嘅吧位。
 
Taz已經係第三支Heineken。
每次見住佢行過嚟，我都有小小嘅希望佢係搵我。
可惜，我亦都好清楚，佢行近只係為咗拎酒飲。
 
乾咗手上支Bundweiser，我向Sky拋咗一個眼神。
Sky皺一皺眉： 「你肯定？」
我揚一揚手，Sky最後無我辦法咁走咗。


 
啫喱望一望Sky，又望一望我：「搞咩呀你哋？」
我咀角微微一揚：「一陣你咪知囉。」
 
過咗無耐，Sky拎住支Johnny Walker Black Label 入嚟。
佢開機沖咗一杯Espresso，再係個Cocktail 杯到倒咗大半杯Black Label 。
Sky將熱嘅Espresso 同杯Black Label 放咗係我面前。
 
啫喱好好奇咁望住我哋。
「靖鍾意自己嚟。」Sky 只係講咗呢一句就行開咗喇。


 
「將熱嘅Espresso倒入Scotch Whiskey到，可以減少酒入面嘅酒精成份，而咖啡同時又可以帶到Scotch Whiskey嘅煙燻味出嚟，你都係一個識飲嘅人喎。」我同Sky嘅舉動，除咗吸引到啫喱之外，似乎都吸引到眼前呢個中等身材，頭髮明顯摷亂嘅TB。「Hi~ 我叫Peizi。呢到…唔係唔賣酒架咩？ 支Black Label 你私伙架？」
 
開得bar，識飲酒嘅人我見得多，但識點樣去飲嘅，我真係好少遇到。
既然今晚都只係得一個人做守護者，我真係唔太介意有個人嚟陪我吹下水。
我笑一笑：「有冇興趣要一杯？」
話口未完，Sky又將一set放咗係Peizi前面，跟住拉咗啫喱走開咗。
 
我開始同Peizi傾下酒經。
同時，我眼角瞄到Taz向住我呢邊行緊過嚟。


佢手上個支Heineken，明明重有一大半。
 
「Hi~ 未見過你喎，我就係Taz。」
Peizi望一望Taz：「噢~ 你好呀。我叫Peizi。」
佢伸手同Taz握一握之後，注意力又返番嚟我到。
我用眼尾瞄一瞄Taz，跟住就冇再理佢。
 
其實我諗緊咩？ 我好似…有少少想利用Peizi，嚟令到Taz緊張下我咁。
哈哈…我諗我真係飲多咗。