Welcome To Knot ~ Season1: #34

係大家都差唔多飲飽食醉嘅時候，我拎咗一大盤Secret出嚟。
「各位，對唔住。我知大家都好鍚我，想幫我，先會拎晒啲繩結走。竹今晚係special night！ 無論你解唔解到結都好，一人一杯Secret。係我請大家飲架。」
 
「請飲Secret？！」樂少立刻怪叫「Sky你心結解咗喇？」
唔知點解大家都一齊望住啫喱。
「唔關我事架！」咁多對眼瞪住，啫喱不禁再靠後貼實椅背。
 
「你哋唔係想知我同H點架咩？」我試圖轉移大家嘅注意力。
「H嘅事固然要知，但你同Oppa…」Taz雖然唔夠瞓，但似乎意識仍然清醒。
 


「一杯Secret一個秘密。」啫喱突然作出呢個提議「唔可以迫人講，但講嘅一定要真！唔想講，唔好飲Secret！」
 
大家你眼望我眼，冇人出聲。似乎Deal了。
 
「OK！我先。」小卒身先事卒，先拎起一杯透徹冰藍色嘅Secret「我…我同魚魚係埋咗一齊。今年暑假我會過台灣陪佢…嘻嘻！」
 
「叻仔！」「恭喜晒！」「對人好啲呀！」幾個坐佢附近嘅「哥哥姐姐」都咧咀而笑，登佢開心。
「衰仔，係叻喎~ long d都搞得掂！」樂少捽一捽小卒個頭「到我，我狠飲好耐。登登~我升咗職，下個月開始做分店經理！」
 
「恭喜呀！」「預咗啦。」


「呢個都唔算秘密！」Taz一句彈埋嚟「我一早知，你老闆個日嚟食飯講開，我聽到啦。」
 
「哦~唔算數！要講過。」獅子帶頭起哄。
「咁…我…我最近…鍾意咗嗰人，客嚟嘅，不過重摸緊底睇下佢係咪Les。」樂少呢個秘密，令大家都擾揚咗一輪，但樂少今次點都唔肯講，大家都冇得迫。
 
「唔係Les，咪整攣佢囉！最驚你話佢係GAY啫~」獅子嘅結論。佢拎咗兩杯Secret，遞咗杯俾亞茶「亞茶解咗兩個結，唔駛用秘密再交換啦！」 
我做咗個請便嘅手勢。
 
「到我！」Taz舉手想作答「琴晚…我搭咗轉霸王的，400幾呀大佬。路比…你唔會拉我架呵？！」
「冇人報警，做唔到嘢喎。」路比笑住答。「到我…Sky，識你咁耐，你都冇請過我飲Secret呀~ 我個秘密就係…秘密！！！」


「唓~」「玩嘢呀？」「係咪唔講呀宜家？」「博打係咪呀？」「嘩~襲警呀？」
「講講講…」路比望一望「我…個心，住咗個人。講完，唔准問。」
 
「咁啱呀？！」靖望一望路比，再向住Taz嘅方向講「我都係喎。」
我見到Taz咀角向上揚一揚。
 
「到我。」啫喱一開聲，全場都望住佢。
「我想點講呀。可唔可以講你同…Sky宜家係點？」樂少提出咗大家都似乎想知嘅話題。
 
啫喱開始面紅：「我…同Sky表白咗。」
「Woo~~」「Oppa你好型呀！」「偶像~」「啫喱嫂~~」
「咪住。」啫喱停止咗大家忘形嘅呼叫。「我哋宜家係…朋友關係。我會等，等Sky解開心結，等佢ready先。」
亞茶第一個有反應：「友達以上，戀人未滿。」
「Oppa，我覺得你咁重型呀！！！！！」「嘩~ 公開宣言呀。」「WooWoo~~」
 


「不如到我好嘛？」我揚一揚手，阻止樂少講嘢「冇得點講。因為我未ready講自己嘅故事俾大家知。但我可以講，H嘅故事。」
跟住我用咗30分鐘去講返我同H之間嘅事，同埋最後點解決。
「Well，咁佢都係一個用情嘅人。」呢個係Winnie對佢嘅comment。
「呢啲人，做朋友ok架。係自大啲啫」路比繼續。
「自大？ 定自卑呀？」樂少始終對佢好有戒心。
「我想問，神秘人係邊個？」小卒提出主要問題。
「Sorry！ 無可奉告。」我答。
「啫喱，用美男計，呀唔係…靚b計氹Sky講啦。」樂少建議。
啫喱笑一笑「Sorry，我尊重Sky架。」
「Oppa你變咗喇…」「咁快鍚住人呀」「搞錯呀，重色輕友…」
 
「不如，到我講啦。」King望一望身邊嘅女友，再開聲「我同Winnie…打算結婚。玩夠，唔玩喇！」
路比：「噢！真架？」
樂少：「真係架？」
啫喱：「恭喜呀兄弟！」


Taz：「我要做姐妹！」
獅子：「兄弟有冇靚b先？」
啫喱：「不如係Knot開wedding party，我包結婚蛋糕。」
靖：「我包酒水。」
 
結果今晚最「大」嘅秘密，俾King同Winnie贏咗。