Welcome To Knot ~ Season1: #49. 獅子

作為一隻Party Animal，我當然樂意出席所有嘅party。
相比起出面啲les bar，Knot呢到好玩在夠feel。
我唔係講緊飲唔飲酒，或者有冇得玩飛鏢，而係Knot嘅mood，真係好容易令人動情。
 
其實今晚係party見到好多一雙一對，突然覺得自己一個人好慘。
係工作枱入面，Sky同啫喱好似好合拍咁一齊做嘢；
Kwan仔同楊言就合作無間咁招緊大家：
靖同個b好似傾得好開心；
Taz就好似花蝴蝶咁，不停係人群中穿插；
門口，小卒就好風騷咁拖住魚魚sweet sweet咁入嚟；


King同Winnie就糖痴豆咁坐埋一齊。
 
最出奇係，樂少竟然拖住個女仔入嚟？！？！
佢唔係唔玩真感情架咩？！
但係從佢望住個女仔嘅眼嚟睇，似乎唔係玩咁喎。
 
「樂少！」我笑住咁行到去佢哋身邊。
「獅子？！ 佢哋呢？」樂少風騷個樣，真係令人好有衝動煎巴佢。
「係嗰邊。」我指指吧枱位置，再向樂少身邊個女仔伸手「Hi~ 我係獅子。」
「Hi，我叫青。」女仔回答，似乎佢好enjoy今晚嘅氣氛喎。


「樂少，你咁鬼馬，幾時…」我將目光瞄向青。
「吓？！ 哦~ 嘻嘻，都係琴日嘅事啫…我追咗1 日架。」樂少好似好欣賞自己嘅戰績。
「嘩~ 成日喎。真係辛苦晒！」我再轉向青「我係你宜家即刻溝過件算。」
樂少即刻怒睥我：「你咪教壞我bb呀~」
我忍唔住打咗個冷震，決定唔理佢哋，自己去「識吓新朋友」先！
 
我最後行咗出露天位，自己一個人拎住支巴西啤坐底咗。
突然面前出現咗一塊青檸。
我望一望眼前嘅人，係一個銀短髮嘅b。
「巴西啤放舊青檸入去，會好飲好多。試下呀~」


我再望一望塊青檸，笑一笑就接過咗。
 
我同佢，就由一塊青檸開始。