Welcome To Knot ~ Season1: #49. Taz

Friday Night, Party Night！
有時我覺得其實大家都幾苦悶，如果唔係，點會我一po 上Btf話有party，就咁鬼多人應我機話想join？
 
係Knot搞同係Silence搞，最大嘅分別，除咗係有酒冇酒外，就係呢啲無酒精party可以吸引到一啲純啲乖啲人嚟，player們都知，要搵食就去第二道。
想真心識下朋友，呢啲party係唔錯嘅選擇。
咁當然，有時都會有人博下大霧，嚟呢到搵下有冇嘢好食…就好似本小姐咁！呵呵呵呵~
 
Sky 做生意都好有一手，除咗舖面會dim燈，播下party host嘅playlist外，出面露天位重會點晒蠟燭；海邊、浪聲、夜空同燭光，玩浪漫！
學樂少嘅口吻：嘩~想殺死人咩！
 


作為Party Host，我一早已經拎住自己第3支Heineken (多謝Oppa)通場走。
九點，成間Knot都已經多人到爆。
 
除咗自己圍內班friend，今晚重有啲新面孔。
最charm係嗰個一頭銀髮嘅b，好似係叫Willson。
佢係charm，但唔係我嘅cup of tea，同佢just to say hi，就各有各玩喇。
我知佢係Btf都有唔少fans。估唔到我Taz都咁大吸引力可以叫到佢嚟喎。
 
不過講到吸引力，似乎…靖都吸引到一啲人埋身。
雖然靖一直都坐係吧枱暗角到(重要係喺凍櫃附近，拎親酒都一定俾佢望住晒)，但好快都有個b埋咗佢身。


 
我扮晒嘢咁走埋去：「Hi~ 未見過你喎，我就係Taz。」
個b望一望我，而靖面上唔知點解竟然有d欣喜。
「噢~ 你好呀。我叫Peizi。」佢伸手同我握一握，注意力又返番去靖到。
我見到靖用眼尾瞄一瞄我，跟住就冇再理我…
點解…我會有種失落感？
 
一於少理，繼續去尋覓我今晚要搵嘅人。
 
終於，我係Knot舖面嘅一個向海角落到佢。


一個四眼短髮嘅佢。
帶點落寞，又冷眼旁觀緊呢個party嘅生態，唔通…佢搵緊料去寫嘢？
「Hi！ 我係Taz。你係咪…哈叔？！」
眼前人先係打咗個突：「呀…我諗你認錯人！ 乜…哈叔今晚會嚟咩？」
「吓？！ 呀…冇呀…你慢慢啦！」
 
其實，有冇人知哈叔係點嘅樣架？？？