Welcome To Knot ~ Season1: #38 靖

Taz繼續飲佢啤酒，吹佢嘅冷氣。
我就一直背住佢，整理緊手信嘅一大疊信件。
 
一轉身，Taz唔知幾時企咗係我身後面，雙眼直勾勾咁望住我。
我可以做嘅，就係保持自己冷靜。
 
我個心跳得好快，快到…好似想由個口到跳出嚟。
四周嘅空氣好似膠住咗咁，我開始有呼吸困難嘅感覺。
 
佢咀角輕輕一揚，向前靠近我。


我哋嘅距離愈來愈近。
佢每移近一吋，我個心就跳多一下。已經近到，我聞到佢洗髮後嘅香味，同呼出嚟酒嘅味道。
佢伸出左手，似乎想觸碰我。
 
「嘻」，Taz突然笑咗一聲。
手越過我身邊，去到我身後，拎咗個蘋果。
「咔嗦~」Taz咬咗一啖，對我笑咗笑，又走返去梳化到坐。
 
我暗暗呼咗啖氣，都唔知係失望，定係慶幸。
「你係咪要揀衫？我拎幾件俾你揀。」我儘快回復到平淡嘅聲線，講完就入咗房拎衫。


 
Taz屬於身材均勻而偏瘦。
我拎咗兩三件佢會啱著嘅俾佢。
我承認，我係揀咗啲偏保守嘅俾佢。
 
而好明顯，Taz一啲都唔鍾意我俾佢嘅選擇。
「嘩！駛唔駛咁密實呀？」
「吓？！ 要咁性感做咩？今晚Silence 都唔開。」說話一講出口，我都覺得自己多咗舊魚…Silence唔開，唔等於其他bar唔開嘛。
 
「我都冇應承實你，話只會去Silence玩…」果然！「不如今晚…你都同我一齊出去啦。雖然學老豆話齋，同行如敵國，不過出去玩下見識下啫。你唔講，應該冇人知你係Silence老闆。」